ISAÍAS 49 - Guarani Bible with DC

YandeYa jembiokuai

1Peyeapɨsaka, tëtaguasu ɨguasu jembeɨ rupigua reta,

tëtaguasu reta mombɨrɨ rupigua reta:

YandeYa chereenɨi ndei aa güive voi ma,

chesɨ jɨe peve voi ma chembojee.

2Kɨsepuku jaimbe vae rami oyapo chekü,

chemoia ipo igüɨ pe,

cheapo uvɨ jakuaroviasɨ vae rami

jare cheñono iuvɨrɨru pe.

3Jare jei cheve: “Israel, nde ko cherembiokuai,

nderé ayemboeteukata.”

4Che ko jae tëi: “Aparavɨkɨ mbateeiño ma,

ayembokangɨ mbateeiño ma.”

Ërei, cheYa ipo pe ko oï cherekove,

jae ko omboekoviata cheve cheparavɨkɨ.

5YandeYa, chesɨ jɨe güive voi ma cheparavo jembiokuairä vae,

amboyerova ye vaerä Tumpa kotɨ Jacob, Israel iñemuña reta,

echa chererovia katu cheYa,

cheTumpa ko jae chepɨ̈rata.

6Jae jei körai:

“Mbaetɨta royókuai, remopüa ye

Jacob iñemuña reta vaeräño,

Israel iñemuña jembɨregüe reta;

roñono vi ko tembipe rami opaete tëtaguasu reta peguarä,

reraja vaerä yereroasayepe amee vae opaete vae reta pe,

ɨvɨ jembeɨ rupi ave.”

7YandeYa, oPoroepɨ vae,

Tumpa Iyoambae Israel pegua,

jei oñemotareɨuka ïru tëtaguasu reta pe vae pe,

ipɨarai vae reta jembipɨɨrä oiko vae pe:

“Mburuvicha guasu jare mburuvicha reta ndereecha yave,

opüata jare ndemboeteta;

echa che ndeYa,

Tumpa Iyoambae Israel pegua jupi vae ko, che ko roparavo.”

Tumpa oñererökuavee omopüa ye vaerä Sión

8YandeYa jei:

“Ou ma oväe aechauka vaerä cheporoaɨu, jáeramo ayeapɨsaka nderé,

ou ma oväe yereroasayepe iara, jáeramo romborɨ.

Che ko roñovatu, nderupi ayapo vaerä ñererökuavee päve tëta ndive,

amopüa ye vaerä kuae tëtaguasu,

amee ye vaerä iyagüe reta pe ɨvɨ opa oyemboai oï vae.

9Rere vaerä tembipɨɨ reta ñogüɨnoi vae reta pe: ‘Peë’,

jare pɨtumimbía pe ñogüɨnoi vae reta pe ere:

‘Peyeechauka.’

Tape rupi peväeta kapii,

jare opaete ɨvɨ ipombaea rupi oimeta perɨmba reta jembiurä.

10‘Mbaetɨta peyɨmbɨaɨ ani peɨuve yepe,

araku ani kuaraɨ ave mbaetɨta peaporai,

echa che poaɨu jare che ko pogüɨroatata,

pogüɨrajata ɨesaɨ katuaía rupi.

11Ayapota tape ɨvɨtɨ rupi

jare tape amboipe kavita.’

12Mase, amogüe reta yogüeruta matɨ güi,

amogüe reta yogüeruta ɨvɨtuguasu kotɨ güi,

amogüe reta yogüeruta kuaraɨ oikea kotɨ güi,

amogüe reta yogüeruta ɨvɨ Sinim jee vae kotɨ güi.

13¡Ara ipo reta, petairari reyerovia güi!

¡Ɨvɨ ipo reta, peyerovia yae!

¡Ɨvɨtɨ reta, perɨapu peyerovia reve!

Echa yandeYa ombopɨakatu tëta imbae vae,

oiparareko oiporara yogüɨreko vae reta.

14Ërei tëta guasu Sión pegua jei:

‘CheYa chereeya,

cheYa ñakañɨ chegüi.’

15¿Kuña iñakañɨta ra imembɨ güi,

ani ikueraita ra oaɨu?

Yepe tëi kuña iñakañɨ imembɨ güi,

ërei che ngaraa cheakañɨ ndegüi.

16Mase, chepombɨte re etei ko nderee aikuatía areko,

nekësea re amae avei ko.

17Nemopüa pɨau yeta vae reta, yogüeru yogüɨreko ramboeve,

ndemboai jare nererokomegua vae reta opata ñogüɨnoe yogüɨraja ndegüi.

18Emopüa neäka jare emae ndeɨ́vɨri rupi,

emae, kërai oyemboatɨ opaete kuae yogüeru ndépɨri vae reta.

Che peYa, tae cheyé aeño ndeve,

kërai opaete jókuae yogüeru vae reta pe reñemopörata,

metei kuñatai omenda vae oñemopöra vae rami.

19Ndeɨvɨ opa etei oyemboai oï,

opa oñererokomegua oï jare ipoä opɨta;

ërei añave, ndeɨvɨ ipɨmiita opɨta, jeta yae vae jeko pegua.

Kuae ɨvɨ imboaia reta matɨ ma yogüɨrekota.

20Nemembɨ reta opa tëi ketɨ oyereraja ndegüi vae,

oendukata ndeve:

‘Ipɨmii yae opɨta kuae ɨvɨ,

pemee oreve ɨvɨ roiko pɨpe vaerä.’

21Jare nde rereta ndepɨa pe:

‘¿Kia ra omee kuae reta chemembɨrä?

Echa chemembɨmbae ko apɨta,

cheño etei ko aiko yepi;

aiko yepi mombɨrɨ ɨvɨ ambuae pe.

¿Kia ra ombokuakuaa kuae reta?

Cheño etei ko apɨta,

¿ketɨ güi ra yogüeru kuae reta?’ ”

22YandeYa jei:

“Ayokuaita opaete vae tëtaguasu reta,

güeru reta vaerä iyɨva re nemembɨ reta,

jare nememɨkuña reta iyatiɨ re.

23Mburuvicha guasu reta ñogüɨnoita ndeangareko vaerä,

jare tayɨ reta ñogüɨnoita oyangareko vaerä nemichia reta re.

Oyetavatɨka retata nderóvai ɨvɨ re ndemboete,

jare ndepɨ oipɨte retata.

Jare chekuaata che ko jae peYa vae,

jare kërai cheré güɨrovia vae reta ngaraa oñemomaraiuka.”

24¿Ipuereta ra kia opɨ̈ro sundaro jëia vae güi, jókuae mbae ñeraroa güi güerugüe?

Ani ¿ipuereta ra tembipɨɨ reta otekuarai mburuvicha jëia yae vae güi?

25Ërei yandeYa jei körai:

“Ipuere ko, sundaro jëia vae güi oñepɨ̈ro mbae ñeraroa güi güerugüe,

ipuere ko, tembipɨɨ otekuarai mburuvicha jëia vae güi.

Che tañemoë, oñeapo nderé vae reta kotɨ,

che etei aroasayepeta nemembɨ reta.

26Nderovaicho reta pe jauukata isoo aeño,

jare jugüɨ ae pe oyembosavaɨpo reta vino pe rami.

Jökorai opaete vae toikuaa,

che ndeYa, ndereroasayepe jare ndeReepɨ vae,

jae ko Imbaepuere yae ete vae Jacob pe.”