JUDIT 16 - Guarani Bible with DC

1“¡Peyemongoi cheTumpa pe temimbɨ reta pe,

yemongoi yandeYa pe platillo ndive,

pemee chupe metei yemongoi mbaemboete pegua,

mbaemboete jare peenɨi jae jee!

2YandeYa jae ko Tumpa ombopaa tekorai reta vae;

jae ko chemboasayepe chemoña vae reta güi,

jare chereru jëta ipo reta jeyupa pe.

3Yogüeru Asiriaɨgua reta ɨvɨtɨ oï ɨvɨtuguasu kotɨ güi vae güi,

yogüeru ko mil rupi sundaro reta vae ndive,

opaetei ko ɨvɨtɨ päu omboiyave reta

jare ikavayu reta pe opa vi ɨ̈vɨa omotɨnɨe reta.

4Oipota cheɨvɨ opa opa ɨ reta,

jare oipota Chekunumi reta opa oyuka ikɨsepuku pe,

jare oipota Chemichia ndeigüe reta güɨrokua ɨvɨ re,

jare oipota güɨraja tembipɨɨ ra ndeigüe reta

jare tembiokuai ra kuñatai taɨrusu vae reta.

5Ërei yandeYa imbaepuere vae opa güɨrokomegua

metei kuña rupi.

6Jeieimbae vae güɨnoi vae mbaetɨ oa kunumi reta ipo pe,

jare tuichagüe reta ave omoamɨri,

jare kuimbae jarusu vae reta ave vi mbaetɨ oa iárambo;

¡Judit, Merarí tayɨ,

omoamɨri ipöra vae pe!

7Omboi jemimonde jüu vae,

oñono jova re yembopichea,

güɨroasayepe vaerä Israel tembiporara güi.

8Oñono iñäka re äka-regua ipöra vae

jare omonde temimonde ikavigüe vae ombotavɨ vaerä.

9Ipɨapaa oesambotavɨ,

jare ipöra vae pe oiäpɨɨ

jare kɨsepuku oasa iyayu rupi.

10Jare Persiaɨgua reta opa oyemondɨi oecha oyeapogüe yave,

jare medo pegua reta opa orɨrɨi oecha ikuimbae yae vae yave.

11Jayave cherëtaɨgua oiporara yogüɨreko vae reta ɨvate jäse reta,

jare tovaicho reta opa okɨɨye;

osapúkai cherëtaɨgua ipɨtu vae reta, jare jae reta opa oñeiämondo;

osapúkai reta, jare jae reta opa osɨi.

12Oasavuku michia ipɨtu vae rami,

jare oyapicha reta tembipɨɨ oñemi vae rami;

¡cheYa, isundaro reta ko opa omokañɨtei reta!

13Ayemongoita cheTumpa pe yemongoi ipɨau vae pe:

¡CheYa, ndeko jae tuicha vae jare imbaepuere vae,

reyapo mɨakañɨ ndembaepuere jëia vae pe vae!

14Toyeokuai ndeve opaete reyapo vae reta;

nde remomiari, jare omboɨpɨ oiko reta,

rembou chupe reta nepɨ̈túe, jare oyeapo reta,

mbaetɨ etei ko kia omomara reta neñee.

15Ɨvɨtɨ reta opa okana iyɨpɨ reve,

jare opa oyea ɨguasu ndive,

ita reta opa tɨkui nderóvai iraitɨ rami;

ërei jókuae ndemboete vae reta pe

reechauka ndepɨakavi.

16Mbovɨ yae ko mbota ipiche katu vae reta,

jare michi ko opaete mbaekɨra oyeapɨ mɨmba oyeyukaa pe vae;

ërei cheYa omboete vae reta tuicha aveita ko oiko.

17¡Jasɨ katu ko tëta guasu reta cherëta omomburu vae reta vae:

yandeYa imbaepuere vae ko oinupata kuri morojäa iara pe;

oitɨta ko tata pe jare taso reta pe,

jare oyaeo retata yogüɨreko opaete ara rupi!”

Kuae pe opa miari

18Ou Jerusalén pe oväe yave, omboete reta Tumpa, jare opa ma oyeapo kavi reta yave, oyuka reta mɨmba oapɨ, omee reta mbota ipɨakatu reve.

19Jare Judit güɨrökuavee Tumpa pe opaete Holofernes imbaembaegüe reta, tëta ipo reta omee chupegüe vae, jaeramiño vi tupa güi jae güerugüe vae.

20Mboapɨ yasɨ rupi, tëta ipo reta oyapo yogüɨreko arete Jerusalén pe, tupao jóvai, jare Judit opɨta jae reta ndive.

21Opa jókuae yave, metei tëi ñavo yogüɨraja ye iɨvɨ pe, jare Judit ou ye Betulia pe oyangareko vaerä imbaembae reta re. Jae oiko oiko ramboeve, opaete rupi jërakua.

22Jeta kuimbae reta imendase jae ndive vae, ërei ime Manasés omano güire jae ojo oñoväe vaerä itenondegua reta ndive, jae mbaetɨ ye mbae oyapo kia kuimbae ndive.

23Jaema jeiete jërakua ojo oipota rupi; oiko oiko ime amɨri jëta pe itɨ̈aro regua jare ojo oupitɨ ciento cinco año. Oyora vi jembiokuai. Jaema jae omano Betulia pe, jare oñeotɨ ime Manasés oñeotɨa pe, ita oyeyoogüe pe.

24Israel-ɨgua reta oäpiro chiu ara rupi. Jare ndei omano mbove, imbaembae reta opa omboyao yao ime Manasés jëtara reta pe jare jae jëtara reta pe.

25Jare Judit oiko ramboeve, jare ɨme omano jaɨkue rupi, mbaetɨ ye kia omomburu Israel-ɨgua reta.