1Ara trece, yasɨ docea Adar pe, jae ko ara oyembojee mborookuai mburuvicha guasu jei oyembopo vaerä vae, Judáɨgua jovaicho reta güɨnoi vaerä mbaepuere jese reta, opa vaerä oyuka reta jókuae ara, ërei mbaetɨ jökorai; echa Judáɨgua reta rärii güɨnoi mbaepuere imotareɨa reta re.
2Judáɨgua reta oyomboatɨ tëta ñavo ñogüɨnoia rupi, mburuvicha guasu Asuero iɨvɨ rupi, oñoraro vaerä ikavimbae oyapota tëi chupe reta vae ndive. Jare mbaetɨ kia ipuere oyemboɨ chupe reta, echa ou kɨɨye opaete vae re.
3Jare opaete mburuvicha tëta ñavo ñogüɨnoi vae, ɨvɨ iyangarekoa, sundaro ruvicha jare mburuvicha guasu imborɨa reta, omborɨ Judáɨgua reta; Mardoqueo güi okɨɨye ramo.
4Echa Mardoqueo tuicha pegua yae ko mburuvicha guasu jo pe, jare jërakua opaete tëta reta rupi; jare imbaepuere okuakuaa ara ñavo.
5Jare kɨsepuku pe Judáɨgua reta opa oyuka jovaicho reta, jeta rupi oyuka jare omokañɨtei reta, oyapo reta ipɨapotaa jovaicho reta pe.
6Tëta guasu Susa, kuae tëta güi mburuvicha guasu reta oporookuaía pe, Judáɨgua reta oyuka quiniento kuimbae.
7Jayave oyuka reta vi Parsandata, Dalfón, Aspata.
8Porata, Adalía, Aridata,
9Parmasta, Arisai, Aridai jare Vaizata.
10Jae ko payandepo Amán taɨ reta Judáɨgua reta jovaicho, Hamedata jɨmɨmino reta, ërei mbaetɨ opoko reta imbaembaegüe re.
11Jókuae ara voi mburuvicha guasu pe oikuaauka reta, mbovɨ ko omano Susa pe vae, tëta mburuvicha guasu oikoa pe.
12Jare mburuvicha guasu jei jembireko Ester pe:
—Tëta guasu Susa, kuae tëta güi mburuvicha guasu reta oporookuaía pe, Judáɨgua reta oyuka quiniento kuimbae. Jare payandepo reve Amán taɨ. ¿Mbae ye ra aipo oyapo reta ïru tëta reta pe? ¿Mbae ye pa reiporu? Jare oñemeeta ndeve, ani ¿oime ye pa mbae reipota? Jare oyeapota ndeve.
13Jare Ester jei:
—Mburuvicha guasu pe jaekavi yave, toñemee pɨareve Judáɨgua reta Susa pegua pe añave mborookuai jei rami; jare toyeeterasa payandepo reve Amán taɨ reta jetegüe ɨvɨra re.
14Jare mburuvicha guasu omondo oyeapo vaerä jökorai, Susa pe omee mborookuai jare Amán taɨ reta payandepo reve jetegüe opa oyembosavava.
15Jare Judáɨgua ñogüɨnoi Susa pe vae oyomboatɨ reta vi ara catorce, yasɨ Adar pe, jare oyuka Susa pe tresciento kuimbae reta; ërei mbaetɨ etei imbaembaegüe re opoko reta.
16-17Jare Judáɨgua yogüɨreko ïru tëta reta rupi vae, oyomboatɨ reta vi ara trece pe, yasɨ Adar pe, oyeepɨ vaerä jovaicho reta güi, oyuka reta setenta y cinco mil chugüi reta, ërei mbaetɨ etei imbaembaegüe re opoko reta. Ara catorce pe oputuu reta, oyapo arete okaru jare oyerovia reta.
18Ërei Judáɨgua Susa pegua reta oyomboatɨ ara trece jare ara catorce pe, oputuu reta ara quince pe, oyapo reta reve arete okaru reta vaerä jare oyerovia yae reta.
19Jáeramo, Judáɨgua reta yogüɨreko tëta raɨ oñekësembae rupi vae, ara catorce yasɨ Adar pe oyapo reta arete, oyerovia reve jare oyombopota reta mbae pe.
Arete Purim regua20Echa Mardoqueo oikuatía kuae mbaembae, jare omondo tupapire opaete Judáɨgua ñogüɨnoia rupi, tëta ñavo Asuero ipo pe ñogüɨnoi vae pe, köiño jare mombɨrɨ vae pe.
21Oyókuai reve oyapo reta vaerä arete ara catorce jare ara quince yasɨ Adar pe, año ñavo.
22Echa jókuae ara Judáɨgua reta oyepɨ jovaicho reta re, ara jare yasɨ mbɨatɨtɨ pegua oyepoepɨ yerovia katu pe, ara kavi pe; kuae ara oyapo reta okaru vaerä yerovia ndive, oyombopota reve jare omee reve mbae paravete vae reta pe.
23Jare Judáɨgua reta omboɨpɨ oyapo avei jókuae oasa jae reta ndive vae regua, Mardoqueo jembikuatía rupi oyókuai vae rami.
24Echa Amán, Hamedata taɨ Agag iñemuña Judáɨgua reta jovaicho oyemongeta opa vaerä omokañɨtei; jare oyapo etei Pur (jae ko suerte)Est 3.7. rupi opa vaerä oyuka jare omokañɨtei.
25Ërei Ester ou yave mburuvicha guasu jóvai, omee mborookuai jókuae ipɨapochɨ vae oyemongeta oyapota tëi rami, chupe oyeapo vaerä, jökorai Amán jare taɨ reta opa oeterasa ɨvɨra re.
26Jókuae jeko pegua kuae ara reta oyembojee Purim, echa oë ñee Pur güi.
Jökorai Mardoqueo jembikuatía rupi jare oecha vae rupi, jare oasa jae reta ndive vae rupi,
27Judáɨgua reta ombojee oyapo avei vaerä iyeupe, jare iñemuña reta, jare opaete oyeapota Judaɨguarä vae reta pe: Oasambae reve mókoi ara omboareteta año ñavo;
28kuae ara reta toiko yemomaendúa opaete ñemuña, tëtara, tëta reta jare tëta guasu reta rupi; kuae ara Purim, Judáɨgua reta mbaetɨta omboasaiño. Jare iñemuña reta güi ngaraa oasaiño imaenduambae reve jese.
29Jare Ester Abihail amɨri tayɨ, jare Mardoqueo Judáɨgua oikuatía oipoɨumbae reve kuae tupapire mokoía Purim regua.
30Jare jókuae tupapire omondo opaete Judáɨgua reta pe, ciento veintisiete tëta reta Asuero ipo pe oï vae pe, ñee yembopɨakatu pegua jare añete pegua ndive,
31omoañete vaerä kuae ara Purim iara oñemokañɨmaa oï vae, Judáɨgua Mardoqueo jare mburuvicha guasu jembireko Ester oporookuai rami. Jae reta ombojee ma iyeupe jare iñemuña reta pe, oyemomaendúa avei vaerä isapúkai poi mbɨatɨtɨ reve vae re jare oyekuaku poi reta tembíu güi vae re.
32Jare Ester omee mborookuai vae omoañete kuae yemomaendúa Purim regua, jare kuae oyekuatía metei tembikuatía pe.
Who We AreWhat We EelieveWhat We Do
2025 by iamachristian.org,Inc All rights reserved.
