1Jókuae ara rupi, Antíoco ojo rai rai Persia güi,
2echa oike tëta Persépolis pe yave, ikɨ̈reɨ tëi oñomi mbaembae reta tupao pegua jare oyemboiya jókuae tëta re. Ërei jokuaeɨgua reta opüa jese, jare Antíoco, iñamɨri joko pe, jáeramo imara pɨpei, ojo joko güi.
3Tëta Ecbatana pe ma oï yave, imaendúa, tenonde ma jërakua chupe Nicanor jare Timoteo isundaro reta pe oasa vae.
4Iyarasɨ pɨpei, oyemongeta oyepɨ vaerä judío reta re, persiaɨgua reta omomaraiuka vae re. Jáeramo oyókuai käretou jeroataa reta pe agüɨye vaerä oputuu ojo oväe regua.
Ërei Tumpa iyarasɨ mbaetɨ osɨrɨ chugüi, Antíoco iñee kuimbae reve jei: “Aja yave aväe Jerusalén pe, judío reta jëogüe rendarä ayapota jókuae tëta.”
5Ërei yandeYa, Israel iTumpa, opaete vae oecha vaerä, oiporarauka chupe metei mbaerasɨ oyekuaambae vae jare yakuerambae chugüi vae pe. Opamí ojäa kuae ñee yave, oyeapo tɨerasɨ tuicha yae vae chupe jare oɨepoka yavaete katu rupi.
6Körai omboepɨ, jeta rupi oiporarauka japicha pe vae, echa ko jae imbaeyuvanga vi japicha jɨe re.
7Yepe tëi ma jókuae oasa chupe, Antíoco jekuae avei oyembotuicha; iyaguara jare iyarasɨ reve judío reta kotɨ, omoani iguataka. Ërei oa iguataka güi, echa ko täta yae ete ma osɨi, jare ɨvate güi yae oa ramo opa ikägüe oakɨo kɨo.
8Jökorai ko, yei ramo iyembotuichagüe yaupitɨ rapembae oï vae, iyemongeta pe ɨguasu reta pe ave ipuere ñee omee vae, jare ikɨ̈reɨ Tumpa rami ojäa ɨvɨtɨ reta vae, añave ogüɨapi jare ovoɨ reta ma güɨraja jupa pe, kuae rupi oecha opaete vae Tumpa imbaepuere.
9Kuae ipɨapochɨ vae jesakua pe ogüɨri yeti ko taso, jare jekove reveño täta oiporara, echa isoo osururuiño ma chugüi; jete omboɨpɨ ichuumbi, jare mombɨrɨ peve otimbo ma, jáeramo isundaro reta oyuguaru chugüi.
10Oasa ete yeyé iine, yei ramo ara re ikɨ̈reɨ opoko vae, añave ko mbaetɨ ma kia ikɨ̈reɨ güɨroata.
11Jökorai yave, jete imbaerasɨ reve Tumpa oyepɨ oï jese jasɨ katu reve ramo, omboɨpɨ tenondegua yembotuicha güi oyepɨtaso, jare omboɨpɨ oyemongeta,
12jare jae etei ma mbaetɨ ipɨa guasu oñeëtu yave, jei: “Yayemboya tai yepe Tumpa kotɨ, ngaraaí yepe yayovake jae ndive.”
13Jayave kuae oporoyuka vae omboɨpɨ oyerure yandeYa kotɨ; ërei Tumpa mbaetɨ ma iporopareko jese.
14Ndei ave ko ɨma ikɨ̈reɨ ojo rai rai tëta maraëɨ kotɨ, opavusu vaerä jese jare oeya vaerä tëogüe rendarä, añave oñererökuavee Tumpa pe ngaraa ye ma oñátai vaerä,
15judío reta mbaetɨ ko ikavi oñeotɨ vaerä, güɨra reta jembiuräño ko ikavi ani ramo mɨmba pochɨ vae reta pe oyemombo vaerä imichia reta ndive. Ërei añave ko oñererökuavee ma omae vaerä jese reta oyovake Atenas-ɨgua reta ndive.
16Tenonde yave imonda ma tupao ikɨambae pe, ërei añave oñeñono omopöra vaerä ikavi, jare omboyevɨ ye vaerä tembiporu mbaemboetea pegua reta, omoïru yetita, jare ikorepoti pe omboepɨta opaete mbaeyuka reta.
17Jae etei vi oyeapota judiorä jare oguatata opaete tëta rupi omoërakua tumpa imbaepuere.
18Jete mbaetɨ ipiroɨ chugüi kërai yepe, echa ko Tumpa iyarasɨ oa jese, oyeecha ma yave jeiete, oikuatía judío reta pe tupapire ombaeporu reve körai:
19“Mburuvicha guasu jare isundaro ruvicha Antíoco omondo tamaraeme judío reta pe, tëta ipo jeko kavi vae reta, toiko pe ndive tekove katu jare teko kavi tuicha.
20Ikavi vae toiko pe jare peraɨ reta ndive jare opaete mbae toyeapo pepɨa potaa rupi. Tumpa kotɨ ayeko reve,
21chemaendúa avei peporomboete jare peporoaɨu chekotɨ vae re. Persia kotɨ ayerova ye yave chembaerasɨ tuicha, jáeramo añave aipotaä metei ave kia oikoasɨ.
22Mbaetɨ ko che chepɨatɨtɨ aï cheɨvɨ re; jökoraiä ko, che aipotaecha akuera kuae mbaerasɨ güi,
23ërei ngatu, chemaendúa cherugüe oë yave oguata iyemongeta omombeu, ɨ̈aka Éufrates oïa rupi, jaema voi oeya kia jekovia pe,
24echa jayave, mbae oasa jae ndive yave, agüɨye vaerä jëtaɨgua reta oyemoambeko, echa oikuaa ma kia ko opɨta jekovia pe.
25Aikuaa vi aï, tuvicha yandeɨpɨ rupigua reta oäro ñogüɨnoi mbae oasa vaerä cheve. Jáeramo ambojee mburuvicha guasurä cheraɨ Antíoco, echa mbovɨ ye ma, aguata yave Éufrates güi kuaraɨ oëa kotɨ rupi, aeya jae peangarekoarä. Chupe aikuatía tupapire, kutɨ katu aikuatía ye pɨauta peve vae.
26Jáeramo, aiporu yeyé peve metei ñavo, pemaendúa reve teko kavi, tuicha ani michi vae yepe, ayapo pekotɨ vae re, jökoraiño vi pepɨakatu cheraɨ kotɨ.
27Ngaraa ko jae opia chepɨa guasu jare chepɨakavi aechauka chupe vae güi jare toiko peñemuña rami.”
28Jökorai ko, kuae oporoyukase vae, Tumpa oyangaose vae, omanoasɨ katu, jae oiporaraukase ïru reta pe rami.
29Ichëi Filipo, güɨraja jëogüegüe, ërei mbaetɨ nunga oyeko taɨgüe Antíoco re ramo, oñepɨ̈ro Egipto pe, mburuvicha guasu Filométor pɨri.
Who We AreWhat We EelieveWhat We Do
2025 by iamachristian.org,Inc All rights reserved.
