ESDRAS 9 - Guarani Bible with DC

Tëta iyoa jare Esdras iyerure

1Opa oyeapo kuaekuae reta yave, mburuvicha reta yogüeru chekotɨ jei reve: “Israel iñemuña reta, sacerdote reta, jare levita reta mbaetɨ oyembosɨrɨ kuae ɨvɨ pegua tëta reta güi, jae ko cananeo reta, heteo reta, ferezeo reta, jebuseo reta, amonita reta, moabita reta, Egiptoɨgua reta jare amorreo reta güi, oyapo reta teko pɨ̈chɨi jae reta rami.

2Echa jae reta jare taɨ reta güɨreko jókuae ɨvɨ pegua reta tayɨ, jökorai Tumpa jembiparavo reta oyea ïru tëta pegua reta ndive. Mburuvicha reta etei tenonde oyapo kuae mbaeyoa.”

3Aendu kuae yave, amondoro cheremimonde jare cheñeapevaka chepɨatɨtɨ güi, amondoro chea jare cherendɨvaa, jare aguapɨ chepɨatɨtɨ yae reve.

4Jare oyemboatɨ reta aïa pe opaete okɨɨye Israel iTumpa güi vae, tembipɨɨ güi oyerova ye vae reta oyavɨ oikuaa reve jeko pegua, ërei che chepɨatɨtɨ yae apɨta mɨmba oyeyukagüe oñemee vae iora regua kaaru yave,

5jayave ramo apüa chepɨatɨtɨa güi, cheremimonde jare cheñeapevaka osoro reve ayetavatɨka jare ayerure aupi reve chepo cheYa Tumpa pe,

6jare jae: “Cheru Tumpa, chemara jare mbaetɨ aikuaa mbae jae vaerä ndeve cheTumpa, echa oasa ete oreyoa, jare orereko reta oupitɨ ara.

7Oreñemuñagüe reta yogüɨreko güive voi ma roiko mbaeyoa rupi, orereko pɨ̈chɨi jeko pegua, ore, oreruvicha guasu reta, jare oresacerdote reta ndive, opa roñemeeuka ïru ɨvɨ pegua mburuvicha guasu reta ipo pe, royeyukauka, royererajauka oreɨvɨ güi, ropɨ̈rouka orembaembae, ñemomarai rupi roiko añave regua.

8Jare añave michi pegua nde oreYa Tumpa remboyekuaa ndeporoparareko royeyora vaerä mbovɨ ropɨtagüe pe, remee vaerä oreve jókuae ɨvɨ nde rerökuavee oreve vae, remee ye roï kavi pɨau ye vaerä royeokuai pɨte pe.

9Echa tembiokuairä roiko, ërei royeokuai pɨte pe nde oreTumpa mbaetɨ orereeya, nde oreparareko mburuvicha guasu reta Persia pegua jóvai, oremoäta ngatu romopüa pɨau ye vaerä tupao guasu oyemboai vae, ¡oreangareko Judá pe jare Jerusalén pe!

10Ërei añave, ¿mbae pa roeta ndeve oreTumpa opaete royapogüe jaɨkue rupi? Echa mbaetɨ royapo ndeporookuai reta,

11remee nderembiokuai ñeemombeúa reta rupi vae, rere reve: ‘Jókuae ɨvɨ peikota pɨpe vae, jare peipɨɨta pembaerä vae pe yogüɨreko vae reta güɨrokomegua jeko ikavimbae pe, omotɨnɨe reta jókuae ɨvɨ jeko pɨ̈chɨi pe.

12Añave, agüɨye perayɨ reta pemomenda jae reta taɨ ndive, ani jae reta tayɨ peraɨEx 34.11-16; Dt 7.1-5. reta ndive, agüɨye peyapo mbɨakatu jae reta ndive ani jeta mbae güɨnoi reta vae re; jökorai mbaepuere penoi vaerä jare peyekou vaerä jókuae ɨvɨ ipo reta re, jare peeya vaerä peraɨ reta imbaerä jekuae avei pegua.’

13Ërei opaete kuae mbaembae oasa ore ndive orereko ikavimbae jeko pegua, jare oreyoa yae jeko pegua, nde oreTumpa mbaetɨ reiporarauka oreve orereko kavimbae rupi etei, remaeño mbovɨ roikove vaerä.

14¿Royavɨ yeta yera ndeporookuai reta, jare roiko ye jeko ikavimbae vae reta ndive? ¿Ngaraa yera ndearasɨ orekotɨ jare opaetei oremokañɨtei?

15OreYa Tumpa, Israel iTumpa, nde ko jupi vae, echa nde oremoembɨreuka mbovɨ añave rami. Ko roï nderóvai oreyoa reve, mbaetɨ jupi roï vaerä nderóvai kuae jeko pegua.”