DEUTERONOMIO 18 - Guarani Bible with DC

Sacerdote Leví iñemuña reta imbaerä vae

1Sacerdote Leví iñemuña reta, ani opaete Leví iñemuña reta pe mbaetɨta oñemee ɨvɨ, Israel iñemuña reta pe oñemee rami. Yogüɨrekota mɨmba oyeyuka oyeapɨ yandeYa peguarä vae re, jare oñemee chupeguarä vae re.

2Mbaetɨta oñemee ɨvɨ chupe reta jëtara reta pe oñemee rami, yandeYa etei ko jae reta imbaeyekou, jae oñererökuavee chupe reta rami.

3Kuae topɨta sacerdote reta imbaerä opaete vae reta omee yave mɨmba oyeyukagüe toro ani vecha, toñemee chupe reta iugüe, jañɨkagüe jare iguaogüe,

4jaeramiño vi pembaagüɨyerɨpɨ güi: Trigo, vino jare olivo iasaite, jare tenondegua vecharaagüe, pevecha güi peekɨgüe toñemee chupe reta.

5Echa yandeYa Tumpa ko oiparavo reta opaete ñemuña ipɨte güi, oyapo reta vaerä mbaravɨkɨ yandeYa jee re jae jare taɨ reta jekuae avei pegua.

6Kia nunga tëta peikoa güi metei Leví iñemuña ipɨa-kɨ̈reɨ ngatu reve ou yave, yandeYa oiparavo jee oï pɨpea pe,

7toporomborɨ yandeYa Tumpa jee re, opaete ïru jëtara levita reta oporomborɨ rami,

8jare oyovake tomboresive tembíu, ïru reta ndive, oime reve güɨnoi imbaeyekou.

Yemboarakuaa teko kavimbae güi

9Peike ma yave yandeYa Tumpa omee ɨvɨ pevea pe, agüɨye peyemboe peyapo mbae pɨ̈chɨi vae, jókuae tëtaguasu pegua reta jeko pɨ̈chɨi rami.

10Agüɨye pegüi reta kia nunga vae toapɨ imichia tata pe,Lv 18.21; 20.1-5. agüɨye vi kia toyemboe oikuaa vaerä mbaekuaa rupi maratuta kuri vae re,Lv 19.26. agüɨye perovia moroäɨvo re, ani oekɨ suerte vae ani imbaekuaa vae re, Ex 22.18.

11mɨakañɨ iyapoa, jare agüɨye ave peyembosuerteuka maratuta vae imombeúa pe, ani ichoropa vae pe, jare agüɨye kia toeka tomomiari omanogüe jekove.Lv 19.31.

12Echa pɨ̈chɨi yae ko yandeYa Tumpa pe kuae nunga oyapo vae, kuae nunga teko pɨ̈chɨi oyapo tëtaguasu reta jeko pegua ko yandeYa Tumpa opa omoë omombo perenonde güi.

13Jáeramo peyapo ikavi vaeño yandeYa Tumpa jóvai.Mt 5.48.

14Echa kuae tëtaguasu reta pepɨ̈rota pembaerä vae pe yogüɨreko vae, güɨrovia katu oporombosuerte vae re, jare maratuta vae imombeúa re, ërei pegüi oyopia yandeYa Tumpa kuaekuae reta.

Tumpa omombeu oimeta metei ñeemombeúa Moisés rami vae

15YandeYa Tumpa omopüata pepɨte güi ñeemombeúa che rami vae, jese peyeapɨsaka jare peyapo jeigüe.Hch 3.22; 7.37.

16Pe peiporu yandeYa Tumpa pe ɨvɨtɨ Horeb pe rami, jókuae ara peyemboatɨ yave, körai pere: ‘Mbaetɨ ma roipota ore etei roendu oreYa iñee, ani roecha tata tuicha yae vae, agüɨye vaerä romano.’

17Jayave yandeYa jei cheve: ‘Jaekavi ko jei reta vae.

18Cheñeemombeúa amopüata chupe reta, jëtara reta ipɨte güi oëta metei nde rami vae; che ameeta iñeerä jare imiarita chupe reta opaete che ayókuai rami.

19Ërei oipotagüe mbaetɨ yave oendu cheñee reta, jae jei cheree re vae, che aiporuta chupe oï kavi vaerä che ndive.Hch 3.23.

20Ërei metei ñeemombeúa oyembotuicha reve imiari yave cheree re, che mbaetɨ ayókuai reve imiari yave, ani imiari yave tumpa ambuae vae reta jee re, jókuae nunga ñeemombeúa tomano.’

21Jare pere yave pepɨa pe: ‘¿Këraita pa yaikuaa Tumpa iñeeä ko imiari oï yandeve vae?’

22Jókuae ñeemombeúa imiari yave Tumpa jee re, jare mbaetɨ yave oyembopo jeigüe, jókuae ñee jeigüe Tumpa iñeeä ko,Jer 28.9. oyembotuicha güiño ko imiari jókuae ñeemombeúa; agüɨye pekɨɨye chugüi.