2 CRÓNICAS 13 - Guarani Bible with DC

Abías oiko mburuvicha guasurä Judá pe(1 R 15.1-8)

1Jeroboam dieciocho año ma oiko mburuvicha guasurä Israel re yave, Abías omboɨpɨ oï mburuvicha guasurä Judá pe.

2Jare oiko mburuvicha guasurä mboapɨ año Jerusalén pe. Ichɨ jee Micaías, Uriel Gabaa pegua tayɨ.

Jare Abías omboɨpɨ ñeraro Jeroboam ndive.

3Jayave Abías oyeapo katu cuatrociento mil sundaro jëia ñeraro pegua jare oyeparavogüe vae ndive. Jeroboam oyeapo katu jovaichorä ocho ciento mil sundaro oyeparavogüe jare jëia yae vae reta ndive.

4Jayave Abías oyeupi ɨvɨtɨ Zemaraim re, jae ko ɨvɨtɨ reta Efraín pe ñogüɨnoi vae re, osapúkai reve jei: “¡Jeroboam jare opaete Israel pegua reta, peyeapɨsaka cheré!

5¿Mbaetɨ pa peikuaa yandeYa, Israel iTumpa omee mborookuai David pe Israel iñemuña reta re jekuae avei pegua, chupe jare iñemuña reta pe oyapo yukɨ morogüɨrökuavee päve jekuae avei pegua vae?

6Ërei Jeroboam, Nabat taɨ, Salomón, David taɨ iyɨvɨrigua oñemopüa juvicha re,

7jare oñemoïru jae ndive kuimbae reta jembiapombae jare ipɨapochɨ vae, jae reta imbaepuere yae Roboam, Salomón taɨ güi, echa Roboam taɨrusu jare ipɨakɨɨye. Jare mbaetɨ ipuere oyeepɨ chugüi reta.

8Añave pe reta peipota peñemopüa yandeYa iporookuaía David taɨ reta ipo pe oï vae re, echa pe reta jeta peï jare penoi toro taɨrusu vae iä oro pegua Jeroboam oyapo itumparä vae.

9¿Pe retaä yera opa pemombo yandeYa isacerdote reta, Aarón iñemuña reta jare levita reta, javoi peñono sacerdoterä ïru tëta pegua reta oyapo rami? ¡Oipotagüe ou vaerä oñeñono tee metei toro taɨrusu vae jare chiu vecha kuimbae ndive oiko vaerä tumpa-raanga reta isacerdoterä!

10Ërei orevegua Tumpa, jae ko yandeYa Tumpa jare mbaetɨ royembosɨrɨ chugüi; sacerdote reta oyeokuai yandeYa jóvai vae, Aarón iñemuña pegua, jare mbaravɨkɨ pe ñogüɨnoi vae levita reta ko.

11Jae reta oapɨ omee yandeYa pe mɨmba oyeyuka opaetei oyeapɨ vae ndeimbove ñavo jare kaaru ñavo, mbae ikäti kavi vae incienso, jare oñono reta mbɨyape mbaemboete pegua mesa ikɨambae re, jare mechero jenda oro pegua imechero ndive, jendɨ vaerä kaaru ñavo, echa ore royapo yandeYa oreTumpa iporookuai, ërei pe reta peeya.

12Mase, añave Tumpa oï ore ndive, oreruvicharä, isacerdote reta mimbɨguasu ndive omoñee vaerä ñeraro pegua pekotɨ. Jáeramo Israel iñemuña reta agüɨye peñoraro yandeYa peñemuñagüe reta iTumpa ndive, echa ngaraa oë kavi peve.”

13Ërei Jeroboam omondo isundaro reta, Judá pegua reta ikupe kotɨ güi oporepeña vaerä jese reta; jökorai jeta vae sundaro reta ñogüɨnoi Judá pegua reta jóvai kotɨ, jare ïru reta ñogüɨnoi ikupe kotɨ.

14Jare Judá pegua reta omae yave oecha jenonde jare jaɨkue sundaro tovaicho reta, jayave osapúkai reta yandeYa pe, jare sacerdote reta omoñee mimbɨguasu.

15Jayave Judá pegua reta osapúkai täta, jare Tumpa omoamɨriuka Jeroboam jare opaete Israel pegua reta, Abías jare Judá pegua reta jóvai.

16Israel pegua reta otekuarai Judá pegua reta güi, echa Tumpa omee jae reta ipo pe.

17Jare Abías jare isundaro reta ndive oparapiti jese reta, oyuka reta quiniento mil kuimbae oyeparavogüe Israel pegua reta.

18Jökorai Israel pegua reta iñamɨri jókuae ara, jare Judá pegua reta oporomoamɨri, echa oyeko reta yandeYa iñemuñagüe reta iTumpa re.

19Jare Abías oaɨkuemoña Jeroboam jare opɨ̈ro chugüi amogüe tëta guasu reta: Bet-el, Jesana, jare Efraín, kuae tëta guasu ñavo iyɨvɨrigua tëta raɨ raɨ ndive.

20Jare mbaetɨ ye Jeroboam mbaepuere güɨnoi, Abías oikove oiko ramboeve. Jare yandeYa ombou mbaerasɨ chupe jare omano.

21Ërei Abías jeiete imbaepuere. Güɨnoi catorce jembireko, jare veintidó taɨ jare diecisei tayɨ.

22Ïru mbaembae reta Abías regua opaete mbae oyapogüe jare jeigüe oime oyekuatía oï ñeemombeúa Iddo jembikuatía pe.