ECLESIÁSTICO 23 - Guarani Bible with DC

1¡CheRu, Tumpa jare cherekove iya,

agüɨye emaeño chekü jae jeigüe toyapo cheve

ani ramo mbae pɨ jae jeko pegua!

2¡Mbae mona arakuaa oinupa cheäka

jare ombosɨmbi che yemongeta,

iñɨ̈ro mbae reve chembaeyavɨ reta re

jare aikuaku mbae reve che mbaeyoa reta!

3Agüɨye vaerä che mbaeyavɨ reta oyemboeta

jare ojo yoapɨ chembaeyoa reta,

agüɨye vaerä apɨta ñemomarai pe che rovaicho reta jóvai

jare opuka reta cheré.

4CheRu, Tumpa jare cherekove iTumpa,

agüɨye emee che ayembotuicha aiko vaerä

5jare embosɨrɨ chegüi mbae ikavimbae ipota reta.

6¡Agüɨye jae jeigüe toyapo cheve ñomomoe ani ramo kuña jete ipota!

¡Agüɨye chemee temimbota ñemomarai pegua pe!

Ñee oyeporugüe jare oyeyuvanga jese vae

7Cheraɨ reta, peyeapɨsaka yemboe re peikatu vaerä pemiari;

kia ojo jokoropi vae ngaraa oyapo mbaeyoa.

8Iyuru jeko pegua ko oyepɨɨ imbaeyoa vae,

jaema iyarakuaambae jare oyembotuicha vae oata ko jókuae jeko pegua.

9Agüɨye eyepokuaa ere Tumpa jee re oipotagüe,

reenɨi vaerä yepe Tumpa ikɨambae vae jee.

10Metei tembiau re oñemaepɨi yave,

ngaraa oë oñenupa mbae;

jökoraita vi ko, kia jei mbae Tumpa jee re vae ani oenɨi reteiño Tumpa vae

ngaraa oiko pɨagüive mbaeyoa güi.

11Kia ñavo jei jaangañoi Tumpa jee re vae, oñemotɨnɨeta ko teko pe,

jaema ñenupa ngaraa osɨrɨ jeta güi.

Jare güɨramoiño rere jökorai yave, jaema ko ndembaeyavɨ opɨta nderé;

jare rere rai yae yave, remboyoarambo ma ko ndeyoa,

jare rere jaangaiño mbae Tumpa jee yave, renoi ñotai ko teko;

ndero re osururuta ko susere reta.

12Oime ko ñee reta oyovake mano ndive vae;

¡agüɨye jókuae toñejäa Jacob jeta pe!

Iporoaɨu vae reta ombosɨrɨta ko opaete jókuae

jare mbaetɨ ko oyeapayere mbaeyoa rupi.

13Agüɨye eyepokuaa ejäa ñee pochɨ jare ñee jaangaiño vae,

echa jökorai yave reyapota mbaeyoa.

14Nemaendúa nderu re jare ndesɨ re

reguapɨ yave reï kia oyekuaa vae reta ipɨte pe,

agüɨye vaerä reï jae reta ndive yave, neakañɨ

jare reï metei iyarakuaambae rami;

jare jayave reipota potaechata rea,

jare reyepopeyuta jókuae ara rea vae re.

15Kia ñavo oyepokuaa oporomboarasɨuka vae,

ngaraa iyarakuaa opaete jekove rupi.

Aguasa

16Mókoi ani mboapɨ rupi kia reta täta iyoa

jare ombou reta iyeupe Tumpa iporonupa:

17Kia ñavo oñemee kuña jete ipota pe vae, tijendɨ tata rami

jare ngaraa ma ogüe opa ókai regua.

Kuimbae ikuña pota vae ngaraaí iyangapɨɨ opɨta,

ojo opa ókai regua.

Kuimbae ikuña pota vae pe ikavi päveño oipotagüe mbɨyape, jare ngaraaí iyapɨ ojo omano regua.

18Kuimbae jupimbae reve oiko imenda pe vae

jei ko iyeupe: “¿Kia pa chereechata?

Opaetei pɨtumimbi oï vae ovapetea reta chemoia oï vae,

mbaetɨ etei ko kia chereecha, ¿mbae güi ya akɨɨyeta?

Pea ɨvate ete pe oï vae ngaraa omae chembaeyoa reta re.”

19Jae jaeño ma okɨɨye kuimbae reta oecha vae güi,

jare mbaetɨ etei imaendúa Tumpa jesa reta ko

má jembipeasɨ yae kuaraɨ güi vae,

oecha oï opaete kuimbae reta oyapogüe

jare oike ike katu má oyekuaambaea rupi.

20Ndei oyapo mbove opaete mbaembae reta, Tumpa opa voi ma ko oikuaa,

jaeramiño vi opa ma oyapo yave.

21Iyaguasa pota vae oyepɨta ko jae jökoraimbae oäro reve,

jare oñenupata tesa pe.

22Jökoraita vi oasa kuña jupimbae oiko ime pe vae,

omee chupe metei taɨrɨpɨrä metei yaikuaambae vae güi.

23Tenondegua vae jae ko, oyapoä ɨvate ete pe oï vae iporookuai;

mokoía jae ko, iyoa ime kotɨ,

jare mboapɨa jae ko oyemongɨa ma aguasa pe

oñemomembɨuka metei yaikuaambae pe.

24Jókuae kuña oyererajaukata yemboatɨa pe,

jare imbaeyavɨ iyapɨ reta oata imembɨ reta re.

25Imembɨ reta ngaraa mbae güɨreko;

ngaraa oyapo reta mbae ikavigüe.

26Imaenduagüe oikota metei yepopeyu,

jare iyemongɨa ngaraa ma okañɨ.

27Jare ïru vae reta oikuaata

mbaetɨ yé ko mbae ikavi Tumpa yamboete vae güi,

ani ramo má jee ngatu iporookuai yayapo vae güi.