1Kuña imembɨ, mbaetɨ ɨma oiko, jare oiporara yae.
2Mbaepotɨ ramiño; oyekuaa, javoi ipiru,
oasa, jare okañɨ metei küaraɨa rami.
3Jökorai ko che, ërei jeseve remae ngatu cheré,
jare chereru chejäa.
4¿Kia pa ipuere oekɨ mbae ikɨa vae güi, mbae ikɨambae?
Mbaetɨ.
5Añetete iara reta oyepapa ko oï,
yasɨ reta oikota vae nde reikuaa,
remee oikove oiko vaerä vae güi, ngaraa oasa.
6Esɨrɨ chugüi, jare toiko pɨagüive.
¡Emaeño toyemboyerovia ara ñavo iparavɨkɨ jepɨ chupe vae rami!
7Metei ɨvɨra oyeasɨagüe,
ipuereño jokɨ ye,
jeñɨi yeta iyɨpɨgüe jare oiko yeta.
8Yepe tëi japo reta indechi,
jare iyɨpɨgüe otiniecha,
9ërei oɨu yave, jokɨ yeta ko,
jare jäka jetata temitɨ ipɨau rami.
10Ërei kuimbae omano yave, okañɨ,
jare ¿ketɨ ra ojo?
11Ɨ ipuere opa tɨpa ɨguasu pe,
ɨ̈aka reta pe jagüe jare opa tɨpa.
12Jökorai kuimbae omano, jare mbaetɨ opüa ye,
oime ramboeve oiko ara, ngaraa oikove ye,
ngaraa opüa ye oke oï vae güi.
13Aipotaecha chemoñemi omanogüe reta ñogüɨnoia pe,
jae cheöva vaerä ndearasɨ oasa regua,
rembojee ara nemaendúa vaerä cheré vae regua.
14Kuimbae omano yave, ¿oikove yeta ra?
Opaete ara aikove aiko ramboeve, aärota,
aiporara poi vaerä.
15Chereenɨita, jare che aenduta,
cheraɨuta remae cheré, echa nde ko jae cheapoa.
16Jayave, nde reikuaata opaete cheguata re,
ngaraa nemaendúa cheyoa reta re.
17Reñapɨtita reñono urupuku pe cheyoa reta,
jare rembovɨvɨta reñono opaete ikavimbae ayapogüe.
18Mase, ɨvɨtɨ osururu vae okañɨ,
jare ɨ̈vavira osɨrɨ jenda güi.
19Ɨaparúa reta oikɨtɨ ita reta,
ama okɨ yave, güɨraja ɨvɨkúi reta,
jökorai nde remboai, kuimbae oyerovia tëi jese vae.
20Remoamɨri jekuae avei pegua, okañɨtei jekuae avei pegua,
jova ambuae, jökorai remondo.
21Taɨ reta imboetea yae yave, jae mbaetɨ oikuaa,
ani osusere reta yave, jae mbaetɨ oikuaa.
22Jaeño oyandu oiporara oï vae,
jare ipɨatɨtɨ iyé.
Who We AreWhat We EelieveWhat We Do
2025 by iamachristian.org,Inc All rights reserved.
