SABIDURÍA 3 - Guarani Bible with DC

Jeko kavi vae reta oikogüe vae oyemboyovake jekopochɨ vae reta ndive vae

1Jeko kavi vae reta jekove

Tumpa ipo pe ko oï,

jaema tembiporara ngaraa oupitɨ.

2Iyarakuaambae reta güɨrovia jeko kavi vae reta jaema ko omano oï vae;

omae reta imano re metei susere ko vae,

3jare metei tembiporara rami oyembosɨrɨ yandegüi jeko pegua.

Ërei ko jeko kavi vae reta ñogüɨnoi kavi yae:

4Yepe ndipo kuimbae omaeta jese oiporara ñogüɨnoi vae rami,

echa jae reta omae jese reta omano potaä ko vae.

5Opa oiporara reta mbovɨ tembiporara raɨmii yave,

oipɨɨ retata mbaeyekou tuicha vae pe,

echa ko Tumpa ojäa reta

jare oecha reta jupi ko chupegua vae.

6Ojäa reta ko oro mbae jaku vae pe oñejäa rami,

jare omboasa metei mɨmba oyeyeyukaa pe oñemee vae rami.

7Jókuae ara Tumpa etei ou ojäa reta yave,

mbae oyemoendɨ vae rami ko oesape retata,

temitɨ rupagüe pe tatapiriri oyepota vae rami.

8Ojäata tëtaguasu reta jare yogüɨrekota tëta ruvicharä,

jare Tumpa oyókuai retata iyapɨmbae reve.

9Tumpa re güɨrovia vae reta oikuaata añete ko vae,

jare jupi rupi yogüɨreko vae reta oikota oiko jae ndive mboroaɨu ndive,

echa Tumpa ipɨakavi yae ko jaema oyapota ko ikavi vae jae jembiparavo reta pe.

10Ipɨapochɨ vae reta oiporarata ko iyemongeta kaviä jeko pegua,

echa güɨröɨro reta ikavigüe jare osɨrɨ reta vi Tumpa güi.

11¡Osusere ko arakuaa jare yemboe güɨröɨro vae reta;

oporoäro jaangaiño ma ko, jare oyemoambeko jaangaiño ma ko,

jare jembiapo reta jepɨä etei ko!

12Jembireko reta jeko kavimbae vae ko, taɨ re ko jaenunga vi

jaema jökoraita vi iñemuña reta.

Ikavi yae ko agüɨye vaerä ñanemichia ñanoi vaerägüe mbaeyoa rupi

13¡Oyerovia katu ko kuña imembɨmbae vae

jekuaeño jupi rupi oiko vae

jare mbaetɨ mbae jupimbae vae oyapo ramo:

oipɨɨta mbota jupigüe rupi

Tumpa ou kuimbae reta ojäa yave!

14¡Oyerovia katuta vi oyeapiao vae

echa jae mbaetɨ etei mbae pɨ̈chɨi vae oyapo

jare mbaetɨ vi oyemongeta pɨ̈chɨi Tumpa kotɨ:

jaema jae mbaetɨ oyemongɨa jeko pegua oimeta vi chupe mbota ikavigüe vae

jare metei tenda ipöragüe vae Tumpa itupao pe!

15Mbaravɨkɨ jupi rupi oyeapo vae mbae omeegüe ikavi yae ko,

jare mbae jaekavi rupi oyeecha vae japo ngaraa yɨpi.

16Iyaguasa pota vae reta imichia ngaraa okuakuaa;

echa oyeapo mbae jupimbae vae rupi, jare pɨ̈chɨita ko iyapɨ pe.

17Yepeta ko ojo indechi, oyekuaa mbae oiko rami ko oikota;

iyapɨ pe, indechi ma yave, ngaraa ma kia omboete;

18itaɨrusu reve omano yave, mbaetɨta ko güɨnoi moroäro,

jare morojäa iara pe ngaraa oväe kia ombopɨakatu vaerä.

19Mbae ikavimbae oyapo vae reta oime kutɨ oäro güɨnoi mbae pɨ̈chɨigüe vae.