1Cheraɨ, agüɨye neakañɨ cheporookuai güi,
eñovatu ndepɨa pe cheporookuai reta,
2jare reiko pukuta,
jare mbɨakatu oñemoïruta ndeve.
3Agüɨye etei embosɨrɨ ndeyeugüi mboroparareko jare añetete vae;
eñapɨti ndeayu re,
jare eñovatu ndepɨa pe.
4Jare reväeta yeparareko jare mboroaɨu Tumpa güi,
jare kuimbae reta güi.
5Eyeko yandeYa re opaete ndepɨa ndive;
agüɨ ye eyeko ndearakuaa katu reño.
6Enoi avei ndepɨa pe yandeYa, opaete mbae reyapo vae rupi,
jare jae ndereroatata sɨmbi rupi.
7Agüɨye ndearakuaa katu emae ndeyé aeño;
eipoɨu yandeYa güi jare esɨrɨ ikavimbae güi.
8Echa kuae, moa ramita ko ndeve,
omoröɨsa katuta nekägüe reta.
9Emboete yandeYa mbaembae renoigüe pe,
jare opaete ndembaagüɨyerɨpɨ reta pe.
10Jayave tɨnɨeasɨ yaeta ndeavatío reta,
jare uva pɨau tɨgüegüe oyepɨyere yeta jɨru güi.
11Cheraɨ, agüɨye eröɨro yandeYa oiporarauka ndeve yave,
agüɨye ave tandembogüérai iporombosɨ mbi.
12Echa yandeYa, oaɨu vae pe
oiporarauka ko; kuimbae, oinupa taɨ oaɨu güi rami.
13Oyerovia ko arakuaa oväe vae,
arakuaa katu oväe vae;
14echa jókuae ko ikavi yae ete korepoti güi
jare oro ikavi yae vae güi.
15Ipöra yae ete ko ita ipöra yae vae reta güi;
¡mbae ipöra yae ete vae ave ngaraa ipuere oyemboyovake jókuae ndive!
16Ipo iyakatu kotɨ güɨrökuavee tekove puku,
ipo iyasu kotɨ güɨrökuavee mbaeyekou jare mboromboete.
17Jeko ñamomoe vae ikavi yae ete ko;
ñamomoe yave mbɨakatu peguarä ko.
18Arakuaa ko tekove, arakuaa oväe vae reta peguarä;
¡oyerovia ko jókuae oipɨɨ iyeupe vae reta!
19Arakuaa reve kavi yandeYa oñono ɨvɨ jenda pe,
jare arakuaa katu reve kavi oyapo ara;
20jae iyarakuaa katu rupi opa omboyao ɨguasu reta,
jare ara güi oa vaerä ɨsápɨi.
21Cheraɨ, agüɨye kuaekuae embosɨrɨ ndeyeugüi,
eñovatu mborookuai jare yemboarakuaa,
22echa jese ko renoita tekove,
ndemboaruandata, mboɨ ndemboaruanda rami.
23Jayave reikota rekɨɨyembae reve,
jare ngaraai nepɨ̈sa-yeyuka.
24Reputuu reï yave, ngaraa reyeandu reve reï;
reyapakuaa yave, reke pɨagüiveta.
25Ngaraa rekɨɨye mbaesusere güɨramoi peguaño oime vae güi,
ani iyoa vae reta re mbaesusere ou yave vae güi ave,
26echa yandeYa ko ndeyeroviaka,
ngaraa omaeño rea mbae nunga mbaemboavai pe.
27Agüɨye neäteɨ emborɨ, yemborɨ oeka vae,
ndepuere tëi reporomborɨ reve.
28Agüɨye ere nderapicha pe:
“Ekua ye räri, pɨareve eyu tamee ndeve.”
Oime tëi renoi remee voi vaerä chupe reve.
29Agüɨye eyemongeta pɨ̈chɨi nderapicha kotɨ,
ndererovia katu reve oiko ndeɨpɨ pe vae kotɨ.
30Agüɨye eñeapo ïru vae re jekombae reve,
mbaetɨ kia mbae oyapo ndeve reve.
31Agüɨye emotareɨ kuimbae jupimbae, agüɨye ave vi emomoe jeko reta;
32echa yandeYa güɨröɨro ipɨapochɨ vae, ërei oï jupi vae reta ndive.
33YandeYa iyepopeyu oï jupimbae jo re,
ërei iporerekua oï, jupi vae reta jo re.
34Añetete jae oyóyai yoyaita oporoyóyai yóyai vae reta, ërei ipɨakavi oñemomichi vae reta pe.
35Yarakuaa katu vae reta iyekou jae ko mboromboete,
ërei yarakuaambae reta oñemomaraiuka.
Who We AreWhat We EelieveWhat We Do
2025 by iamachristian.org,Inc All rights reserved.