LEVÍTICO 11 - Guarani Bible with DC

Mɨmba reta oyeu vae jare oyeumbae(Dt 14.3-21)

1YandeYa jei Moisés pe jare Aarón pe:

2“Pere Israel iñemuña reta pe: ‘Kuae ko jae mɨmba reta peu vaerä, opaete ïru mɨmba reta ɨvɨ pegua güi.

3Mɨmba reta ipɨte güi, opaete ipɨ̈sa jakambɨ vae, jembíu omboyevɨ vae reta, jókuae nunga peu;

4ërei jembíu omboyevɨ ani ipɨ̈sa jakambɨ vae agüɨye peu:

Camello omboyevɨ jembíu ërei mbaetɨ ipɨ̈sa jakambɨ, peumbae vaerä toiko.

5Jaeramiño vi tapiti mɨmba, echa omboyevɨ jembíu, ërei mbaetɨ ipɨ̈sa jakambɨ, peumbae vaerä toiko.

6Jökoraiño vi tapiti ñana rupigua echa jembíu omboyevɨ, ërei mbaetɨ ipɨ̈sa jakambɨ, peumbae vaerä toiko.

7Jaeramiño vi kuchi, güɨnoi ipɨ̈sa jakambɨ ërei mbaetɨ jembíu omboyevɨ, peumbae vaerä toiko.

8Kuae reta isoogüe agüɨye peu, jare agüɨye peyavɨkɨ jëogüegüe; peumbae vaerä toyogüɨreko.

9Jevae reta ɨ rupigua güi, kuae reta peuta: Opaete güɨnoi ipepo raɨ jare ipire vae, ɨguasu rupigua jare ɨ̈aka rupigua.

10-12Ërei opaete jevae mbaetɨ güɨnoi ipepo raɨ ani ipire vae reta, ɨguasu rupigua jare ɨ̈aka rupigua reta, jare opaete mbae omɨi vae reta, oikove ɨ rupi vae reta ani isoogüe peyuguaru chugüi reta vaerä toyogüɨreko.

13Jare kuae nunga güɨra reta agüɨye peu, peyuguaru chugüi reta: Güɨraké, güɨraké guasu, güɨrakeovɨ,

14guäpi, jare oipotagüe güɨraké ambuaeyee ye vae,

15oipotagüe uruapúa reta,

16yandu, suinda, güɨra ɨ rupigua, jare oipotagüe kirikiri ambuaeyee ye vae,

17surumbukuku, kärau rami vae reta, güɨratï reta,

18patu ganso, güɨratï, tayasugüɨra, ururutï,

19güɨratï, jare oipotagüe güɨratï ambuaeyee ye vae, güɨra iyatɨra vae jare andɨra.

20Opaete mbae michi raɨ vae ipepo vae reta, irundɨ ipɨ re oguata vae reta peyuguaru chugüi vaerä toyogüɨreko,

21ërei mbae michi raɨ vae ipepo vae reta, irundɨ ipɨ re oguata vae reta, jare mókoi iu puku re ochäguariko oguata ɨvɨ re vae reta, jókuae nunga peu.

22Jae kuae reta peu vaerä: Tuku, tukuraɨ jare oipotagüe tuku reta ambuaeyee ye vae,

23Ërei opaete ïru mbae michi raɨ vae ipepo vae reta, irundɨ ipɨ re oguata vae reta, peyuguaru chugüi vaerä toyogüɨreko.

24Kuae mɨmba reta rupi peyemongɨa:

Oipotagüe oyavɨkɨ jókuae jëogüegüe vae tikɨa topɨta Tumpa jóvai pɨ̈tu regua.

25Oipotagüe oekɨ mbae güɨraja jókuae mɨmba reta jëogüegüe güi vae, toputuka jemimonde jare tikɨa topɨta Tumpa jóvai pɨ̈tu regua.

26Opaete mɨmba ipɨ̈sa vae, ërei mbaetɨ ipɨ̈sa jakambɨ vae, ani mbaetɨ jembíu omboyevɨ vae, peumbae vaerä toyogüɨreko; jare oipotagüe oyavɨkɨ vae tikɨa topɨta Tumpa jóvai.

27Jare opaete mɨmba irundɨ ipɨ re oguata vae ipöape vae reta, peumbae vaerä toyogüɨreko, jare oipotagüe oyavɨkɨ jëogüegüe vae tikɨa topɨta Tumpa jóvai pɨ̈tu regua.

28Jare güɨraja jókuae jëogüegüe vae, toputuka jemimonde reta jare tikɨa topɨta Tumpa jóvai pɨ̈tu regua, jare peumbae vaerä toyogüɨreko.

29Opaete mɨmba reta güi kuae ɨvɨ re ipɨtía re oguata vae reta, peumbae vaerä toyogüɨreko kuae reta: Guaki, anguya, jare pïte ambuaeyee ye vae,

30küi, päicha, teyu guasu, teyuovɨ, teyu yagua.

31Opaete mɨmba reta güi, jókuae reta peumbae vaerä toyogüɨreko. Jare oipotagüe oyavɨkɨ jëogüegüe vae tikɨa topɨta Tumpa jóvai pɨ̈tu regua.

32Jare kuae reta jëogüegüe oa yave mbaembae reta re, tikɨa topɨta Tumpa jóvai. Mbae ɨvɨra pegua, temimonde, mɨmbapire, urupuku, oipotagüe tembiporu mbaravɨkɨ pegua, toñeñono ɨ pe jare tikɨa topɨta Tumpa jóvai pɨ̈tu regua; jare jaɨkue rupi topɨta ikɨambae.

33Oipotagüe kuae mɨmba reta jëogüegüe oa yave ɨvɨyapepo pe, tikɨa topɨta Tumpa jóvai, jökorai vi opaete pɨpegua, jare toyeyoka jókuae ɨvɨyapepo.

34Opaete tembíu oyeu vae re oyepɨyere yave ɨ jókuae ɨrɨru pegua, tikɨa topɨta Tumpa jóvai, jare opaete pɨpegua, tikɨa topɨta Tumpa jóvai.

35Oipotagüe mbaembae re oa kuae mɨmba reta jëogüegüe yave, tikɨa topɨta Tumpa jóvai; horno ani tata jenda pe oa yave toyemboai, echa ikɨa ko Tumpa jóvai, jökorai pemae jese.

36Ërei ngatu ɨesaɨ ani ɨrɨru ɨ oñerenoe chugüi vae mbaetɨta ikɨa. Ërei mɨmba jëogüegüe güɨnoe vae, tikɨa topɨta Tumpa jóvai.

37Jare oime yave kuae mɨmba reta jëogüegüe oa mbae jäɨ oñeotɨta vae re, mbaetɨta ikɨa;

38ërei mbae jäɨ oñeotɨta vae oyemboruru oï vae re oa yave kuae mbae jëogüegüe, tikɨa topɨta Tumpa jóvai.

39Mɨmba oyeu vae omano pegüi vae jëogüegüe oyavɨkɨ vae, tikɨa topɨta Tumpa jóvai pɨ̈tu regua;

40jare jókuae mɨmba jëogüegüe isoo jou vae, toputuka jemimonde jare tikɨa topɨta Tumpa jóvai pɨ̈tu regua; jaeramiño vi jókuae mɨmba jëogüegüe güɨraja iyeupe vae, toputuka jemimonde jare tikɨa topɨta Tumpa jóvai pɨ̈tu regua.

41Jare opaete ipɨtía re oguata ɨvɨ re vae reta agüɨye peu, oporomboyuguaru vae ko.

42Opaete ipɨtía re oguata ɨvɨ re vae, jare irundɨ ipɨ re ani jeta ipɨ re oguata ɨvɨ re vae, peumbae vaerä toyogüɨreko, echa oporomboyuguaru vae ko.

43Agüɨye peñereröɨrouka kuae mɨmba ipɨtía re oguata vae reta rupi, agüɨye peñererokomegua pɨpe, agüɨye peyemongɨa Tumpa jóvai pɨpe.

44Echa che ko jae peYa Tumpa; jáeramo peñeñono tee jare peiko tee mbaeyoa güi, echa che ko iyoambae. Jáeramo agüɨye peyemongɨa kuae mɨmba reta ipɨtía re oguata vae rupi.

45Echa che ko jae peYa pogüɨnoeuka ɨvɨ Egipto güi vae, aiko vaerä peTumparä. Jáeramo peiko tee mbaeyoa güi, echa che ko iyoambae.’

46Jae kuae mborookuai mɨmba reta regua, güɨra reta regua, jare opaete oikove ɨ rupigua vae regua, jare ɨvɨ iárambo rupi vae regua.

47Peikuaa vaerä mɨmba ikɨa vae mɨmba ikɨambae güi jare mɨmba reta ipuere oyeu vae ani oyeumbae vae.”