1 SAMUEL 14 - Guarani Bible with DC

Jonatán oyapogüe

1Jare metei ara Jonatán Saúl taɨ jei jembiokuai tembiporu ñeraro pegua ivoɨa pe:

—Eyu, yaja ñapüa sundaro filisteo reta ɨ̈aka jovaicho pe ñogüɨnoi vae re.

Jare mbaetɨ oikuaauka tu Saúl pe,

2Saúl oï jayave Gabaa jembeɨ pe temitɨ granada jee vae Migrón pe oï vae igüɨ pe, jare jae ndive ñogüɨnoi vae reta oupitɨ seisciento kuimbae.

3Jare temimonde iyɨvambae sacerdote pegua omonde vae jae ko Ahías, Ahitob taɨ, Icabod jiɨ, Ahitob jae ko Finees taɨ, Finees jae ko Elí yandeYa isacerdote Silo pegua taɨ.

Jare mbaetɨ etei kia oikuaa ketɨ ojo Jonatán vae.

4Jókuae tape Jonatán oasata sundaro filisteo reta jeyupa kotɨ vae rupi, oyóvai oï mókoi ɨ̈vavira, metei jee Boses jare ïru jee Sene.

5Metei ɨ̈vavira oï ɨvɨtuguasu kotɨ Micmas kotɨ, jare ïru ɨ̈vavira oï arayevɨ kotɨ Gabaa kotɨ.

6Jare Jonatán jei jembiporu ñeraro pegua ivoɨa pe:

—Eyu yaja ñapüa kuae itumpa-raanga pota vae reta re. Güɨramoi yandeYa yandemborɨta ko, echa chupe mbaetɨ etei mbae yavai oporoepɨ vaerä jeta vae rupi ani mbovɨ vae rupi.

7Jare jembiporu ñeraro pegua ivoɨa jei chupe:

—Eyapo ndepɨa pe reyemongeta reyapo vaerä vae, ekua, che aïta nde ndive cheokuai vaerä.

8Jayave Jonatán jei jembiporu ñeraro pegua ivoɨa pe:

—Yaasa jovaicho pe, jókuae kuimbae reta ñogüɨnoia pe, jare yayeechauka chupe reta.

9Jare jei reta yandeve yave körai: “Oreräro joko peño rojo roväe regua peve”, jayave yanderenda peño yapɨta, mbaetɨta yayeupi jae reta ñogüɨnoia pe.

10Ërei jei reta yandeve yave: “Peyeupi peyu orekotɨ”, jayave yaja ikotɨ reta, echa yandeYa ko omee reta yandepo pe; jókuae toï ikañɨmaa vaerä yandeve.

11Jare jökorai mókoi reve oyeechauka filisteo reta pe. Jare jae reta oecha yave jei: “Mase, pemae hebreo reta oë ɨvɨkua reta güi, oñemi retaa güi.”

12Jare jókuae sundaro reta osapúkai Jonatán pe jare jembiporu ñeraro pegua ivoɨa pe jei reve:

—¡Peyeupi peyu orekotɨ, oremiarita mbae re peve!

Jayave Jonatán jei jembiporu ñeraro pegua ivoɨa pe:

—Eyu cheraɨkue, echa yandeYa ko omee Israel iñemuña reta ipo pe.

13Jare Jonatán opoñɨ oyeupi, jare jaɨkue ojo jembiporu ñeraro pegua ivoɨa. Jonatán oyuka tëigüe jembiporu ñeraro pegua ivoɨa oyukaete.

14Jae kuae tenondegua ñeraro pe Jonatán jare jembiporu ñeraro pegua ivoɨa, oyuka reta veinte kuimbae ɨvɨ ipɨmiía pe.

15Jare opaete teyupa pegua reta jare ikatu pe teyupa güi ñogüɨnoi vae reta okɨɨye rai yae. Jaeramiño vi sundaro reta teyupa pegua jare ñeraro regua reta okɨɨye yae reta vi, ɨvɨ okana, jare okɨɨye yae reta.

16Jare Saúl isundaro omaeäro vae reta oecha Gabaa Benjamín iɨvɨ güi, kërai jeta vae reta opa oñemoai jare oipota rupi yogüɨraja reta.

17Jayave Saúl jei isundaro reta jae ndive ñogüɨnoi vae reta pe:

—Peyopapa jare pemae kavi, oime ra kia yandepɨte güi ojo vae.

Javoi oyopapa jare omae kavi reta yave oata Jonatán jare jembiporu ñeraro pegua ivoɨa.

18Jare Saúl jei Ahías pe:

—Eru Tumpa ikäjou cheve.

Echa jayave rupi oimeño Tumpa ikäjou Israel iñemuña reta ndive.

19Jare Saúl imiari ramboeve oï sacerdote ndive, jeiete oyembotuicha kɨɨye rai filisteo reta jeyupa pe. Jayave Saúl jei sacerdote pe:

—Agüɨye mo eru Tumpa ikäjou cheve.

20Jare Saúl omboatɨ opaete vae jae ndive ñogüɨnoi vae, yogüɨraja reta oväe ñeraroa pe yave, oecha filisteo reta oyoupii oñoraro oyokutu kɨsepuku pe, jare oyombokepegua reta.

21Jare hebreo reta ɨma ma yogüɨreko filisteo reta ndive vae, oyeupi vi filisteo reta ndive teyupa pe, jae reta oñemoïru jëtara Israel iñemuña reta ndive, Saúl jare Jonatán ndive ñogüɨnoi vae reta ndive.

22Jökoraiño vi opaete Israel iñemuña reta oñemi yogüɨreko ɨvɨtɨ Efraín pe vae, oendu filisteo reta otekuarai yave, jae reta vi oaɨkuemoña filisteo reta.

23Jökorai jókuae ara yandeYa güɨroasayepe Israel iñemuña reta jovaicho reta güi, jare oñoraro reta ojoi oväe Bet-avén pe.

Saúl iyepopeyu

24Ërei kuimbae reta Israel iñemuña reta jókuae ara ikangɨ jare yɨmbɨaɨ, echa mbaetɨ etei mbae jou reta metei ave yepe omoañete vaerä Saúl Tumpa rovake jei vae: “Tomano jókuae mbae jou kuae ara ndei pɨ̈tu mbove vae, ndei cherovaicho reta amoamɨri mbove.”

25Jare sundaro reta yogüɨraja oväe metei kaa pe, ei ñana rupigua ɨvɨ iárambo rupiño oïa pe.

26Jare oike reta jókuae kaa pe yave, oecha reta ei osɨrɨ etei jɨru güi, ɨ rami, ërei mbaetɨ etei kia yepe jou, echa okɨɨye reta mburuvicha jei Tumpa rovake vae güi.

27Ërei Jonatán mbaetɨ yepe oendu tu jei sundaro reta pe vae, jare ɨvɨra güɨreko ipo pe vae iyapɨ omopöe ei pe, jare jou, jare omopɨ̈rata jou yave.

28Jayave metei sundaro jei Jonatán pe:

—Nderu jei Tumpa rovake sundaro reta pe: “Tomano jókuae kuimbae mbae jou kuae ara vae.” Jáeramo sundaro reta ipɨtu yae ñogüɨnoi reta.

29Jayave Jonatán jei:

—Cheru oyapo ikavimbae kuae sundaro reta pe, pemae cheré kërai mbaetɨ chepɨtu jau ramo michi yepe kuae ei,

30jare sundaro reta ipuere viña jäta ngatu jou yave mbae tovaicho reta güi opɨ̈rogüe. ¡Jare ñamɨriasɨ yaeta tëi ko filisteo reta!

31Jókuae ara Israel iñemuña reta jeta oyuka filisteo reta, Micmas güive ojo oväe Ajalón pe. Ërei sundaro reta Israel iñemuña reta ikangɨ yae,

32jayave jovaicho reta güi mbae opɨ̈rogüe re opoko reta jare oipɨɨ reta vecha, guaka, toro taɨrusu vae, oñaseokɨ̈ti ɨvɨ re, jare jou reta soo jugüɨ reve.

33Jare omombeu reta Saúl pe:

—Sundaro reta iyoa yandeYa kotɨ, echa jou reta ñogüɨnoi soo jugüɨ reve.

Jayave Saúl jei:

—¡Pe reta ko jae peikuaa reve peyoa vae! Pemboyapayere añave peru cheve metei ita tuicha vae.

34Jaeramiño vi pemombeu peïru reta pe, pere chupe reta togüeru metei ñavo kuae pe iguaka ani vecha, pe reta peyuka vaerä peu, agüɨye vaerä peu soo jugüɨ reve, jare peyoa yandeYa kotɨ.

Jókuae pɨ̈tu metei ñavo güeru itoro, jare oyuka joko pe.

35Jare Saúl omopüa metei mɨmba oyeyuka oyeapɨ jese vae yandeYa pe, jare jae räri omee jese mɨmba oyeyukagüe.

36Kuae jaɨkue rupi Saúl jei:

—Yagüeyɨ kuae pɨ̈tu ñaporepeña filisteo re, jare opa ñapɨ̈ro mbaembae chugüi köe regua, opaetei yayuka reta.

Sundaro reta jei:

—Eyapo jaekavita ndeve vae.

Ërei sacerdote jei:

—Ndei mbae oyeapo mbove yaparandu Tumpa pe.

37Jayave Saúl oparandu Tumpa pe:

—¿Chepuere pa aporepeña filisteo reta re? ¿Remeeta pa Israel iñemuña reta ipo pe?

Ërei yandeYa mbaetɨ mbae jei chupe jókuae ara.

38Jáeramo Saúl jei:

—Toya katu cheré opaete sundaro ruvicha reta, toyekuaa kia ra iyoa kuae ara.

39¡YandeYa Israel iñemuña reta oepɨ vae jee re tae: Yepe tëi cheraɨ ko Jonatán, ërei iyoa ko yave, tomano!

Jare mbaetɨ etei kia ave yepe iñee omoë chupe.

40Jayave Saúl jei opaete Israel iñemuña reta pe:

—Peyemboatɨ tee pe reta, jare che cheraɨ Jonatán ndive toroï tee vi.

Jare sundaro reta jei chupe: Eyapo jaekavita ndeve vae.

41Jayave Saúl jei yandeYa Israel iTumpa pe:

—Eechauka oreve jupi vae suerte rupi.

Jare suerte oa Saúl re jare Jonatán re, jare sundaro reta opɨta jekombae.

42Javoi Saúl jei:

—Orembosuerte cheraɨ ndive.

Jare suerte oa Jonatán re.

43Jayave Saúl jei Jonatán pe:

—Eyemombeu cheve, ¿mbae pa reyapo?

Jare Jonatán oyemombeu jei:

—Añetete, jau ei cheɨvɨra iyapɨ re anoe vae. ¡Ko aï, tamano!

44Jare Saúl jei:

—¡Tumpa täta toiporarauka cheve, mbaetɨ remano yave Jonatán!

45Jayave opaete vae jei Saúl pe:

—¿Omanota yera Jonatán opa ramo Israel jovaicho reta omoamɨri vae? ¡Agüɨye jökorai! YandeYa jee re, agüɨye metei ave ia toa iñäka güi ɨvɨ re, echa Tumpa iporomborɨ rupi ko jae oyapo jókuae.

Jökorai sundaro reta güɨroasayepe mano güi Jonatán.

46Jare Saúl mbaetɨ ma oaɨkuemoña filisteo reta; jare filisteo reta opa yogüɨraja ye jëta kotɨ.

47Jökorai Saúl oiko mburuvicha guasurä Israel pe yave, oñeraro opaete jovaicho reta iyɨ́vɨri ñogüɨnoi vae ndive, jae ko: Moab iñemuña reta, Amón iñemuña reta, Edom iñemuña reta, mburuvicha guasu reta Soba pegua reta, jare filisteo reta, jare oipota rupi ojoa rupi oporomoamɨri avei.

48Omboatɨ isundaro reta, jare omoamɨri Amalec, jökorai oepɨ Israel iñemuña reta jovaicho reta ipo güi.

49Jae kuae Saúl taɨ reta: Jonatán, Isúi jare Malquisúa. Jare tayɨ tenondegua jee Merab, jare taɨkuegua jee Mical.

50Jare Saúl jembireko jee Ahinoam, Ahimaas tayɨ. Isundaro reta itenondegua ete jee Abner, Ner taɨ, Ner jae ko Saúl itutɨ.

51Echa Cis jae ko Saúl tu, jare Ner jae ko Abner tu, kuae reta jae ko Abiel taɨ.

52Opaete ara Saúl oiko ramboeve mburuvicharä, oiko ñeraro tuicha vae filisteo reta ndive. Jáeramo Saúl oecha yave kuimbae jëia, jare ipoki oñoraro vae, oñono isundaro reta ndive.