1 SAMUEL 9 - Guarani Bible with DC

Saúl oyeparavo mburuvicha guasurä

1Oiko metei kuimbae Benjamín iñemuña pegua, jëia yae vae, jae ko Cis, Abiel taɨ, Abiel jae ko Zeror taɨ, Zeror jae ko Becorat taɨ, Becorat jae ko Afía taɨ.

2Cis güɨnoi metei taɨ, Saúl jee vae, taɨrusu jare kunumi kavi. Opaete Israel iñemuña reta ipɨte pe mbaetɨ yé chugüi ïru kunumi kavi; jare ipuku yae opaete vae reta güi.

3Jare Cis, Saúl tu imburika reta yepe opa okañɨ; jáeramo jei taɨ Saúl pe:

—Eraja nderupíe metei tembiokuai, jare pekua peeka mburika reta.

4Jare oasa reta ɨvɨtɨ Efraín rupi jare yogüɨraja oväe ɨvɨ Salisa pe; jare mbaetɨ oväe. Jare oasa reta yogüɨraja ɨvɨ Saalim rupi, mbaetɨ oväe, javoi oasa reta yogüɨraja Benjamín iñemuña reta iɨvɨ rupi jare mbaetɨ oväe reta imburika.

5Jare yogüeru oväe ɨvɨ Zuf pe yave, Saúl jei jembiokuai güɨreko jupíe vae pe:

—Yayerova ye mo, echa güɨramoi cheru oyemoambekota yanderei mburika reta güi.

6Jare jembiokuai jei chupe:

—Mase, kuae tëta guasu pe oime oiko metei kuimbae Tumpa iñeemombeúa, kuimbae jërakua yae vae ko, jare opaete mbae jei vae oyeapo jae jei rami etei. Yaja ípɨri, güɨramoi jae omombeu kavita yandeve kerupi yaja vaerä.

7Saúl jei jembiokuai pe:

—Yaja jayave. Ërei, ¿mbae pa yarajata jókuae kuimbae pe? Echa mbɨyape opa ma yandeaporoka pe, jare mbaetɨ mbae ñamee vaerä Tumpa iñeemombeúa pe.

8Jayave jembiokuai jei Saúl pe:

—Mase, ko anoi reare raɨ korepoti pegua. Tamee Tumpa iñeemombeúa pe omombeu vaerä yandeve kerupi yaja vaerä.

9(Arakae ete kia ojo oparandu Tumpa pe yave jei körai: “Peyu yaja mbae re oecha voi vae pɨri.” Echa añave oyembojee ñeemombeúa vae, jayave rupi jee yepi mbae re oecha voi vae.)

10Jare Saúl jei jembiokuai pe:

—Jaekavi rere, yaja jokotɨ.

Jare yogüɨraja tëta guasu kotɨ Tumpa iñeemombeúa oïa pe.

11Jare oyeupi yogüɨraja yave tëta guasu kotɨ oñoövaiti kuñatai reta yogüeru ɨ güɨraja vae ndive, jare oparandu chupe reta:

—¿Oime pa oï mbae re oecha voi vae?

12Jare jae reta jei:

—Oime oï, peäkua pekua, echa añave jae ou kuae tëta guasu pe omee vaerä mɨmba oyeyukagüe tëta pegua reta re, kuae mbaemboete renda ɨvɨtɨ regua pe.

13Peike yave tëta guasu pe, peeka voi ndei oyeupi mbove mbaemboete renda ɨvɨtɨ regua pe okaru. Jeta vae reta ngaraa okaru jae ndei ojo oväe mbove. Echa jae ko oyerureta mɨmba oyeyukagüe re, jare jókuae jaɨkue rupi ramo okaruta oyeparea chupe vae reta. Jáeramo añave jarembae voi pekua jare peväeta chupe.

14Jayave jae reta yogüɨraja jarembae voi tëta guasu kotɨ, jare joko pe ma ñogüɨnoi yave, ko ou Samuel ikotɨ reta, jaema oyeupi vaerä mbaemboete renda ɨvɨtɨ regua re.

15Pɨareve pe ma Saúl outa yave yepe, yandeYa oikuaauka Samuel pe, körai:

16“Pɨareve koyave etei, che ambouta ndépɨri metei kunumi Benjamín iñenuña reta iɨvɨ kotɨ güi, jae reiparavota Israel iñemuña reta pe mburuvicharä jae oepɨta chembae vae, filisteo reta ipo güi; echa aiparareko amae jese reta, jäse aendu jeko pegua.”

17Jare Samuel oecha yave Saúl, yandeYa jei chupe: “Mase, jae ko kuae kunumi chemiari jese ndeve vae; kuae oikota chembae reta juvicharä.”

18Jare Saúl oya katu Samuel re tëta guasu jöke pe oï yave jare jei chupe:

—Romoñera remombeu vaerä cheve, kia pe pa oiko mbae re oecha voi vae.

19Samuel jei Saúl pe:

—Che ko jae, eyeupi che ndive kuae ɨvɨtɨ mbaemboete renda pe, jare ekaru añave che ndive. Pɨareve tamombeu ndeve opaete ndepɨa pe renoi reparandu vaerä vae.

20Jókuae mburika mboapɨ ara ma okañɨ pegüi vae, agüɨye ndepɨatɨtɨ jese reta, echa oñeväe ma chupe. Ërei opaete Israel pegua mbaeyekou ndembaerä ko jare nderu iñemuña reta peguarä ko.

21Jayave Saúl jei:

—¡Benjamín iñemuña pegua ko che, mbovɨ yae ïru Israel iñemuña pegua reta güi vae! ¿Maera pa kuae ñee rere cheve?

22Jayave Samuel güɨraja Saúl jare jembiokuai, jare omoinge o pe treinta kuimbae ñogüɨnoia pe, jare omboguapɨ tenonde, jókuae oyeparea chupe reta vae güi.

23Jare Samuel jei oñemimo vae pe:

—Eru jókuae amee ndeve reñono tee vaerä vae.

24Jayave oñemimo vae oekɨ metei iugüe jare oñono Saúl jóvai, jare Samuel jei:

—Jae ko kuae añono teeuka ndeveguarä vae. Ekaru, jae ko oñeñovatu ndeve, aparea ramboeve tëta pegua reta pe vae.

Jayave jókuae ara Saúl okaru Samuel ndive.

25Jayave opa ye ma yogüeru ɨvɨtɨ mbaemboete renda güi tëta guasu kotɨ yave, Samuel imiari Saúl ndive o iárambo ipe kavi vae pe.

26Jare pɨareve pe ndei köe mbove oyupavo, jare köe jembipe ma yave Samuel oenɨi Saúl o iárambo ipe kavi vae güi, jare jei chupe:

—Epüa romboyupavo vaerä.

Jupivei Saúl opüa, jare ñogüɨnoe Samuel ndive.

27Jare ñogüɨnoe reta tëta guasu güi ikatu pe yave, Samuel jei Saúl pe:

—Ere nderembiokuai pe tojo tenonde, ërei nde epɨtaño michi pegua amombeu vaerä Tumpa iñee ndeve.