NEHEMÍAS 13 - Guarani Bible with DC

Nehemías omaeñono kavi ye

1Jókuae ara rupi oyemongeta Moisés jembikuatía, jare opaete vae reta oendu oyekuatía oï pɨpe, kërai tëta Tumpa imbae vae reta agüɨyeta kërai ave oñemoïru Amón iñemuña reta jare Moab iñemuña reta ndive vae.

2Echa jae reta ñogüɨnoe vaerägüe oövaiti Israel iñemuña reta tembíu ndive jare ɨ ndive, omboepɨ reta Balaam pe, jae oyepopeyu vaerä Israel iñemuña reta kotɨ;Nm 22.1-6. ërei ñaneTumpa oipoepɨ yepopeyu, mborerekua pe.Dt 23.3-5.

3Javoi, jae reta oendu mbae ko mborookuai jei vae yave, omboyao reta Israel iñemuña reta güi opaete oyea jugüɨ ketɨgua reta ndive vae.

4Ndei kuae oasa mbove, sacerdote Eliasib, ñaneTumpa jo pe mbota reta oñeñovatúa iyangarekoa ndive yepe Tobías oñemoëtara,

5jare oiporuka yepe chupe cuarto tuicha vae oñeñovatuse pɨpe mbota reta vae, ikäti kavi vae incienso, tembiporu reta, jare payandepo güi metei oñemee trigo vae, vino vae, jare olivo iasaite reta güi vae, echa joko güi ko oñemeese yepi levita reta pe, otairari vae reta pe, öke iyangarekoa reta pe, jare vi mbota sacerdote reta peguarä oñemee vae.

6Opaete kuae mbaembae reta oasa yave, che mbaetɨ aï Jerusalén pe, echa mburuvicha guasu Babilonia pegua Artajerjes treinta y dos año ma oiko mburuvicharä yave, aja ye ípɨri; ërei mbovɨ año rupi aiporu ye mburuvicha guasu pe,

7ayu ye vaerä Jerusalén pe. Jayave aikuaa Eliasib oyapo ikavimbae vae, oiporuka ramboeve Tobías pe metei cuarto tuicha vae Tumpa jo pegua.

8Jókuae chemboarasɨ yae; jare opaetei anoe amombo ikatu kotɨ Tobías imbaembae.

9Javoi aporookuai oitɨo reta vaerä Tumpa jóvai jókuae o, jare güeru reta ye vaerä joko pe mbaembae Tumpa jo pegua, mbota reta jare ikäti kavi vae incienso.

10Jare aikuaa vi kërai levita reta pe mbaembaeDt 12.19. oñemeeta tëi vae, mbaetɨve ma oñemee vae, jáeramo, levita reta tupao guasu pe oyeokuai vae reta jare otairari vae opa yogüɨraja jëta jëta ae kotɨ.

11Jayave amboeta tenondegua reta pe, Tumpa jo re mbaetɨ etei oyangareko reta jeko pegua. Javoi amboatɨ ye sacerdote reta jare levita reta, añono ye jembiapo ae ae pe,

12jare opaete vae Judá pegua güeru tupao guasu pe imbaembae payandepo vae güiMal 3.10. metei vae: Güeru reta trigo, vino, asaite.

13Javoi añono mbaerɨru re oyangareko reta vaerä sacerdote Selemías, ombaekuatía vae Sadoc, levita reta güi Pedaías jee vae; jare jae reta imborɨarä añono Hanán, Zacur taɨ, Matanías jɨmɨmino, echa jeko kavi reta. Jae reta ñogüɨnoita omboyao vaerä mbaembae jëtara reta pe.

14¡CheRu Tumpa: Nemaendúa kuae ayapogüe re, agüɨye neakañɨ ikavi vae ayapo kuae ndero jo kotɨ vae, jare mbaemboete oñemee pɨpe vae kotɨ vae!

15Jókuae ara rupi aecha oime amogüe Judá pegua reta oyapo vino ara mbutuu pe vae, trigo oyeokuagüe ovoɨ vae reta, jare ovoɨ vi vino imburika re, ani uva, ɨva jare oipotagüe voɨta güeru reta JerusalénEx 20.8-10; Dt 5.12-14; Jer 17.21-22. pe ara mbutuu pe. Jayave añeengata chupe reta jókuae ara omaemee vae re.

16Jare oime vi joko pe Tiroɨgua reta; jae reta güeruñoi pira jare oipotagüe mbaembae omee judío reta Jerusalén pegua reta pe, ara mbutuu pe.

17Jayave añeengata mburuvicha Judá pegua reta pe, jare jae chupe reta:

—¡Peyapo ko ikavimbae, pemboeteä ramboeve ara mbutuu!

18Körai etei ko peru reta oyapo vi, jáeramo ko Tumpa ombou jeta mbaesusere yanderé jare kuae tëta re. ¿Peipota vɨteriño pemoïru ye Tumpa iyarasɨ kuae Israel re, pemboeteä ramboeve ara mbutuu?

19Jare pɨareve ma ara mbutuuta yave, ayókuai oyeokenda vaerä Jerusalén jöke, jae mai pɨtumimbita yave, jare agüɨye vaerä oyepea ara mbutuu oasa regua. Jare añono vi joko pe amogüe cherembiokuai oyangareko vaerä, agüɨye vaerä oyereroike Jerusalén pe mbae nunga voɨta ave.

20Jare mbovɨ ye rupi opɨta reta oke Jerusalén güi ikatu pe opaño mbaembae omee vae reta,

21jare che amboeta chupe reta, jae reve:

—¿Maera pa pepɨta ikatu pe? Ërei peyapo ye jókuae yave, opata popɨɨuka.

Jókuae güive mbaetɨ ye yogüeru reta ara mbutuu pe.

22Jare ayókuai levita reta oyetɨo vaerä, opa vaerä yogüɨraja reta oyangareko tëta jöke re, agüɨye vaerä oyemboeteä ara mbutuu. ¡CheRu Tumpa, neɨ̈ro cheve, ndeporoparareko tuicha rupi!

23Aecha vi jókuae ara rupi, kërai Judaɨgua reta omenda kuña Asdod pegua reta ndive, Amón jare Moab iñemuña pegua reta ndive;

24jare jeta imichia reta güi imiari ñee Asdod pegua pe, jare ïru ñee reta peño, echa mbaetɨ oikuaa reta imiari ñee Judaɨgua pe.

25Jare ayoaka jae reta ndive, cheñeeasɨ katu ikotɨ reta. Amogüe chugüi reta ainupa, amondoro ia chugüi reta, jare jaeuka chupe reta Tumpa rovake agüɨye mo vaerä omomenda tayɨ reta ketɨgua reta ndive, jaeramiño vi taɨ reta, ani vi jae reta etei.Ex 34.11-16; Dt 7.1-5. Jare jae vi chupe reta:

26“¿Jökoraiä pa Salomón, mburuvicha guasu Israel pegua iyoa? Yepe tëi mbaetɨ ye ïru tëta pe jae rami vae mburuvicha guasu, kërai iTumpa oaɨu omae jese,2 S 12.24-25. jare oñono mburuvicha guasurä opaete Israel re, ërei kuña ketɨgua reta oitɨ mbaeyoa pe.1 R 11.1-8.

27Jáeramo, ngaraa oñemaeño peré, peyapo vaerä kuae ikavimbae yae vae, peyoa vaerä ñaneTumpa kotɨ, pemenda ramboeve kuña ketɨgua reta ndive.”

28Jare metei Joiada taɨ, sacerdote tenondegua Eliasib jɨmɨmino amombo cheɨpɨ güi; jókuae kuimbae ko SanbalatNeh 4.1. horonita jovaya.

29¡CheRu Tumpa: Agüɨye neakañɨ kuae omongɨa sacerdote pegua mbaravɨkɨ vae, jare morogüɨrökuavee päve oyeapo sacerdote reta jare levita reta peguarä vae!

30Jökorai opa aitɨo ketɨgua reta jókuae ɨvɨ güi, jare añono sacerdote reta jare levita reta kërai yave oparavɨkɨta vae jare mbae oyapo retata vae;

31jare opaete vae reta güeru vaerä mbaagüɨyerɨpɨ reta vae, jare kërai yave güeru reta vaerä mbota yepea vae. ¡CheRu Tumpa! ¡Nemaendúa cheré ikavi vae rupi!