Daniel (dc) 8 - Guarani Bible with DC

Mbaɨu vecha kuimbae jare kavara kuimbae regua

1“Mboapɨa año re ma Belsasar oiko mburuvicha guasurä yave, che, Daniel aecha ïru mbae, jókuae tenonde yave oyekuaa ma cheve vae güi.

2Kuae aecha vae pe aïecha tëta Susa pe, jae ko tëta mburuvicha guasu reta iporookuaía ɨvɨ Elam pe, ɨ̈aka Ulai jee vae jembeɨ pe.

3Amopüa cheäka amae yave aecha metei vecha kuimbae oï ɨ̈aka jembeɨ pe. Güɨnoi mókoi jäti puku vae, ërei metei jäti puku yae jókuae ïru güi, taɨkue oë, ërei puku yae okuakuaa.

4Aecha jókuae vecha kuimbae oporombopere jäti pe kuaraɨ oikea kotɨ, ɨvɨtuguasu kotɨ jare arayevɨ kotɨ, jare mbaetɨ mbae nunga mɨmba ave ipuere oñeraro jae ndive, mbaetɨ vi ipuere oasayepe chugüi vae; oyapo jae jeigüeño jare jeieteño oyembotuicha.

5Che ayemongeta kuae aechagüe re aï ramboeve, aecha metei kavara kuimbae ou kuaraɨ oikea kotɨ güi, täta yeyé osɨi ou, opɨ̈roä etei ɨvɨ re. Kuae kavara kuimbae güɨnoi meteiño jäti tuicha yae vae jesɨva re.

6Jare ou ma yave oväe jókuae vecha kuimbae mókoi jäti vae pe, aecha ɨ̈aka jembeɨ pe vae, kuae kavara kuimbae osɨi oepeña tätagüe opaetei ipɨ̈rata ndive.

7Jare oakɨo chugüi mókoi reve jäti, jare vecha kuimbae mbaetɨ ipuere oñeraro jae ndive. Javoi kavara kuimbae oipɨaka jókuae vecha kuimbae, jare opɨ̈ro pɨ̈ro jese, mbaetɨ etei kia ipuere oepɨ chugüi.

8Jókuae kavara kuimbae jeieteño oyembotuicha, ërei imbaepuere yae ete ma yave, jókuae jäti tuicha yae vae opë chugüi, jare jendagüe pe oë irundɨ jäti opövee oipota rupi vae.

9Jókuae jäti reta güi metei vae re oë ye ïru michi vae, kuae okuakuaa arayevɨ kotɨ, kuaraɨ oëa kotɨ jare ɨvɨ ikavi yae vae kotɨ.

10Jókuae okuakuaa ojo regua oväe yasɨtata reta pe; jare oitɨ mbovɨ yasɨtata retaAp 12.4. jare opa opɨ̈ro pɨ̈ro jese,

11jare jókuae yasɨtata reta Iyapoa pe ave oyembotuicha; oyopia mɨmba reta oyeyuka oñemee Tumpa pe ara ñavo vae jare omboeteä o mbaemboetea.

12Oike oyapo reta ikavimbae yae vae jókuae ara ñavo mɨmba oyeyuka oñemee Tumpa pe vaea pe, jare oekɨ omombo añete vae. Oyapo opaete jae jeigüe, jare opaete mbae oë kavi avei chupe.

13Javoi aendu metei araɨgua oparandu ïru araɨgua aendu imiari vae pe, jei: ‘¿Kërai yave pa iyapɨta kuae ara ñavo mɨmba oyeyuka oyeapɨ jese vae re oyekuaa vae? ¿Kërai regua pa oikota mbaeyoa yavaete yae vae yandeYa jo mbaemboetea pe jare jese oporogüɨrovia vae opa vaerä oñemokañɨteiuka?’

14Jare jae jei chupe körai: ‘Dos mil tresciento ara regua. Jókuae jaɨkue rupi o mbaemboetea oyetɨo yeta.’

15Che, Daniel ayemongeta ramboeve kuae aecha vae re, mbae ko oipota jei vae yave, güɨramoiño oyekuaa cheróvai metei kuimbaeecha vae,

16jare aendu metei kuimbae iñee ɨ̈aka Ulai jee vae jembeɨ kotɨ güi, jei: ‘Gabriel,Lc 1.19,26. nemiari kuae kuimbae pe oecha vae re.’

17Jayave ou oya cheré. Che akɨɨye jare ayetavatɨka chetindɨasɨ ɨvɨ re, ërei jae jei cheve: ‘Nde kuimbae, kuae reecha vae ko ara reta iyapɨta ma yave vae regua.’

18Jae chemomiari oï ramboeve, che amano tëi jare ayepɨso aï joko pe; ërei jae cheätai, jare chemboyemboɨ ye,

19jare jei cheve:

‘Chemiarita ndeve mbae ra oasata Tumpa iyarasɨ poitaDn 11.36. ma yave vae regua, echa kuae reecha vae ko ara reta iyapɨta ma yave vae regua.

20Vecha kuimbae mókoi jäti reecha vae, jae ko Media pegua jare Persia pegua mburuvicha guasu reta.

21Kavara kuimbae reecha vae, jae ko tëtaguasu Grecia pegua mburuvicha guasu, jare jókuae metei jäti tuicha yae güɨnoi jesɨva re vae, jae ko tenondegua ete mburuvicha guasu.

22Irundɨ jäti reta oë jókuae tenondegua jäti opë yave vae, jae ko kuae tëtaguasu güi oëta irundɨ mborookuaía, ërei mbaetɨta jókuae tenondegua imbaepuere rami.

23Kuae mburuvicha guasu reta iporookuaía

opa ma iyapɨ imbaepuere yave,

jare teko ikavimbae reta jeiete yae ma yave,

metei mburuvicha guasu iporomboetembae vae,

ipoki yae mbae yavai yae oyapo kavi vae oguapɨta mburuvicharä.

24Imbaepuere yaeta,

ërei ngaraa jae imbaepuere pe ae;

jeta yaeta oporomboai,

oë kavi aveita chupe opaete mbae oyapogüe.

Jae jeigüeño oyapota,

omokañɨteita kuimbae imbaepuere yae vae reta,

jare jeta Tumpa pe oñeñono tee vae reta.

25Ipoki yae oporombotavɨ vae rupi

oë kavi aveita chupe mbaembae.

Oyembotuicha yaeta,

jare jeta kuimbae yogüɨreko pɨagüive vae

oyukata iparanoe.

Oñemopüata mburuvicha reta Juvicha re,

ërei oñemoamɨriukata chupe.

26Kuae ara reta regua reecha vae añetete ko; ërei agüɨye emombeu kia pe, echa oyembopota ko ara reta iyapɨ ma yave.’

27Che, Daniel, ayandu chepɨtu yae aiko, mbovɨ ara rupi chembaerasɨ aiko. Ërei apüa ye yave, amboɨpɨ ye ayangareko mburuvicha guasu iparavɨkɨ re. Ërei che ayemongeta yae aiko jókuae aechagüe re, echa mbaetɨ chepuere aikuaa.