1 REYES 17 - Guarani Bible with DC

Elías omoërakua mbaetɨta okɨ vae

1Jayave Elías, Tisbe pegua, jae ko ɨvɨ Galaad kotɨgua, jei Acab pe: “¡YandeYa Israel iTumpa, jóvai aï vae jee re, mbaetɨta ama jare mbaetɨta ɨsápɨi ave kuae año reta rupi, che jae yaveño!”

2Jare yandeYa jei chupe:

3“Esɨrɨ kuae güi, jare eyerova ye kuaraɨ oëa kotɨ, jare eñemi ɨ̈aka raɨ Querit pe, Jordán jóvai oï vae pe.

4Jókuae ɨ̈aka raɨ güi reɨuta; jare che ayókuai güɨraü guasu reta omee vaerä joko pe rekaru.”

5Jare jae oyapo yandeYa jei chupe rami; echa ojo jare oiko ɨ̈aka raɨ Querit iyɨ́vɨri Jordán jóvai, kuaraɨ oëa kotɨ.

6Jare chucha reta güeru chupe mbɨyape jare soo ndeimbove yave, jare kaaru yave. Jare ɨ̈aka raɨ güi oɨu.

7Mbovɨ ara ma oasa yave, jókuae ɨ̈aka raɨ opa otini, echa mbaetɨ okɨ jókuae ɨvɨ pe.

Elías jare imemano vae Sarepta pegua

8Jaɨkue rupi yandeYa jei chupe:

9“Epüa jare ekua tëta Sarepta pe ɨvɨ Sidón pe, jare eiko joko pe; ko che ayókuai metei kuña imemano vaeLc 4.25-26. ndeangareko vaerä.”

10Jayave jae opüa jare ojo Sarepta kotɨ. Jare ojo ma oväe tëta guasu jöke pe yave, ko oï metei kuña imemano vae, yepea omonoo oiko; jae oenɨi jare jei chupe:

—Romoñera reru vaerä cheve michi yepe ɨ metei vaso pe jau vaerä.

11Jare ojo güeru vaerä chupe yave, jae oenɨi ye, jare jei chupe:

—Romoñera reru vaerä vi mbɨyape oñepɨ̈saagüe yepe cheve.

12Jare jae jei:

—Añetete ndeYa Tumpa rovake, mbaetɨ anoi mbɨyape; jaeño ete anoi metei poagua pegua trigokúi tinaa pe, jare michi mii asaite jɨru pe; jare añave amonoo ko aiko mbovɨ yepe yepea, ayapo vaerä oreyeupe. Routa jare jaɨkue rupi torerovaruru.

13Elías jei chupe:

—Agüɨye ekɨɨye; ekua jare eyapo nde rere rami; ërei eyapo cheve räri joko güi metei michi mbɨyape tanimbugüɨ pe oyɨ vae, jare eru cheve; jare jaɨkue rupi eyapo ndeyeupe jare nemembɨ peguarä.

14Echa yandeYa Israel iTumpa jei körai: “Trigokúi ngaraa oata tinaa pe jare asaite ave jɨru pe ngaraa jagüe, amongɨ regua ɨvɨ re.”

15Jayave jae ojo oyapo Elías jei chupe rami; jare Elías jare imemano vae jare imembɨ jou yogüɨreko ɨma ara rupi.

16Jare trigokúi mbaetɨ oata tinaa pe jare asaite ave mbaetɨ jagüe jɨru pe, yandeYa jei Elías rupi rami etei.

17Kuae jaɨkue rupi kuña imemano vae imembɨ imbaerasɨ, jare jókuae mbaerasɨ oyaporai yae omano regua.

18Jayave kuña imemano vae jei Elías pe:

—¿Mbae pa che ayapo ndekotɨ kuimbae Tumpa jembiokuai? ¿Reyu pa chemomaendúa cheyoa re jare omano vaerä chemembɨ?

19Elías jei chupe:

—Eru nemembɨ cheve kuae pe.

Jare jae oekɨ kuña imemano vae jäpapau güi güɨraja jo ɨvate güɨnoi vae pe, jare omboyapakua jupa pe.

20Javoi oyerure osapúkai reve, jei: “CheYa Tumpa, kuae kuña imemano vae jo pe aiko vae, ¿remaeñota pa ipɨatɨtɨ, remaeñota omano imembɨ?”

21Jare oyapakua mboapɨ ye michia re, jare oyerure osapúkai reve yandeYa pe, jei: “CheYa Tumpa, ¡romoñera rembou ye vaerä kuae michia jekove chupe!”

22YandeYa oendu Elías iyerure, jare michia jekove ou ye chupe, jare oikove ye.

23Jupiveiño Elías oipɨɨ michia güɨrogüeyɨ ɨ́vɨkotɨ o pe ichɨ oïa pe jare omee chupe, jei reve:

—¡Mase, nemembɨ oikove oï!

24Jare kuña imemano vae jei:

—Añave aikuaa nde añetete jae Tumpa iñeemombeúa jare Tumpa iñee remombeu vae añete vae ko.