ECLESIASTÉS 7 - Guarani Bible with DC

Arakuaa jare arakuaambae

1Ñanerërakua kavi vae ikavi yae ko,

jókuae mbae ikäti kavi yae vae güi.

Ñamano vae ikavi yae ko,

jókuae ara yaa ramo vae güi.

2Manoa pe yaja vae ikavi yae ko,

aretea pe yaja vae güi;

echa mano jae ko opaete vae reta iyapɨ,

jare oikoveño oï vae ipuere oyemongeta avei jese.

3Yandepɨatɨtɨ vae jaekaviño ko yapuka vae güi,

echa yandepɨatɨtɨ vae, yandembopɨakatu.

4Yarakuaa vae, oyemongeta mano re,

ërei yarakuaambae, oyemongeta arete reño.

5Yayeapɨsaka yarakuaa vae iporombosɨmbi re vae ko ikavi yae,

yarakuaambae iñeeyukɨ re yayeapɨsaka vae güi.

6Yarakuaambae vae ipuka ñana opiriri ókai yapepo igüɨ pe vae rami ko,

jare kuae mbaeä etei vi ko.

7Teko rai ombojopa yarakuaa vae,

jare mbaemboepɨ vɨari güɨrokomegua jeko kavi.

8Mbae yayapo vae yamboapɨ ma vae ikavi yae ko,

yamboɨpɨ ramo etei vae güi.

Yandepɨa guasu vae ko ikavi yae,

yandepɨarai vae güi.

9Agüɨye ndearasɨ katu,

echa yarakuaambae reta ko iyarasɨ katu.

10Agüɨye etei ere: “¿Maera pa ko arakae ikavi yae mbae, añave rupi vae güi?” Echa jókuae mbarandu, mbaetɨ ko arakuaa pegua.

11Arakuaa katu mbaeyekou ndive vae ikavi yae ko, opaete kuae ɨvɨ pe yogüɨreko vae pe.

12Echa arakuaa katu oporoepɨ vi ko korepoti rami, ërei arakuaa oyapɨraa yé korepoti, echa omee tekove katu jókuae arakuaa güɨnoi vae pe.

13Emae kavi Tumpa jembiapo re; echa ¿kia pa ipuere ombosɨmbi jae omoapegüe?

14Ikavi reiko yave, eyekou jókuae reiko kavi ramboeve; ërei mbaetɨ ikavi reiko yave eyemongeta, Tumpa jemimbota ko kuaekuae, kuimbae agüɨye vaerä oikuaa mbae ra ko oasata vae.

15Opaete kuaekuae aecha michi pegua aikoveño aiko ramboeve, jae ko: Kuimbae jupi vae omano jupi rupi oiko reve, jare oime iyoa vae iyoa oiko reve oikopuku.

16Agüɨye oasa ete ndepɨakavi,

agüɨye vi oasa ete ndearakuaa.

¿Maera pa nde aeño reñemokañɨteukata?

17Agüɨye oasa ete eyapo ikavimbae,

agüɨye vi oasa ete ndearakuaambae.

¿Maera pa remanota, ndei remanoa oväe mbove?

18Kuaekuae eyapo,

jókuae ïru reta reeyambae reve.

Echa Tumpa güi oipoɨu vae,

oë kavita chupe opaete mbaembae.

19Arakuaa omomɨ̈rata iyarakuaa vae,

payandepo mburuvicha reta tëta guasu pe ñogüɨnoi vae güi.

20Añetete, mbaetɨ metei ave jupi vae kuae ɨvɨ pe, ikavi vae iyapoa jare mbaetɨi iyoa vae.

21Agüɨye erovia opaete mbaembae reendugüe re, agüɨye vaerä rerovia nderembiokuai reta mbae jei ndekotɨ yave.

22Echa nde reikuaa kavi vi ko reï, rere avei yepi ikavimbae ïru vae reta kotɨ.

Arakuaa jeka

23Opaete kuae ayapo chearakuaa reve; jae cheyeupe: “Tachearakuaa katu”, ërei mbaetɨ chearakuaa.

24¡Mbaetɨ chepuere aikuaa opaete mbaembae oyeapogüe! ¡Yavai yae ko, mbaetɨ kia ipuere oikuaa!

25Jayave añeñono aikuaa kavi vaerä, ayemboe jare aeka arakuaa ikavigüe. Jare ayu aikuaa mbaetɨ ko ikavi yandearakuaambae vae jare mbokere ko yandearakuaambae vae.

26Ayu aikuaa mano güi ikavimbae yae ete vae, jae ko kuña ñuai rami, oporoitɨ jare oporoäpɨti. Tumpa reño oyeko vae ojoyepe chugüi, ërei iyoa vae, oa ipo pe.

27Aipota ramboeve aikuaa opaete mbaembae regua, che añemoñee vae, aikuaa vae jae ko:

28¡Mbaetɨño aväe jókuae añetete aeka vae! Mil kuimbae güi aväe chupe metei, ërei metei ave kuña mbaetɨ aväe opaete vae güi.

29Aväe chupe vae jaeño kuae: Tumpa oyapo jupi kuimbae,Gn 1.26-31. ërei jae aeño oñererokomegua.