JOB 40 - Guarani Bible with DC

1Jayave yandeYa jei ye Job pe:

2¿Ipuereta ra oyoaka Imbaepuere yae ete vae ndive vae?

Oyoaka Tumpa ndive vae, toikuaa kuae.

3Jayave Job jei yandeYa pe:

Job:

4Mase, che mbaeä etei ko nderóvai,

¿mbae pa jaeta ndeve?

5Jeta yae ma chemiari ndeve,

mbaetɨ ma cheñee amboyoapɨ ye vaerä.

Tumpa imbaepuere omboyekuaa

6YandeYa ombou iñee Job pe kusumirou mbɨte güi, jei:

7Eyeumbɨkua kavi añave kuimbae rami,

aparanduta ndeve jare nde emboyevɨ cheve.

8¿Mbaetɨ vi pa nde rembojupi cheporojäa,

reipota chemboeko, repɨta vaerä jekombae?

9¿Nepɨ̈rata yae yera chegüi?

¿Neñee täta yae yera cheñee güi?

10Jayave eyemonde mburuvicha rami,

yemboetea ikavi vae pe eñeova.

11Emae opaete ipɨayemboete vae reta re,

ndearasɨ ikotɨ reta jare emomichi reta.

12Emae ipɨayemboete vae reta re, toiko rerea re,

eyakambɨ iyoa vae reta ñogüɨnoia rupi.

13Opa eñotɨ reta ɨvɨkúi pe,

eyokenda reta omanogüe vae reta ñogüɨnoia pe.

14Jayave che etei tarovia vi,

ndembaepuere rupi ko reporomoamɨri vae.

15Mase, emae mbaeporou Behemot re,

che ayapogüe ko, nde roapo rami,

ñana jou, güeye reta rami;

16emae ikupe re jëguambae yae,

opaete jete ipɨ̈rata yae.

17Juguai omopɨ̈rata metei ɨ̈vɨrare rami,

iurayɨ oyoasaiño.

18Ikägüe reta täta, jiero iyu vae rami,

ikägüe raɨ raɨ jiero rami.

19Jae ko cherembiapo kavi,

jaeño che iyapoa chepuere amoamɨri.

20Ɨvɨtɨ guasu reta omoñemuña ñana reta jembiurä,

mɨmba pochɨ vae reta ñogüɨnoia rupi.

21Oputuu küaraɨa reta rupi,

oñemi täkuaree-rupa tëɨa rupi ɨvɨ yasurúa rupi.

22Ɨvɨra reta iküaraɨa tëɨ vae oñova iküaraɨa pe,

ɨvɨra sause jee vae ɨ jembeɨ rupigua reta, oyere jese.

23Ɨ tuicha yave, jae mbaetɨ okɨɨye,

yepe tëi opaete ɨ ɨ̈aka Jordán pegua oupitɨ iñäpɨgua,

jae mbaetɨ oyemoambeko.

24¿Kia pa ipuereta oipɨɨ, omae oï yave,

jare omombu iñäpua?