PROVERBIOS 12 - Guarani Bible with DC

1Mboromboe oaɨu vae, arakuaa ko oaɨu;

ërei yemboeta güɨröɨro vae, yarakuaambae ko.

2Kuimbae jeko kavi vae re, yandeYa iporoparareko,

ërei kuimbae iyemongeta kavimbae, jae omokañɨtei.

3Ngaraai kia nunga oiko kavi, ikavimbae oyapo vae rupi;

ërei jupi vae reta ngaraa kia omomɨi.

4Kuña jeko kavi vae, yerovia ko ime peguarä;

ërei kuña jeko kavimbae, yaratita rami ko ime ikägüe reta re.

5Jupi vae reta iyemongeta sɨmbi ko,

ërei iyoa vae reta iporomboarakuaa, yembotavɨ ko.

6Iyoa vae reta iyemongeta, yemomburu ko oporoyuka vaerä

ërei jupi vae reta iyemongeta, yereroasayepe pegua.

7Tumpa opata omokañɨtei iyoa vae reta,

jare ngaraa ye ma yogüɨreko,

ërei jupi vae reta, jo pegua reta ndive ngaraa oyemboai.

8Kuimbae oyemboeteuka iyarakuaa katu güɨnoi rupi,

ërei ipɨapochɨ vae, oñereröɨrouka vaeräño ko.

9Ñemotareɨ rupi oiko vae güɨnoi jembiokuai vae ikavi ko,

oyemboete yae vae mbaetɨ jembiurä vae güi.

10Jupi vae oyangareko kavi jɨmba reta re,

ërei iyoa vae reta ipɨa-pïría yae ko.

11Tembíu ngaraa oata, iko pe oparavɨkɨ vae pe,

ërei oparavɨkɨmbae reta ndive oñemoïru vae, mbaetɨ yarakuaa.

12Iyoa vae reta imbaepotarai, ikavimbae kotɨño;

ërei jupi vae reta jeko kavi rupi, yogüɨreko kavi avei.

13Iyoa vae oyepókoi iyapu pe aeño, ërei kuimbae jupi vae oëta mbɨatɨtɨ güi.

14Kuimbae iñee ka vi vae, jókuae jekoviata chupe,

omboresiveta jembiapo reta oï rupi.

15Yarakuaambae, sɨmbi rupi kaviecha ko oiko iyeupe,

ërei yemboarakuaa re oyeapɨsaka vae, yarakuaa ko.

16Yarakuaambae, iyarasɨ rai voi;

ërei oyeandu katu reve oiko vae,

mbaetɨ oyeapɨsaka ñeeasɨ katu re.

17Añetegüe imiari vae, omoërakua jupigüe;

ërei añetembae imiari vae, omoërakua apu.

18Oime amogüe, oporoapicha iñee rupi,

ërei yarakuaa vae reta iñee, moa rami ko.

19Añetete rupi imiari vae, oiko aveita,

ërei yapu yae vae, ngaraa etei ɨma oiko.

20Iyemongeta kavimbae reta ipɨa pe, oime mborombotavɨ;

ërei iyemongeta kavi vae reta ipɨa pe, oime yerovia katu.

21Jupi vae, ngaraai oiporara ikavimbae,

ërei iyoa vae reta, oiporarata jeta ikavimbae.

22Yapu imiari vae, pɨ̈chɨi yae ko yandeYa pe,

ërei oyerovia katu omae, añetete rupi imiari vae reta re.

23Kuimbae iyarakuaa katu vae mbaetɨ oyembotuicha iyarakuaa re,

ërei iyarakuaambae reta jaeiño oñemoërakua.

24Jäta ngatu vae, oporookuaita;

ërei iyakɨ vae oikota tembiokuairä.

25Mbɨatɨtɨ, ombopɨarúi kuimbae;

ërei ñee yeaeä, ombovɨakatu.

26Jupi vae oechauka kavi tape japicha pe,

ërei iyoa vae reta oyavɨuka japicha pe.

27Iyakɨ vae mbae omboyɨ jou vaerä ave ipuereä,

ërei iparavɨkɨse vae güɨnoi jeta mbaembae.

28Tape jupi vae jae tekove pegua,

jokoropi mbaetɨ mano.