ESTER (gr) 8 - Guarani Bible with DC

Mborokauai judío reta oepɨ vaerä vae

1Jókuae ara voi mburuvicha guasu Artajerjes opa omee Ester pe opaete mbae tovaicho Amán imbaembaegüe reta. Jaema jayave Ester jei mburuvicha guasu pe Mardoqueo jae ko jae jëtara vae, jaema mburuvicha guasu omondo oenɨi.

2Jaema jayave mburuvicha guasu oekɨ iyeugüi moäka-vera Amán güi oekɨ yegüe vae, jare omee Mardoqueo pe. Joko güi, Ester, omee chupe jae oyangareko vaerä opaete mbae Amán imbaegüe reta re.

3Joko güi Ester imiari ye mburuvicha guasu ndive, jare oyevatɨka ipɨ iárambo reve, oiporu chupe opa vaerä omboai mborookuai Amán oyapogüe vae jare opaete mbaembae reta judío reta kotɨ oyapo vae.

4Jare mburuvicha guasu omopovee Ester kotɨ ipopoka oro pegua vae. Jayave jae opüa, oyemboɨ jae jóvai

5jare jei:

—Cheruvicha pe jaekaviño yave, jare cheruvicha añetete ko chepota yave, toikuatía metei mborookuai opa vaerä oyemboai tembikuatía Amán omondogüe vae, echa jókuae pe jei opa vaerä judío reta oyeyuka kuae ɨvɨ pe yogüɨreko vae.

6Echa, ¿këraita pa chepɨaguasu aiko kuae ikavimbae vae outa oï cherëta ipo reta pe vae pe, jare këraita che aasayepe, cherëta opata oyemboai oï vae?

7Jaema jayave mburuvicha guasu jei Ester pe:

—Che amee ma ko ndeve Amán imbaembaegüe reta, jare ambosagüɨuuka ma ko jae oipota judío reta opa oyuka jeko pegua. Ërei oimeño mbae reipota ye yave,

8taikuatiauka ndeve, che cheree re, mbae ipöra ndeve vae. ¡Jare toyembosello jókuae tembikuatía chesello pe, echa metei tembikuatía oyeapo mburuvicha guasu jee re vae jare chesello pe oyembosello vae ngaraa ye ma ko oyemboai!

9Jaemai mburuvicha guasu jembiokuai reta oenɨi. Jae ko veintitré ara ma tenondegua yasɨ pe yave, Nisán iyasɨ re, jókuae año reño, jare oyeapo tembikuatía opaete judío reta pe Mardoqueo omondo vaerä jei ciento veintisiete provincia rupi ñogüɨnoi vae mburuvicha reta pe India güive Etiopía pe ojo iyapi vae, provincia ñavo iñee ñee ae pe.

10Jare tembikuatía oyeapo ko mburuvicha guasu jee re, jare opa ma oyembosello mburuvicha guasu isello pe yave, güɨrajauka reta ñeereroataa reta ndive.

11Jókuae pe mburuvicha guasu omondo jei opaete judío reta pe, oipotagüe tëta rupi ñogüɨnoia rupi, yogüɨrekoño vaerä jae reta mborookuai güɨreko vae rupi aeño, jare oyeepɨ vaerä jare oyapo vaerä jae reta jeigüe jovaicho reta pe.

12Jare jókuae oyeapo vaerä jókuae araño opaete vae Artajerjes iɨvɨ iyapɨ rupi; jókuae ara oyembojee vae jae ko ara trece pe yasɨ docea re, Adar iyasɨ pe.]

12aKuae jae ko jókuae tembikuatía güi oyeekɨgüe vae:

12b“Mburuvicha guasu Artajerjes omondo tamaraeme opaete mburuvicha reta ñogüɨnoi ciento veintisiete provincia rupi vae pe, India güive Etiopía pe iyapɨ vae pe, jare ïru vae tëta ipo yogüɨreko vae reta pe.

12cOime jeta yogüɨreko, kia omboete reve jare oiparareko jese reve vae, jaema oyembotuicha ma yogüɨreko vae, jaema jókuae nunga reta opoko omotareɨ ïru vae reta vi oime cheɨvɨ pe yogüɨreko vae, jare mbaetɨ ma oikuaa yomboete reve yogüɨreko vaerä jeko pegua, jaema opoko reta ma oyembongeta kaviä ipararekoa reta kotɨ.

12dMbaetɨ yangapɨɨ reta jókuae oyemongeta kaviä ïru kuimbae reta kotɨ vae reve, opoko oyembotuicha reta yarakuambae reta oyepopete jese vae pe, jare opoko oyemongeta reta oasayepe retata vi ko Tumpa iporonupa güi vae, jae ko jae opaete mbae oecha vae jare ikavimbae omotareɨ vae.

12eMburuvicha reta amo yave omee mbae oyapo vaerä kuimbae ivɨaka oyapo vae, ërei amo yave jókuae nunga reta oyapo iñeïrurä oyukauka vaerä jekombae vae reta jare jókuae rupi oyapo mbae ikavimbae vae;

12fjare jökorai tavɨ rupi oyapo mburuvicha omoipɨ̈chɨi vaerä jeko kavi oiko vae.

12gJare kuae nunga teko mbaetɨ ma yaecha arakae vae teko peño, añave vi joko yaecha ñanoi. Ñamae rupive yaechata jeta yeyuka reta jókuae nunga mburuvicha oporoaɨumbae reta oyapogüe vae.

12hJókuae ramo, cheyemongeta amomɨ̈rata anoi kuri peguarä opaete kuimbae reta yogüɨreko pɨagüive vaerä jare ikavi rupi,

12iapoko ambopɨau mbae oï kavimbae reta jare amae kavi reve opaete teko reta ou chepo pe vae re.

12jChe aipɨɨ mboupa rami jókuae Macedonioɨgua Amán, Amedata taɨ, ko yepe Persiaɨgua eteä yepe, jae yepe ketɨgua jókuae ramo matɨ yae ko opɨta che chereko güi;

12kjaema jae kuae pe ramo oikuaa che cheporoparareko opaete tëta reta ndive vae, jare jökorai ojo oyembojee vaerä oiko ‘mburuvicha guasu turä’, jare opaete vae omboete vaerä che chemboete vae rami.

12lËrei jae mbaetɨ oikatu oiko vaerä jókuae mborookuai pe, jaeño ma jae oyemongeta opa vaerä opɨ̈ro chegüi cheporookuaía jare cherekove,

12mjare opoko vaerä oyapo yemongeta tavɨ rupi Mardoqueo oyeyuvɨ vaerä, jókuae ko jae chereroasayepe oiko vae jare jeta ikavi vae oyapo chekotɨ vae, jare Ester kotɨ, jae ko cheïru ikavigüe vae cheporookuaía pe vae, jaeramiño vi opaete jëta ipo reta rupi.

12nJaema kuae rupi jae oipota omanaro cheré jare oekɨ vaerä mbaepuere Persiaɨgua reta güi, jare omee vaerä Macedoniaɨgua reta pe.

12oËrei che apoko aparandu judío reta regua, jae ko kuae ikavimbae vae oipota opa omokañɨtei güɨreko vae reta, jae reta jeko kavimbaeä ko, jae reta ko mborookuai jupi vae rupi yogüɨreko vae

12pjare Tumpa, ɨvate ete pe oï vae jare oikove vae taɨ reta ko, jae ko omee cheve jare cheñemuña reta pe roiko vaerä kuae ɨvɨ ikavigüe vae pe.

12qJaema jökorai, agüɨye toyeapo tembikuatía rupi Amán omondo jeigüe vae, echa jae, oyapo opaete jókuae oiko vae, jare añave jae oyeyuvɨ ma opaete jëtara reta ndive kuae tëta Susa jöke jóvai. Jare jökorai Tumpa, opaete mbae re imbaepuere vae, omee chupe jae oeka oiko vae.

12rKuae tembikuatía güi oyekuatía yoapɨ yegüe vae toñeñono oipota rupi oyeecha kavitaa pe. Jare toñemee judío reta pe yogüɨreko vaerä mborookuai güɨreko vae rupiño. Jare ïru vae reta ipuere vi omee yemborɨ judío reta pe, oepɨ vaerä kia oipota opoko jese reta ara trece pe yasɨ docea re, Adar iyasɨ pe, oime mbae oasata ñogüɨnoi pegua.

12sEcha Tumpa, jae ko opaete mbae iYa, jae oyapo kuae ara oiko vaerä yerovia pegua jare agüɨye vaerä oiko tëta oyeparavogüe reta oñemokañɨtei vaerä.

12tJare pe, judío reta, opaete pearete reta jare yemomaendúa reta pereko vae rupi, pemboareteta kuae ara tuichagüe vae, oiko vaerä, añave güive arakae pegua reve, yaiko vaerä mbaeyekou rupi che jare Persiaɨgua reta päve ikavigüe vae, jaeramiño vi opaete cherovaicho reta pegua, imaendúa vaerä yogüɨreko ikañɨtei re.

12uOime yave kia nunga tëta ani región mbaetɨ oyapo kuae mborookuai jeigüe vae, opata oñemokañɨtei mboka pe jare tata pe. Jare ngaraa ye ma kia oya jese, mbaeporou reta ave jare güɨra reta opata okɨɨye chugui.

[

13Kuae tembikuatía güi oyekuatía yoapɨ yegüe toñemoërakua opaete pe, jare judío reta jókuae ara oïndaivi vaerä ñogüɨnoi oñoraro vaerä jovaicho reta ndive.”

14Jare jaemai ñeereroataa reta oë joko güi jarembae pegua, kavayu re, oyapo vaerä mburuvicha guasu jeigüe vae, jare jókuae mborookuaiño vi oñemoërakua ma vi Susa tëta pe.

15Jare Mardoqueo oë ojo mburuvicha iporookuaía güi temimonde ikavigüe vae ndive, jare metei corona oro pegua vae jare turbante lino pegua vae moropɨ̈ta vae güɨraja iñäka re. Jare omae vae reta jókuae oecha rupive, jae ko Susa ipo reta opa oyerovia,

16jare opaete judío reta pe opɨta jókuae yerovia tembipe rami.

17Jare opaete tëta reta oï provincia rupi vae jókuae mborookuai oñemoërakua vae, täta judío reta opa omboyerovia, jare omboarete reta. Jare jeta kuimbae jókuae tëta pegua reta, judío reta güi okɨɨye jeko pegua opa oyembocircuncida oyeapo vaerä vi judíorä.