OSEAS 9 - Guarani Bible with DC

Oseas omombeu Israel oiporarata vae

1Israel pegua reta,

agüɨye peyerovia;

agüɨye pechäguariko peyerovia güi ïru tëta pegua reta rami,

echa peyembosɨrɨ Tumpa güi vae, kuña imegua rami ko,

ipöra yae peve trigo oyembopiriría rupi aguasa peyapo vae jepɨ peve vae.

2Israel pegua reta mbaetɨta güɨnoi trigo jare vino;

uva tɨɨgüe ipɨau mbaetɨta oupitɨ chupe reta.

3Efraín pegua reta yogüɨraja yeta Egipto pe jare Asiria pe,

joko pe jou retata tembíu mbaetɨta tëi oyeu vae.

Mbaetɨta opɨta reta yandeYa iɨvɨ pe,

4mbaetɨta yandeYa pe pemee mbota vino oyepɨyere vae,

mbaetɨta vi pemee mɨmba oyeyukagüe.

Mbɨyape peu vae, manoa pe ramita,

jókuae mbɨyape jou vae,

ikɨata Tumpa jesa róvai.

Jókuae mbɨyape peveguaräño,

jókuae nunga mbɨyape mbaetɨta oyereroike tupao pe.

5¿Mbae pa peyapota arete mbaemboete pegua oväe yave,

yandeYa pe arete oyeapo vae?

6Jae reta opa otekuarai kañɨtei jeko pegua;

Egipto pe yogüɨreko retata,

tëta guasu Menfis pe opata oñeotɨuka reta.

Ñana yuu reve vae opɨ̈rota imbaembae jepɨ vae,

jeyupagüe pe okuakuaata ñurati.

7¡Oväe ma tembiporara iara reta!

¡Oväe ma jeko vae reta oiporara vaerä jeko ae re!

¡Israel oikuaata kuae re!

Pe reta pere: “Ñeemombeúa mbaetɨ ko yarakuaa,

kuae oporomboarakuaa vae imbokere vae ko.”

Kuae pere, ikavimbae yae peyapo jeko pegua,

peporomotareɨ yae jeko pegua.

8Ñeemombeúa jae ko Tumpa pe omae Efraín re vae,

ërei pe reta peñono ñuai japerä ñavo pe,

jare tupao pe ave omotareɨ reta vae.

9Oñererokomegua ete kavi reta,

arakae yave Gabaa pe rami.

Ërei añave yandeYa imaenduata ikavimbae oyapo vae re,

oiporaraukata chupe iyoa reta re.

10YandeYa jei:

“Ñuu pe uva ñaväe rami, aväe Israel;

ɨva pɨau ia yagüɨyeɨpɨ vae re rami amae peñemuñagüe reta re.

Ërei omboete reta tumpa-raanga Baal-peor,

oñemee reta tumpa-raanga reta pe,

jare oñereröɨrouka reta jókuae tumpa-raanga reta oaɨu vae ndive.

11Efraín iyemboetea ojota chugüi, güɨra oveve ojo rami.

Mbaetɨta ma michia raɨ reta oa chupe,

mbaetɨta ma kuña reta ipurúa,

mbaetɨ yeta ma imichia reta.

12Jare yepe tëi ombokuakuaa imichia reta,

apɨ̈rota chugüi reta,

ngaraa amaeño yogüɨreko.

Echa, ¡oiporara yaeta che asɨrɨ chugüi reta yave!

13Efraín re amae jëguambae,

oyovake tëta Tiro ndive,

ërei güɨnoeta taɨ reta omano vaerä.”

14¡CheYa, eyapo chupe reta nde reipota reyapo chupe reta vae!

¡Imembɨmbae toyogüɨreko jare ikambɨ tɨɨmbae!

YandeYa iyarasɨ Efraín kotɨ

15YandeYa jei:

“Gilgal pe oyapo reta opaete ikavimbae vae,

joko güi amboɨpɨ aröɨro reta.

Ikavimbae oyapo reta vae jeko pegua amombo retata chero güi;

mbaetɨta ma aaɨu reta,

echa opaete juvicha reta ipɨapochɨ yae.

16Efraín ipere oï,

metei ɨvɨra japo opa otini chugüi rami, mbaetɨ ma ia.

Yepe tëi togüɨnoi imichia reta oaɨu vae,

che ayukaukata chugüi reta.”

17Kuae tëta mbaetɨ oipota yogüɨreko Tumpa jeia re;

jáeramo cheTumpa güɨröɨrota iyeugüi,

oguata reteiñota yogüɨreko ɨvɨ ambuae rupi.