TOBIT 13 - Guarani Bible with DC

Tobit omee mbaemboete Tumpa pe

1Jare Tobit jei:

2“Mbaemboete toiko cheTumpa pe,

oikove vae jare oiko avei oiko vae.

Jae ñanenupa,

jare iporoparareko vi.

Yandembogüeyɨ aramoete mano renda pe,

jare yandereepɨ vi chugüi.

Imbaepuere güi ngaraa mbae oasayepe.

3Pemee mbaemboete chupe, Israel iñemuña reta,

opaete tëta guasu reta jovake.

Jae ko opa omoai aï opaete tëta rupi,

4jare jei vi oechauka jokoropi chupe reta jae ko tuicha vae.

Pemee mbaemboete chupe opaete vae jovake.

Jae ko yandeYa,

ñaneTumpa jare yandeRu,

jare jae ko Tumpa oiko avei oiko vae.

5Jae penupa vi pereko ikavimbae vae re,

ërei güɨnoi vi mboroaɨu opaete pere

jare pemboatɨta vi kuri ïru tëta reta

kotɨ güi jae opa pemoai aï vae güi.

6Peyerova ye yave Tumpa kotɨ opaete pepɨa reve,

jare peyemongeta ndive

peyapo jupi rupi mbae ikavi vae,

jae oyerova yeta pekotɨ

jare ngaraa yé ma pereeya.

7Pemae añave mbae oyapo peve vaere,

jare pemee mbaemboete yandeYa pe.

Jae oyapo jupi vae;

pemboete Mburuvicha guasu oiko avei vae.

8Che amboete kuae tëta guasu aiko pɨpe vae pe,

jare aechauka tëta mbaeyoa pegua reta pe

Tumpa imbaepuere jare imbaeyekou.

Che jae peve: ‘Imbaeyoa vae reta, peyerova Tumpa kotɨ,

peyapo jae jóvai ikavi vae.

Ipuereta vi ikavi peve,

jare pepararekota omae peré.’

9Che amboete cheTumpa, Mburuvicha guasu araɨgua;

ayerovia tuicha Tumpa imbaepuere pe.

10Opaete vae tomboete,

jare tomee yasoropai chupe Jerusalén pe.

Jerusalén, jae ko oñeñono tee Tumpa pe vae,

jae oiporaraukata ndeve

kuae pe oiko vae reta jeko ikavimbae jeko pegua,

ërei oiparareko yeta omae peré pereko ikavi yave.

11Pemee yasoropai jupi rupi yandeYa pe,

pemboete Mburuvicha guasu oiko oiko vae,

tupao oñemopüa ye vaerä yerovia ndive,

12jare opa ye yave oyerova ndekotɨi kerupi oiko vae reta,

jae ko omboyerovia retata jare

oechaukata mboroaɨu opaete osusere vae reta pe,

opaete ara rupi iyapɨmbae reve.

13Nderembipe oesapeta opaete ɨvɨ iyapɨ rupi

jetata tëta guasu reta yogüeruta ndekotɨ.

Tëta ipo reta opaete ɨvɨ iyapɨ güi yogüeruta omee mbaemboete cheYa, Tumpa pe;

ipo ñavo güeruta mbota Mburuvicha guasu araɨgua pe.

Kuimbae reta oiko ñomai vae oechaukata ndeve iyerovia, jare

tëta guasu Tumpa oiparavo vae jee oikota ko oiko opambae reve.

14¡Ayepopeyu opaete ndekura vae reta re,

ayepopeyu vi opaete nemokañɨtei vae reta re,

ovapetea guasu oitɨ vae reta re, jare ndero ɨvate vae oitɨ vae reta re

jare ndero oapɨ vae reta re!

¡Toyekou, opaete nemopüa ye vae reta!

15Jare jayave tätata reyerovia kuri opaete ikavi vae reta re.

Opaete yatɨta kuri

jare omboeteta ɨvɨ iya.

¡Toyerovia katu nderaɨu vae reta!

¡Toyerovia katu nde mbaeyekou re oyerovia vae reta!

16¡Toyerovia opaete reiporarata vae oikuaa vae reta,

echa taɨkue rupi;

oyerovia retata nderé

ndeyerovia opambae vae oecha reta yave!

Che rekove emboete cheYa, Mburuvicha guasu tuicha vae.

17Jerusalén oñemopüa yeta ko kuri,

yandeYa itupao oiko aveita ko oiko.

¡Yerovia tuicha vae cheré oime yave cheñemuña

oecha jókuae mbaeyekou jare omboete vaerä Mburuvicha guasu ara pegua vae!

Jerusalén jöke oyeapo yeta ko

Zafiro pegua jare Esmeralda pegua,

jare ita iporä vae pegua opaete ovapetea guasu reta.

O maeka reta Jerusalén pegua

oñemopüa yeta oro pegua pe jare joka

rubies pe oyeapota jare ita ipöra vae pe.

18Jare jöke reta oyemongoita

yerovia pegua pe jare opaete jo reta:

‘¡Aleluya, jeita,

mbaemboete toiko Israel iTumpa pe!’

Ndeve omeeta nde ree pe mboroaɨu renoi vaerä opambae reve.”