1Nicanor oikuaa yave Judas jare jupiegua reta ñogüɨnoi Samaria pe, oporepeña jese reta oipoɨu mbae reve, echa ara mbutuu iara oï jayave.
2Judío reta ipɨakotɨä reve opa güɨraja vae, jei chupe:
—Agüɨye mo eporoyukaasɨ katu, emboete Tumpa iara. Jesa güi mbaetɨ ñañemi vae, echa jae omboete ramo oiparavo kuae ara.
3Ërei jókuae ipɨa pïrimbae oparandu chupe reta oime ra Tumpa ara pe oporookuai ara mbutuu yemboete vaerä vae.
4Jae reta jei chupe:
—Tumpa oikove vae jare imbaepuere ara pe vae ko, oreokuai romboete vaerä chiúa ara.
5Jayave Nicanor jei:
—Ërei che ko anoi mbaepuere ɨvɨ pe, jáeramo poyókuai peipɨɨ vaerä perembiporu, mburuvicha guasu oporookuai rami.
Ërei ngatu mbaetɨ oë kavi chupe teko jae ipɨapotaa rami.
6Nicanor, iyaguara pɨpei, ikɨ̈reɨ tëi omopüa opaete mbaembae reta opɨ̈ro Judas güi vae iä ita pegua.
7Ërei Macabeo mbaetɨi iporogüɨrovia pe iyagüɨ, oyeko avei Tumpa kotɨ, jekuaeño omborɨ vaerä.
8Jare omoäta ngatu iñeïru reta agüɨye vaerä okɨɨye itumpa ambuae vae reta güi, echa ko imaendúa avei yave Tumpa iporomborɨ re, añave oepɨ retata vi iya imbaepuere yae vae.
9Omoäta ngatu reta mborookuai guasu jare ñee imoërakuaa reta jeigüe rupi, omomaendúa reta vi opaete iñoraro reta re, jökorai pe güɨraja ye omokɨ̈reɨ reta.
10Opa ma yave omoäta ngatu ye isundaro reta, omboarakuaa jare oechauka chupe reta itumpa ambuae vae reta iyemongeta pɨ̈chɨi ikotɨ vae.
11Körai omboyemboɨ ye japicha reta ñee iröɨsagüe ombotenonde ramo yeopiaka jare mii güi. Imiari reta vi chupe ipaɨu re, jokoropi jei kuae, jëtara reta ichëi, oyerure jëta jare jëta maraëɨ re vae.
12Onías ipaɨu jae kuae: jae ko sacerdote reta itenongua ete, kuimbae jeko kavi yae jare iporoaɨu vae, omae kavi ïru reta re michi güive, oupi ipo oyerure opaete judío reta re Tumpa pe.
13Jupi voi oyekuaa ïru kuimbae ia tïi jare imboetea yae, opaete kuae reta oyekuaa jese vae oechauka jae ko ɨvate yae imbaeuere vae.
14Onías ome iñee, jei: “Kuae ko jae Jeremías, Tumpa iñeemombeúa jëtara reta ivɨ-ïru, jae oyerure yae jëtara reta re jare tëta guasu re.”
15Jeremías omopüa ipo iyakatu kotɨgua, jare omee Judas metei kɨsepuku oro pegua jare jei chupe:
16“Ko oï kuae kɨsepuku maraëɨ, Tumpa omee ndeve vae, pɨpe opata repavusu tovaicho reta re.”
17Kuae oendu yave ipɨakatu opɨta reta, echa Judas omee chupe reta ñee ñemoäta ngatu pegua jare yembokuimbae pegua; jaema voi etei judío reta oyemongeta oeya vaerä jeyupa oporepeña jovaicho reta re, opaete mɨ̈rata ndive, ñoïraro rupi oñono kavi vaerä tekorai, echa ko Jerusalén iporogüɨrovia jare itupao güɨroyeandu reta.
18Jembireko reta, jëtara yepe ani imichia reta güɨroyeandu vae güi, oasa ete yé ko itupao ikɨambae vae kotɨ oaɨu reta.
19Tëta pe opɨta vae reta iyemoambeko tuicha ete kavi, echa mbaetɨ oikuaa reta mbae ko oasata ñoraro pe.
20Opaete vae oäro ñogüɨnoi oa vaerä oyoe. Tovaicho reta opa ma yatɨ jare sundaroatɨ reta jaeño ma oäro ñogüɨnoi ñee. Elefante reta ñogüɨnoi ma vi jenda ñavo rupi jaeramiño vi kavayu reta.
21Macabeo oecha ma yave ou tovaicho, elefante ndive jare jembiporu reta yavaete katu reve, omopüa ipo jare oyerure Tumpa pe, iporoparareko vae pe, echa yandeYa ko omee ñoi mɨ̈rata taɨ reta pe vae, jae ipɨapotaa oï tenonde tembiporu reta güi.
22Oyerure Tumpa pe yave jei körai: “Nde, cheRu, Ezequías iara pe, Judá ruvicharä oiko yave, rembou ndearaɨgua reparapiti vaerä ciento ochenta y cinco mil kuimbae reta Senaquerib pegua re.
23Añave cheYa, oime ara pe reï vae, embou ndearaɨgua toremborɨ vi, oporoiämondo jare oporomongɨɨye vaerä.
24Eyuka ndeyɨva imbaepuere pe itumpa ambuae vae reta ndekotɨ oporoangao vae, jare oyovaicho nerëta maraëɨ kotɨ vae reta.” Jökorai opa.
25Nicanor isundaro reta oguata mimbɨ guasu oñee meme jare oyemongoi reta ñoraro pegua pe;
26Judas peguareta oike ñoraroa pe oyerure reve,
27jare ipɨa pe oyeko reve Tumpa kotɨ oñoraro reta ramo, omboyoa jei vae oñono treinta y cinco mil jovaicho reta, jáeramo oyerovia tuicha opɨta reta Tumpa iporomborɨ re.
28Opa ma yave ñoraro, jare osɨrɨ reta ma yave oyerovia katu reve, oväe reta chupe Nicanor jetegüe.
29Jayave osapúkai jare oyemongoi reve, omboete reta iñee pe Tumpa.
30Judas, jókuae kuimbae oike ñoraroa pe isundaro reta jenonde yave, oñoraro opaete ipɨa jare jete reve vae, jare mbaetɨi jëta oeya taɨrusu güive vae, oporookuai oyasɨa vaerä Nicanor iñäka jare iyɨva akatu kotɨgua, güɨraja vaerä Jerusalén kotɨ.
31Judas etei ojo vi Jerusalén kotɨ, jare opa ma yave omboatɨ jëtaɨgua reta isacerdote reta reve, oyemboɨ mbaeyukaa renda jóvai, oenɨi vi opaete tëta mí pegua reta.
32Jayave oechauka chupe reta Nicanor iñäkagüe jare iyɨvagüe, jókuae yɨva pe oyangao iyaguara reve Tumpa imbaepuere vae.
33Joko güi oyasɨa ipɨapochɨ vae Nicanor ikü, jare oyókuai isundaro reta opa vaerä oyasɨa sɨa jetegüe omombo vaerä güɨra reta jembiurä, jare oupi vaerä iyɨvagüe tupao jóvai, jökorai omboepɨ vaerä jembiapo.
34Opaete vae, jovaɨva, jare omboete reta yandeYa, echa jae tuicha iporomborɨ, jei reta: “¡Mbaemboete toiko ndeve cheYa, ndetupao mbaetɨ remaeño ikɨa ramo!”
35Judas oupi tëta mí pe Nicanor iñäkagüe, oechauka vaerä pɨpe Tumpa iporomborɨ,
36jare opaete vae, metei rami, oyemongeta reta agüɨye vaerä iñakañɨ jókuae ara güi, oyapo avei vaerä arete payandepo mboapɨ ara ñavo, pa yandepo mókoi yasɨ pe, arameo pe Adar oero retaa pe, jae ko arete Purim jei vae güi metei ara jenonde.
Iyapɨ37Körai oasa Nicanor ndive; jare joko güive tëta opɨta hebreo reta ipo pe.
Körai jayave che opa vi chemiari.
38Oyemboɨsɨ kavi yave oï, jae ko oë cheve chepɨapotaa, ërei mbaetɨ ko yave, mbaetɨ yé ma mbae chepuereta ayapo.
39Vino ɨmambae mbaetɨ jëe ngatu ramita ko, echa ko vino oyea ɨ ndive vae jëe ngatu yae ko, jökoraiño vi ko tembikuatía reta, yamboyea yea yemongeta yave ko, ipörata vi omongeta vae reta pe. Kuae ndive opa amboapɨ kuae miari.
Who We AreWhat We EelieveWhat We Do
2025 by iamachristian.org,Inc All rights reserved.
