ISAÍAS 52 - Guarani Bible with DC

Tumpa oyorata Sión tembipɨɨ güi

1Epüa Sión, eñemomɨ̈rata,

Jerusalén, tëta guasu oñeñono tee vae,

eyemonde nderemimonde ipöragüe pe,

echa ngaraa ye ma ou ndekotɨ itumpa-raanga pota vae reta,

ani ikɨa Tumpa jesa róvai vae reta.

2Jerusalén, emotumo ɨvɨ ndeyeugüi,

epüa eguapɨ.

Eyora ndeayu iñapɨtía,

nde Sión, tembipɨɨrä reï vae.

3YandeYa jei körai:

“Reñemeeukaiño jepɨmbae,

jökorai pogua yeta jepɨmbae.

4Echa tenonde yave, tëta chembae vae ojo Egipto pe,

oiko vaerä joko pe;

jaɨkue rupi Asiriaɨgua reta oiporaraukaiño chupe reta jupimbae reve.

5Añave, ¿mbae ra ayapota?

Opa güɨraja reta tëta chembae vae, jupimbae reve.

Jókuae jerajaa reta oiporarauka avei chupe reta,

omoäse avei reta.

Cheangao avei reta.

6Ërei kuae jeko pegua, tëta chembae vae,

metei ara chekuaa kavita;

echa añave che etei chemiari aï vae, aïta joko pe.”

7¡Ipöra yae ko ɨvɨtɨ reta re oyekuaa ou,

ñee ikavigüe yerovia pegua omoërakua vae,

mbɨakatu omoërakua vae,

mbae ipɨau ikavigüe omoërakua vae,

yereroasayepe omoërakua vae,

Sión pe jei vae: “NeTumpa oï mburuvicha guasurä”!

8¡Jare sundaro ɨvate güi omae vae reta isapúkai oyeenduta!

Osapúkai retata, opareve osapúkai retata yerovia katu reve;

echa jae reta etei oechata yandeYa oyerova ye ma Sión kotɨ vae.

9¡Petairari mbaemboete,

peyerovia päve Jerusalén oyemboaigüe;

echa yandeYa ombopɨakatu jëta,

oepɨ ye Jerusalén!

10YandeYa omboyekuaa imbaepuere,

opaete tëtaguasu reta jesa róvai,

jare opaete ɨvɨ iyapɨ rupi ave oendu ñaneTumpa iporogüɨroasayepe re vae.

11¡Pesɨrɨ, pesɨrɨ, peë jókuae Babilonia güi,

agüɨye peyavɨkɨ mbae ikɨa Tumpa jóvai vae,

peë joko güi; peyetɨo yandeYa jembiporu jerajaa reta!

12Echa ngaraa peë rai rai,

jare ngaraa petekuarai;

echa yandeYa ojota perenonde,

Israel iTumpa ko pemboatɨta.

YandeYa jembiokuai imbaeporara

13Mase, cherembiokuai oyekou yaeta ko,

oyembotuichaukata jare jërakua yaeta.

14Jare ipɨakañɨta nderé jeta vae reta,

opaetei oikomegua nderova, kuimbae reta jova güi,

jare nepöra opa okañɨ kuimbae ipɨte güi.

15Jökoraita jae omopɨakañɨ, jeta tëtaguasu reta;

mburuvicha guasu reta ngaraa etei iñee omoë jóvai,

echa oecha retata mbaetɨi kia omombeu chupe vae,

jare oikuaa retata mbaetɨi oendu vae.