1CheYa Tumpa, nderé ko añepɨ̈ro;
¡agüɨye etei tañemomaraiuka!
2¡Chemborɨ jare chereepɨ,
echa nde jupi vae ko!
Ndeapɨsa emboɨke chekotɨ jare chereroasayepe.
3Nde eiko avei cheve metei ita guasu rami cheñepɨ̈rokarä,
¡nde reñererökuavee chereroasayepe vaerä!
¡Nde ko jae ita guasu rami cheve vae, jare cheñepɨ̈roa!
4CheRu Tumpa, chereepɨ iyoa vae reta ipo güi,
jókuae oporoyuka jare ipɨarai vae reta güi,
5echa nde, cheYa Tumpa,
jae ko chetaɨrusu güive cheporoäro kavi nderé vae.
6Chesɨ jɨe peve nderé aikove;
¡nde ko remee aa vaerä chesɨ jɨe güi!
¡Ndeve ameeta mbaemboete jekuae avei!
7Mɨakañɨrä aiko jeta vae reta pe,
ërei nde ko jae cheñepɨ̈roa jëguambae.
8Opaete ara cheñee rupi,
toime avei mbaemboete ndeyemboetea regua.
9Agüɨye chereröɨro chendechi ma yave;
agüɨye chereeya mbaetɨ ma chepɨ̈rata yave.
10Echa cherovaicho reta cheré aveiño imiari,
chepïaro vae reta oyomboatɨ oyemongeta cheyuka vaerä.
11Jei reta: “¡Peaɨkuemoña jare peipɨɨ,
echa Tumpa oeya ma, mbaetɨ ma kia oepɨ vaerä!”
12CheRu Tumpa, agüɨye chereeya;
¡eyu jarembae chemborɨ!
13¡Toñemomaraiuka,
tomano oipota cheyuka vae reta!
¡Toñemomarai jare tipɨajopa,
oipota ikavimbae cheve vae reta!
14Ërei che jekuae avei roärota,
jare jeiete romboeteta.
15Amoërakuata ara ñavo reyapogüe jupi ko vae,
jare ara ñavo reporogüɨroasayepe vae;
¡yepe tëi mbaetɨ aikuaa mbovɨ etei ko!
16Aipapata, nde cheYa Tumpa tuichagüe mbaembae reyapogüe;
¡amoërakuata ndeño ko jupi vae!
17CheRu Tumpa,
nde chemboe ko chetaɨrusu güive,
jare añave rupi jekuae amombeu mbae tuichagüe reyapo vae.
18CheRu Tumpa, agüɨye chereeya,
yepe tëi chendechi jare cheatï,
amoërakua regua ndembaepuere kuimbae reta iñemuña pe,
jare taɨkue rupi yogüɨrekota vae reta pe.
19CheRu Tumpa, ndembaejupi oupitɨ ara;
nde reyapo mbae tuicha yae vae reta.
¡Mbaetɨ yé kia nde rami!
20Nde reechauka cheve jeta mbɨatɨtɨ jare ikavimbae reve,
remee yeta cheve tekove;
chemopüa pɨau yeta ɨvɨkua guasu güi.
21Remoïru yeta chembaepuere,
jare chembopɨakatu yeta ko.
22Che romboeteta ngitara ndive,
cheRu Tumpa, atairarita ndeve,
nde añete ko vae arpa ndive,
cheRu Iyoambae Israel pegua.
23Ayerovia yaeta atairari ndeve yave,
che, nde chereroasayepe vae.
24Chemiarita vi ara ñavo ndembaejupi re;
echa oñemomaraiuka jare ipɨajopa,
jókuae oipota ikavimbae cheve vae reta.
Who We AreWhat We EelieveWhat We Do
2025 by iamachristian.org,Inc All rights reserved.
