1CheYa, agüɨye eñeengata cheve ndearasɨ reve,
agüɨye chenupa ndearasɨ yae reve.
2Echa nderuvɨ reta cheɨ̈vo,
¡ndepo reitɨ cheré!
3Chemombaerasɨ ndearasɨ,
opaete cherete remombaerasi,
¡opaetei chekägüe imbaerasɨ, cheyoa jeko pegua!
4Echa jupimbae ayapogüe reta aiporara;
ipoɨ yae vae rami,
mbaetɨ chepuere aropɨa.
5Ipeu jare iine ma chepere reta;
mbaetɨ chearakuaa jeko pegua chepere.
6Cheäkatindɨ aguata opaete ara,
chepɨatɨtɨ yae jare añemomichiuka.
7Echa cherete jaku yae cheve,
¡opaetei cherete imbaerasɨ!
8Opaetei cherete jasɨ,
mbaetɨ etei chepɨ̈rata,
ayandu chepɨa pe etei chemoäse.
9CheYa, nde reikuaa opaete aipota vae,
¡chepɨayekɨi reta nde reikuaa katu!
10Chepɨatɨtɨ yae aï,
chepuere veä ma,
¡jäve ma amae!
11Chevɨa-ïru jare cherëtara reta,
opa chereeya chepere reta jeko pegua,
cheɨvɨrigua reta opa chereeya.
12Oipota cheyuka vae reta,
oñono cheraperä pe ñuai,
oipota maratu cheapo vae reta imiari kaviä chekotɨ;
chemomburu reta opaete ara rupi.
13Ërei che ayeapo iyapɨsambae rami, mbaetɨ aendu,
iñeembae rami, mbaetɨ cheñee amoë.
14Aiko iyapɨsambae rami,
mbaetɨ amoë cheñee ayeepɨ vaerä.
15Echa ndereño ayeko cheYa Tumpa,
nde reikuaata mbae reyapo vaerä chupe reta cheYa Tumpa.
16Agüɨye tacheyóyai yóyai reta,
cheamɨri yave, agüɨye toyembotuicha reta.
17Ërei che agüɨapita ete ma,
mbae jasɨ reta mbaetɨ etei chereeya.
18Jáeramo amombeuta ikavimbae ayapo vae,
ayembopɨatɨtɨta cheyoa re.
19Echa cherovaicho reta jeta oñemoïru,
jeta yae chemotareɨ jupimbae reve vae reta.
20Omboekovia reta cheve ikavi ayapo vae ikavimbae pe,
oñemopüa chekotɨ reta, ikavi vae ayapo vae jeko pegua.
21CheYa Tumpa, ¡agüɨye chereeya!
CheRu Tumpa, agüɨye esɨrɨ chegüi.
22CheYa Tumpa, chereroasayepe vae,
jarembae voi eyu chemborɨ.
Who We AreWhat We EelieveWhat We Do
2025 by iamachristian.org,Inc All rights reserved.
