ECLESIÁSTICO 6 - Guarani Bible with DC

1Ñochëi ko nde yave, agüɨye ye eyemboyovaicho.

Echa ndemboete potaä vae jare nerërakua pɨ̈chɨita;

jökorai ko kuimbae pochɨ vae jare jupimbae.

2Agüɨye ekua ndepɨapotaa rupi,

agüɨye vaerä nepɨ̈rata opa ndegüi metei guaka kuimbae rami.

3Mbae reipotarai vae omokañɨteita neräka joogüe,

oekɨraita ndeagüe reta

jare ndereeyata ɨvɨra yɨpigüe rami.

4Echa mbaepotarai kia güɨnoi vae omokañɨteita

jare tovaicho reta opukata jese.

Ñochëi añetegüe vae

5Miari ikavigüe omoata ko jeta ñochëi reta,

jare kia iñee roaɨu yae vae opaete ko omboete vae.

6Jeta toiko nechëi reta,

ërei nechëi ete vae jaeño metei jeta vae ipɨte pe.

7Reväe metei nechëi yave, emae räri jese;

agüɨye erovia voi mbatee jese.

8Echa amogüe reta oñochëi ko jae jei yave,

ërei ngaraa rei jae reta ndive oata reta ndeve yave.

9Oime ko ñochëi oyeapo tovaichorä vae

jare nemopɨ̈chɨita neñoraro re imiari vae pe.

10Amogüe ko oyeapo ñochëi oyekaruta ma yave,

ërei ikaviä reiko yave ngaraa reväe chupe.

11Ërei ikavi reiko ramboeve, oikota nde ndive nepoäpe oiko soo re rami;

ërei ikaviä ma reiko yave, ndereeya retata ko.

12Oime mbae pɨ̈chɨi vae reasa yave, oyovaicho retata ndekotɨ

jare oñemi retata ndegüi.

13Eñemoata nderovaicho reta güi

jare eyeandu nechëi reta güi.

14Metei ñochëi añetegüe vae yeopiaka tätagüe ko;

kia ñavo oväe vae metei mbaeyekou ko oväe chupe.

15Metei ñochëi ikavigüe ngaraa ñaenɨi mbovɨ jepɨ vae;

jae jepɨ ngaraa oyemboepɨ korepoti pe.

16Metei ñochëi ikavigüe oporoopia ko oime mbae iä iyeopiaka rami;

kia ñavo Tumpa omboete vae oväeta chupe.

17Ñochëi oyea ko metei rami,

jare iparavɨkɨ oyovake ko iñemoërakua ndive.

Arakuaa oasa ete ikavigüe

18Cheraɨ, ndetaɨrusu güive eeka yemboe,

jare ndendechi yave jekuaeñota renoi arakuaa.

19Eya ikotɨ kia ɨvɨ oai vae jare ombaepoota rami

oäro reve mbaarɨvo ikavigüe vae.

Oyangareko jese yave güɨnoita mbovɨño tembiapo

jare järea jouta iagüe reta.

20Oyemboe mbae ngaraa oupitɨ arakuaa;

jare yarakuaambae ngaraa jösa chupe.

21Chupegua metei ita ipoɨ rami ko,

jare järea ko omombota matɨ iyeugüi.

22Yemboe, jókuae jee oero rami,

mbaetɨ ko jeta pe oyeechauka.

23Eyeapɨsaka, cheraɨ, jare eipɨɨ cheporomboe;

agüɨye eröɨro cheporomboarakuaa.

24Eipɨɨ arakuaa mbae oporopɨɨ vae rami ndepɨ peguarä

jare tembiporu ɨvɨra rami ndeayu reguarä.

25Eipɨɨ metei voɨta rami ndekupe re,

jare agüɨye eröɨro iporoyokua.

26Eyemboya ikotɨ opaete ndepɨa reve,

jare emomoe jape opaete nepɨ̈rata reve.

27Eiko jaɨkue, eeka jare reväeta ko;

renoi ma yave, ani mo epoi chugüi.

28Iyapɨ pe jae ko ndemombutuuta,

jare oikota ko ndeyeroviakarä.

29Iporopɨɨ oikota ndeyeopiakarä,

jare iporookuai, nepörangarä ikavigüe vae.

30Tembiporu ɨvɨra pegua neäka reguarä oro pegua,

jare imbaeyokuaa, tembiapo moropɨ̈ta vae.

31Omondeukata ndeve temimonde ipöra vae rami,

jare reñemopörata pɨpe metei äka-regua ikavigüe vae rami.

32Reipota yave, cheraɨ michi, ndearakuaa katuta,

jare ndepokose yave, opaeteita reikuaa.

33Jare reipota reyeapɨsaka yave, reikatuta;

reñemokïrii kavi yave, ndemboikatuta.

34Eyea ndechi reta ndive oyemboatɨ yave,

reecha metei iyarakuaa katu vae yave, eï jae ndive.

35Eendu kavi opaete oyemombeu vae,

jare agüɨye emondo yepe ñee reta ikavigüe.

36Emae ngatu kia güɨnoi mbɨarakuaa vae re; ekua järea eeka,

jare ekuañoi jëta pe.

37Eyemongeta remboete vaerä Tumpa,

jare ndepɨa pe eyemongetañoi oporookuai re;

jae omeeta ndepɨarakuaa vaerä

jare arakuaa reipota vae.