1CheYa Tumpa, chereroasayepe vae,
ara rupi jare pɨ̈tu rupi ayerure ndeve.
2¡Tojo toväe cheyerure reïa pe!
¡Emboɨke ndeapɨsa eendu cheyerure!
3Chembogüérai yae ma ikavimbae reta ou cheré vae,
amanota ete ma;
4¡amano etei ma rami aï,
echa chepuere veä ma!
5Chereeya ma omanogüe reta ipɨte pe,
ñeraro pe omanogüe reta tɨvɨa pe ma ñogüɨnoi vae rami;
jókuae mbaetɨ ma nemaendúa jare reyangareko jese vae.
6Chemondo ɨvɨkua guasu pe,
pɨtumimbi yaea jugua pe.
7Opaetei ndearasɨ reitɨ cheré,
¡cheäka pɨpɨ yeyé ɨvɨkua pe!
8Chevɨa-ïru reta rembosɨrɨ chegüi;
cheñono oyuguaru reta chegüi vaerä.
¡Ayeokenda rami aï, mbaetɨ chepuere aë!
9Cheresa mbaerasɨ ayaeo mbatee güi.
¡Ara ñavo ayerure ndeve, cheYa Tumpa,
chepo reta amopüa reve ndekotɨ!
10¿Reechaukata pa mɨakañɨ omanogüe reta pe?
¿Opüa yeta ra omanogüe reta ndemboete?
11¿Tɨvɨa pe oñemoërakuata ra ndeporoparareko,
ani neñee jókuae omanogüe reta ñogüɨnoia pe?
12Jókuae omanogüe reta ñogüɨnoia pe, mbaetɨ kia imaenduaa pe,
¿oime ra kia ipuere oikuaa ndembaejupi jare mɨakañɨ reta?
13CheYa Tumpa, ërei che ayerure chepɨatɨtɨ reve ndeve;
ndeimbove yave ayerure ndeve.
14¿Maera pa chereröɨro, cheYa Tumpa?
¿Maera pa chereeya?
15Chetaɨrusu güive chepɨatɨtɨ jare aiporara yae,
aiporara kɨɨye reta rembou cheré vae, mbaetɨ ma chepuere.
16Reitɨ cheré ndearasɨ reta,
kɨɨye reta rembou cheré vae chemoamɨri;
17oyere avei cheré ɨporu rami,
opaetei cheöva reta.
18Rembosɨrɨ chegüi chevɨa-ïru jare cheïru reta,
añave cheïrurä reñono pɨtumimbi.
Who We AreWhat We EelieveWhat We Do
2025 by iamachristian.org,Inc All rights reserved.
