ISAÍAS 3 - Guarani Bible with DC

YandeYa ojäa Judá jare Jerusalén

1¡Mase! YandeYa Imbaepuere yae ete vae

opɨ̈rota Jerusalén güi jare Judá güi opaete mbaembae jerúa,

opaete tembíu jare ɨ,

2jëia vae jare ñeraro regua,

oporojäa vae, ñeemombeúa, maratuta vae imombeuaraanga, tenondegua,

3sundaro ruvicha, kuimbae imboetea yae vae,

oporomboarakuaa vae, ipaye vae jare ñee regua;

4jare oñonota kunumi reta petenondeguarä,

michia reta ñogüɨnoita peruvicharä.

5Jare teko mbaetɨta ikavi,

metei ñavo oñemopüata jo iyɨpɨ pegua re.

Taɨrusu vae reta oñemopüata ndechi reta re,

jare paravete vae reta oñemopüata oikokatu vae reta re.

6Amogüe oipɨɨta jëtara jare jeita chupe:

“Nde oime vɨteriño nderemimonde;

eiko oreruvicharä,

ndepo pe toï opaete kuae oikomegua oï vae.”

7Jare jókuae ïru jeita Tumpa jee re:

“Mbaetɨta chepuere,

mbaetɨ chero pe tembíu ani temimonde yepe.

Agüɨye cheñono mburuvicharä kuae tëta pe.”

8Echa Jerusalén opa oyemboai oï,

Judá opa okañɨtei,

echa joko pe jei reta jare oyapo reta ikavimbae yandeYa kotɨ,

mbaetɨ omboete reta jae iyemboetea, omboarasɨuka vaerä.

9Ikañɨmaa reta;

echa Sodoma rami omoërakua reta iyoa, mbaetɨ oikuaku reta.

¡Paravete! Jae reta aeño oyapo ñogüɨnoi iyeupe ikavimbae oiporara vaerä.

10Ere jupi vae pe, ojo kavita ko,

echa oyekouta jembiapo re.

11¡Paravete iyoa vae! Ngaraa ojo kavi,

echa iyoa reta oï rupi jekoviata chupe.

12Tëta chembae vae pe oiporarauka reta vae, kunumi retaño ko;

jare kuña reta ko ñogüɨnoi mburuvicharä jese.

Tëta chembae vae, nderuvicha reta ndembotavɨ,

ndereroata ïkotɨa rupi.

13YandeYa oporojäa vaerä ma oï,

ojäata tëta imbae vae.

14YandeYa outa ojäa

paravete vae reta güi peñomigüe oime penoi pero pe.

15¿Maera pa peyuvanga tëta chembae re?

¿Maera pa peyuvanga mbatee paravete vae reta re?”

Jei yandeYa Tumpa Imbaepuere yae ete vae.

Morojäa kuña reta Sión pegua kotɨ

16YandeYa jei ye:

“Kuña reta Sión pegua, iyemboete iyé vae reta,

iñäka oupi avei oguata vae reta,

jesäɨ mbokere reve,

opɨ̈ro pɨi pɨi oguata vae reta,

jare omochinini ipɨ imopöraka oguata reta yave;

17jáeramo, opata ambosururuka ia chugüi reta äka mbaerasɨ pe,

jare iñäka raambae opɨta retata.”

18Jókuae ara,

yandeYa opata omokañɨ kuña ipɨɨru imopöraa reta,

äka-regua reta, mboɨ reta imopöraa,

19mboɨ reta, namicha reta, yɨva regua reta,

20äka-ɨru reta, tɨmaka imopöraa reta,

apɨkuaa reta, ikäti kavi vae jɨru reta,

mboɨ reta oyepeyugüe,

21moäka-vera rami vae äpɨgua imopöraa reta,

22temimonde ikavigüe reta, ñeapevaka reta, äka-soya reta jare mbaerɨru reta,

23epeo reta, temimonderä vae reta ikavigüe,

äka-ɨru jare ñeapevaka raɨ reta,

24mbae ikäti kavi vae reta, ikäti äragüe,

iine retata;

kuakuaa jekovia pe, oimeta tɨmasaño;

iñäkarachi kavi vae jekovia pe, mbaetɨta iñäka raa reta;

jemimonde kavi jekovia pe, oimeta temimonde mbɨatɨtɨ peguaño;

jova pöra jekovia pe, okaigüe ramita jova re.

25Peraɨe reta opata omano ñeraro pe,

jare peraɨe ñeraro regua reta, omanota ñeraroa pe.

26Tëta pegua reta oyaeota, jare omondeta temimonde mbɨatɨtɨ pegua,

jare ipombae opɨtata.