1Cuatrociento ochenta año ma oasa Israel iñemuña reta ñogüɨnoe Egipto güi yave, Salomón omboɨpɨ omopüa tupao yandeYa peguarä; irundɨ año ma oiko Israel pe mburuvicha guasurä yave, yasɨ Zif pe, jae ko mokoía yasɨ.
2Mburuvicha guasu Salomón omopüa yandeYa itupao vae, güɨnoi veintisiete metro ipukugüe, jare chau ipɨgüe, ɨvategüe trece metro y medio.
3Jare tupao guasu jenonde oï korero vae, güɨnoi chau metro ipukugüe, tupao guasu ipɨgüe rami, jare jókuae korero ipɨgüe ko irundɨ metro y medio.
4Jare oyapo tupao iventana ipɨguasu japɨpe rupi jare ipɨmii ikatu rupi, oyeokenda jare oyepea vae.
5Omopüa vi ovapetea ikupe rupi o reta, güɨroyere etei oyapo o reta tupao guasu jovapetea re,
6igüɨ pegua ete cuarto güɨnoi mókoi metro veinticinco centímetro ipɨgüe, jare cuarto mbɨte pegua güɨnoi mókoi metro setenta y cinco centímetro ipɨgüe, jare cuarto iárambo ete güɨnoi mboapɨ metro quince centímetro ipɨgüe; echa tupao ikupe rupi omomichi äve, agüɨye vaerä oguambɨ etei oyoo reta.
7Jare tupao oñemopüa yave, oyapo reta ita oñeopagüe güeru reta vae pe, jáeramo omopüa reta ñogüɨnoi yave mbaetɨ etei oyeendu martillo jare yɨɨ ave tupao pe, ani mbae nunga ïru tembiporu jiero pegua.
8Jókuae mbɨte pegua cuarto jöke güɨnoi tupao iyakatu kotɨ; jare yeupika oyere yere vae rupi yayeupi cuarto mbɨte pegua pe, jare jókuae cuarto mbɨte pegua güi yayeupi cuarto iarambogua ete pe.
9Jare opa oyapo tupao oñova omopöra ɨ̈vɨrare pe.
10Omopüa vi cuarto reta tupao re güɨroyere, jare ɨvategüe oupitɨ mókoi metro veinticinco centímetro, jare ɨ̈vɨrare pe omboya oyoe cuarto reta tupao ndive.
11Jare yandeYa jei Salomón pe:
12“Kuae tupao nde remopüa reï vae regua tae ndeve. Reguata yave opaete cheporookuai reta rupi, jare reiko opaete cheporookuai reta jeigüe rupi yave, che ambopota ndeve opaete cheñee reta nderu David pe jae ndekotɨ vae;
13jare aikota pɨpe Israel iñemuña reta ipɨte pe, mbaetɨta aeya tëta chembae Israel.”
14Jökorai Salomón omopüa tupao jare opa oyapo.
15Opaete tupao jovapetea oñova ɨ̈vɨrare oñeopagüe pe. Oñova jókuae ɨvɨra pe ɨ́vɨkotɨ güive ɨvate kotɨ, jare oñova vi japɨpe piso ɨvɨra ciprés jee vae pe.
16Oyapo vi tupao jugua pe o chau metro ipɨgüe vae, jare oñova ɨ̈vɨrare oñeopagüe pe ɨvate güive ɨ́vɨkotɨ, oyapo kavi yae, tupao japɨpe oñeñono tee kavi yae Tumpa peguarä vae.
23Oyapo vi araɨgua iä tupao japɨpe oñeñono tee kavi yae vae pe, ɨvɨra olivo pegua, metei ñavo ɨvategüe güɨnoi irundɨ metro y medio,
24jare metei ñavo ipepo reta güɨnoi mókoi metro veinticinco centímetro. Jayave mókoi reve ipepo omoata yave oupitɨ irundɨ metro y medio.
25Mókoi reve araɨgua iä oyovake, ɨvategüe jare ipukugüe;
26ɨvategüe güɨnoi irundɨ metro y medio, jökoraiño vi ïru.
27Jare Salomón oñono jókuae mókoi araɨgua iä tupao japɨpe oñeñono tee kavi yae vae pe. Jókuae metei araɨgua iä ipepo omoata (oipɨso) vae oupitɨ ovapetea jare ïru araɨgua iä ipepo oupitɨ ïru ovapetea, jare ïru ipepo omboya reta oyoe o mbɨte pe.
28Salomón opa oñova oro pe jókuae araɨgua reta iä. jae ko juri yasɨ jókuae año pe, opa oyeapo tupao. Salomón opa oyapo tupao chiu año pe.
Who We AreWhat We EelieveWhat We Do
2025 by iamachristian.org,Inc All rights reserved.
