1Amboete aveita yandeYa opaete ara rupi;
cheyuru pe oïta jekuae avei mbaemboete ikotɨ.
2YandeYa re chepɨayemboeteta;
¡oñemomichi vae reta oenduta, jare oyerovia yaeta!
3Embotuicha yandeYa che ndive,
yambotuicha päve jee.
4Aeka yandeYa, jare jae oendu cheve,
jare chereepɨ opaete mbae chemongɨɨye vae reta güi.
5Omae jese vae reta oyerovia katu,
mbaetɨ oñemomaraiuka reta.
6Che, paravete vae asapúkai jare yandeYa oendu cheve,
jare chereepɨ opaete chepɨatɨtɨ güi.
7YandeYa iaraɨgua oiko,
oipoɨu chugüi vae reta iyɨ́vɨri jare oepɨ.
8Peeka jare peikuaa, ikavi ko yandeYa.
¡Oyerovia yae ko kuimbae, jese oyeko vae!
9Peñeñono tee Tumpa pe vae reta,
peipoɨu yandeYa güi;
echa ngaraa mbae oata oipoɨu chugüi vae reta pe.
10Yaguapope raɨ reta pe oata mbae jare yɨmbɨaɨ;
ërei ngatu yandeYa oeka vae reta pe,
ngaraa oata mbae ikavi vae.
11Peyu cheraɨ reta, peyeapɨsaka cheré;
pomboeta peipoɨu yandeYa güi.
12¿Kia nunga kuimbae pa oipota oikove oiko?
¿Jeta ara oipota oiko, oecha vaerä mbae ikavi vae?
13Eroyeandu nekü ikavimbae güi,
jare ndeyuru mborombotavɨ güi.
14Eyembosɨrɨ ikavimbae güi, jare eyapo ikavi vae;
eeka mbɨakatu, jare eiko avei mbɨakatu rupi.
15YandeYa oyangareko jupi vae reta re,
jare oyeapɨsaka avei oï isapúkai reta re.
16YandeYa iyarasɨ ikavimbae oyapo vae reta kotɨ,
omboai vaerä ɨvɨ güi jee reta.
17Jupi vae reta osapúkai, jare yandeYa oendu;
jare oepɨ opaete ipɨatɨtɨ güi.
18YandeYa köiño oï ipɨatɨtɨ yae vae reta güi;
jare oepɨ ipɨatɨtɨ yae vae reta.
19Jupi vae, jeta yae ko iyemoambeko reta,
ërei ngatu opaete kuae reta güi yandeYa oepɨ.
20Jae oñovatu opaete ikägüe reta;
metei ave ikägüe ngaraa oñemopë.
21Jeko ae oyukata jeko kavimbae;
jupi vae imotareɨa reta oiporara yaeta.
22Ërei yandeYa güɨroasayepe jembiokuai reta jekove,
¡ngaraa oiporara jese oyeko vae reta!
Who We AreWhat We EelieveWhat We Do
2025 by iamachristian.org,Inc All rights reserved.
