SABIDURÍA 19 - Guarani Bible with DC

Ɨguasu Pɨ̈ta vae rupi oasa vae

1Ërei iporoparareko mbae reta täta ko oiporara añetegüe vae,

echa nde reikuaa ma ko tenondeve mbae oyapo reta vae:

2Omaeñota ko ojo vaerä nerëta ipo reta,

jarembae pegua yae yogüɨraja vaerä,

jupivei, iyemongeta oipoepɨta, jare oaɨkuemoñata.

3Jekuaeño temimonde jüu vae omonde ñogüɨnoi reve

jare omano chugüi vae reta jɨvɨa oäpiro ñogüɨnoi reve,

ou chupe reta yemongeta ikavimbae vae

oaɨkuemoña vaerä nerëta ipo reta,

emaeño ko osɨi yogüɨraja chugüi vae rami,

jae reta yepe jei chupe reta opa vaerä yogüɨraja.

4Tembiporara chupegua reta aeño vae

güɨraja reta jokoropi

jare opa omoakañɨ reta mbae oasagüe vae güi;

jókuae ramo, täta oiporara reta

jare oataño opa vaerä ou chupe reta tembiporara reta.

5Jökorai, jaema nerëta ipo reta yogüɨraja yogüɨreko ramboeve,

jae reta ojo ma omano ñogüɨnoi ïkotɨa jëta güi.

6Opaete reyapogüe reta, oyapo neñee jeigüe vae,

opa jeko aeño oyepoepɨ chugüi reta,

agüɨye vaerä nderaɨ reta maratu yogüɨreko.

7Oyekuaa amapɨtu teyupa omoküaraɨa vaerä,

jare tenonde ma ɨ oïa rupi, oï ɨvɨ otinigüe;

Ɨguasu Pɨ̈ta vae pe oyepea metei tape,

jare ɨaparúa tätagüe vae ipäu rupi oyekuaa metei ñuu jovɨü vae.

8Jokoropi oasa opaete nerëta ipo reta, ndepogüɨ rupi,

oecha reta vi mɨakañɨ tuicha vae.

9Kavayu reta jokoropi okaru ñogüɨnoi vae rami,

ochaguarepɨ repɨ reta vecha ndeigüe rami

jare omee reta mbaemboete ndeve, Tumpa, reroasayepe jeko pegua.

10Echa jekuaeñoi imaendúa reta mbae oasa

jókuae tëtaguasu pe oikogüe vae pe:

kërai jókuae ɨvɨ pe, mɨmba oiko vaerägüe,

oï pɨpe ñatíu jeta vae,

jare ɨ, jevae jekovia pe, güɨnoi kururu jeta vae.

11Taɨkue ete oecha reta kërai güɨra reta oyekuaa pɨau vae:

yɨmbɨaɨ opa ma oyaporai yave

oiporu reta iyeupe tembíu tätambae vae,

12jare oë chupe reta inambu jeta vae ɨguasu güi, ipɨa jenda pe ñogüɨnoi vaerä.

Egipto ko ma jeko Sodoma güi

13Tembiporara oa jókuae tëtaguasu imbaeyoa vae pe,

opa ma yave oyemombeu chupe reta ara rɨapu tätagüe vae pe.

Añetete jupi rupi oiporara reta, jeko kavimbae jeko pegua,

echa oechauka reta ñomotareɨ tätagüe vae jokuaeɨguambae reta kotɨ.

14Sodoma ipo reta mbaetɨ omoinge jëta pe

kia oikuaambae ou oväe jëtaguasu pe yave.

Ërei Egiptoɨgua reta ko opa oyapo jembiokuairä

jokuaeɨguambae reta yogüɨreko ípɨri vae.

15Sodoma pegua reta oiporarauka iyeupe

oyapo ramo ketɨgua reta ou joko pe vae jovaichorä.

16Ërei Egiptoɨgua reta ko, Israel-ɨgua reta omaeño yogüeru kavi joko pe yave,

jaema ko jae reta rami ma yogüɨreko opaete yave,

opoko ma oyuvanga jese reta oyapouka chupe reta mbaravɨkɨ ipoɨgüe vae.

17Jókuae jeko pegua ko opa jesaä opɨta reta,

Sodoma pegua reta rami Lot jöke pe, kuimbae jupigüe vae;

opa opɨta reta pɨtumimbi tätagüe vae pe

jare metei ñavo opovɨvɨgüeño jöke re oike vaerä jo pe.

Ɨvɨ ipo reta opa oyepoepɨ vae

18Ɨvɨ ipo reta opa oyepoepɨ yave,

jae ko metei tembiporu iïcha vae pe vae,

ipugüe vae ipuere ambuae ipu oyeendu,

jare jaema jökorai jókuae opɨta.

Jare jókuae jaemai jökorai oyeapo ojo oiko:

19Jaema mbae ɨvɨ rupi oguata vae reta ipuere ojo reta ɨ rupi,

jare mbae ɨ ipo oï tai vae reta opa oë ɨvɨ otini vae pe;

20tata ma tuicha jendɨ ɨ pe,

jare mbaetɨ ma ipuere ogüe.

21Jare tata mbaetɨ oapɨ

mbae michi vae reta oasa jupi vae,

jare tɨkuiä vi maná ara güi oagüe,

tɨkui rape vae, echa ko ɨsápɨi oñemotäta vae rami etei.

22¡Jayave opaete mbae rupi, Tumpa,

remboyerovia tuicha rupi nerëta ipo reta;

mbaetɨ ye oipota rupi

reeya reta köraiño remborɨmbae!