JOSUÉ 4 - Guarani Bible with DC

Doce ita oñerenoe ɨ̈aka Jordán güi vae

1Opaete ma ɨ̈aka Jordán oasa vae yave, yandeYa jei Josué pe:

2“Eiparavo opaete vae güi doce kuimbae, ñemuña ñavo güi eiparavo metei kuimbae,

3jare ere chupe reta: ‘Penoe kuae ɨ̈aka Jordán güi doce ita, sacerdote reta oyemboɨ ñogüɨnoia güi jare peraja peñono kuae pɨ̈tu pepɨtataa pe.’ ”

4Jayave Josué oenɨi doce kuimbae, jae oiparavo Israel iñemuña reta güi vae, ñemuña ñavo güi metei kuimbae,

5jare jei chupe reta: “Pekua yandeYa Tumpa ikäjou oïa pe ɨ̈aka Jordán mbɨte pe peväe regua, jare metei ñavo peipɨɨ metei ita peñono peatiɨ re, doce Israel iñemuña reta ñogüɨnoi rami,

6kuae toiko peve ikañɨmaa vaerä; taɨkue rupi peñemuña reta oparandu yave tu reta pe, jei reve: ‘¿Mbae pa ko oipota jei kuae ita reta?’

7Pe pereta chupe reta: ‘Ɨ̈aka Jordán pegua ɨ oyemboyao yandeYa ikäjou morogüɨrökuavee päve pegua jenonde yave. Jókuae käjou oasa ɨ̈aka Jordán yave, pɨpegua ɨ oyemboyao. Kuae ita reta opɨta ko Israel iñemuña reta oyemomaendúa avei vaerä kuae pe oasagüe re.’ ”

8Jare Israel iñemuña reta oyapo jökorai, Josué oyókuai reta rami. Ɨ̈aka Jordán mbɨte güi oupi reta doce ita; metei ñavo ita doce Israel iñemuña reta iñavo, jare güɨraja teyupa pe jare joko pe oñono reta yandeYa jei Josué pe rami.

9Josué omopüa vi doce ita ɨ̈ aka Jordán mbɨte pe, sacerdote reta käjou morogüɨrökuavee päve pegua güɨraja vae reta oyemboɨa jendagüe pe; jare jókuae ita reta oime añave rupi joko pe.

10Ërei sacerdote reta, käjou güɨraja vae reta oyemboɨ ɨ̈ aka Jordán mbɨte pe, Israel iñemuña reta opa oyapo regua yandeYa oyókuai reta Josué rupi vae. Opaete mbaembae oyeapo Moisés oyókuai Josué rami. Jare opaete vae iyandeko oasa ɨ̈ aka Jordán,

11jökorai opaete ma jovaicho kotɨ oasa vae yave, oasa vi sacerdote reta, yandeYa ikäjou güɨraja vae reta, jare opa yogüɨraja oñeñono ye opaete vae jenonde.

12Oasa vi Rubén jare Gad iñemuña reta jare Manasés iñemuña reta oyemboyaogüe. Oasa reta jembiporu ñeraro pegua reve reve, jare yogüɨraja jëtara Israel iñemuña reta jenonde, Moisés jei chupe reta rami.

13Cuarenta mil rupi jókuae kuimbae reta jembiporu ñeraro pegua reve reve, oïndaivi ñeraro peguarä vae yogüɨraja ɨvɨpe kavi Jericó kotɨ yandeYa jenonde.

14Jókuae ara yandeYa ombotuicha Josué opaete Israel iñemuña reta jóvai; jare oipoɨu reta chugüi opaete oikove oiko ramboeve, Moisés güi oipoɨu reta rami.

15YandeYa jei Josué pe:

16“Eyókuai sacerdote reta, käjou yemomaendúa pegua güɨraja vae reta, toñogüɨnoe ɨ̈aka Jordán güi.”

17Jökorai Josué oyókuai sacerdote reta ñogüɨnoe vaerä ɨ̈aka Jordán güi,

18jare sacerdote reta, yandeYa ikäjou morogüɨrökuavee päve pegua güɨraja vae reta ñogüɨnoe ɨ̈aka Jordán güi ɨvɨ otinía pe oyemboɨ ñoete ɨ̈aka Jordán pegua ɨ opa ye oyea, jare oyepɨyere yere etei osɨrɨ ye tenonde rami.

19Israel iñemuña reta oasa ɨ̈aka Jordán ara payandepo tenondegua yasɨ pe, jare oyembojeyupa reta Gilgal pe, Jericó güi kuaraɨ oëa kotɨ.

20Joko pe Josué omopüa doce ita, jókuae ɨ̈aka Jordán güi güeru reta vae,

21jare jei Israel iñemuña reta pe: “Kuri peñemuña reta oparandu yave tu reta pe: ‘¿Mbae pa oipota jei kuae ita reta?’

22Pemiarita chupe reta kërai peasa kuae ɨ̈aka Jordán otini vae rupi.

23Echa yandeYa Tumpa omotini ɨ̈aka Jordán pegua ɨ perenonde güi opa peasa regua, yandeYa Tumpa oyapo íguasu Pɨ̈ta vae pe rami, echa jae omotini orerenonde opa roasa regua.

24Opaete ɨvɨ pegua reta oikuaa vaerä yandeYa imbaepuere, jare pe peipoɨu vaerä yandeYa Tumpa güi opaete ara rupi.”