ISAÍAS 16 - Guarani Bible with DC

Moab pegua reta oñepɨ̈ro Judá pe

1Mburuvicha reta tëta Sela ñuu pe ñogüɨnoi vae,

pemee vecha kuimbae taɨrusu vae

ɨvɨtɨ Sión pegua reta pe.

2Moab pegua reta oasa ɨ̈aka Arnón tɨpɨmbaea rupi yave,

güɨra okɨɨyegüe oë otekuarai jaitɨ güi rami ko.

3Jei reta Sión pe:

“Eyapo yemongeta orereepɨ vaerä,

eñeñono orereepɨ vaerä,

emoñemi, iɨvɨ güi oyembotekuaraigüe reta,

otekuaraigüe reta agüɨye emee jovaicho pe.

4Emaeño toyogüɨreko pepɨte pe Moab güi otekuariagüe reta.

Eï chupe reta, oparapiti vae güi oñepɨ̈ro reta vaerä.”

Echa opa ma kuae tembiporara reta yave,

parapiti oasa ma yave,

kuae ɨvɨ oike opɨ̈ro vae reta opa ma yogüɨraja ye yave,

5David iñemuña güi metei oguapɨta mburuvicha guasurä mboroaɨu rupi.

Jae ko oïta jupi rupi oporojäa vaerä,

oyapota jupi vae opaete pe.

6Roendu Moab ipɨapochɨ,

tuicha yae ko jókuae ipɨapochɨ, ipɨarai jare ipɨayemboete,

ërei ngaraa ko oiko avei jókuae jeko reta.

7Jáeramo, opaete Moab pegua reta,

oyaeota ko jëtaguasu re,

oyaeo retata ko ipɨatɨtɨ reve,

oyaeo retata kuimbae reta Kir-hareset pegua re.

8Echa opa oyemboai ko reta Hesbón pegua, jare opa oyeasɨa temitɨ uva Sibma pegua,

mburuvicha guasu reta, tëtaguasu pegua reta opa omboai oeya.

Jembo reta ojo yepi oväe Jazer pe,

oñemoai yepi ñuu rupi,

ɨguasu güi kutɨ ye ojo yepi oväe.

9Jáeramo, ayaeota tëta Sibma jemitɨ reta re tëta Jazer oyaeo rami,

apɨyereta cheresaɨ nderé tëta guasu Hesbón jare Eleale,

echa ndembaarɨvo jare ndembaepoo iara pe outa ñeraro.

10Yerovia jare sapúkai yerovia pegua opata, ko kavi rupi;

mbaetɨta ma oime sapúkai yerovia pegua,

jare tairari uvarupa rupi,

mbaetɨta ma oime uva oitɨami vae oñetɨamía rupi,

mbaetɨta ma isapúkai oyeendu jokoropi.

11Jáeramo, chepɨa yaeo arpa ipu rami,

Moab re jare Kir-hareset re.

12Yepe tëi Moab oyeupi imbaemboetea ɨvɨtɨ rupigua reta re,

yepe tëi oyerure joko pe ikangɨ regua,

yepe tëi ojo itupao pe oyerure,

ngaraa osirive chupe.

13Kuae ko jae ñee reta jei yandeYa Moab kotɨ arakae güive voi ma vae.

14Ërei añave yandeYa jei:

“Mboapɨ añoa rupi,

jókuae ara ñavo oyemboepɨ iparavɨkɨ chupe vae

oipapa ara reta vae ou oväe chupe rami,

jökoraita ou opa okañɨtei Moab jërakua yae vae,

yepe tëi jeta yaeta pɨpegua reta;

jaeño jembɨreta mbovɨ mii, jare mbaetɨta imbaepuere reta.”