JOB 2 - Guarani Bible with DC

1Jare ïru ara pe araɨgua reta yogüeru yandeYa jóvai yave, Satanás vi ou jae reta ipɨte pe yandeYa jóvai.

2Jare yandeYa jei Satanás pe:

—¿Ketɨ güi pa reyu?

Jare Satanás jei yandeYa pe:

—Ɨvɨ rupi ayere aguata aikoa kotɨ güi.

3Jare yandeYa jei Satanás pe:

—¿Remae pa cherembiokuai Job re? Kërai mbaetɨ yé ïru kuimbae kuae ɨvɨ pe jae rami vae, jupi jare jeko sɨmbi vae, oipoɨu chegüi vae jare oyeandu ikavimbae güi vae, yepe nde chemoñera tëi ayapo vaerä ikavimbae vae chupe jekombae reve, ërei jae jekuaeño ipɨ̈rata jeko kavi pe.

4Satanás jei yandeYa pe:

—Jekove oaɨu pɨpei, kuimbae omeeta ko opaete imbaembae, güɨroasayepe vaerä jekove.

5Ërei yaecha añave epoko ikägüe re jare isoo re, jare reechata mbaetɨta ra ndeangao nderova pe etei vae.

6Jare yandeYa jei Satanás pe:

—Mase, ko jae oï ndepo pe, ërei chupe etei agüɨye mbae eyapo.

7Jayave Satanás oë yandeYa jóvai güi, jare omombaerasɨ Job, kuru yavaete yae vae pe; ipɨ güive ojoi iyapɨte pe oväe.

8Jare Job oguapɨ tanimbu re, oipɨɨ takɨpe jaɨgüe oñekari vaerä pɨpe.

9Jayave jembireko jei chupe:

—¿Jekuaeñota pa reñovatu ndereko kavi? ¡Neñeeasɨ Tumpa kotɨ, jare emano!

10Jayave jae jei chupe:

—Oipotagüe kuña iyarakuaambae reta rami neñee. ¿Kërai pa? ¿Ikavi vaeño pa ñanoita Tumpa güi jare mbaesusere mbaetɨta pa?

Opaete kuaekuae rupi, Job mbaetɨ iyoa iñee rupi ave.

11Jare mboapɨ Job ivɨa-ïru reta: Elifaz Temán pegua, Bildad Súa pegua jare Zofar Naamat pegua; oendu reta opaete kuae ikavimbae ou chupe vae yave, yogüeru reta metei ñavo yogüɨrekoa kotɨ güi; echa oñomomiari reta yogüeru päve vaerä ipɨatɨtɨ jese jare ombopɨakatu vaerä.

12Kuae reta, mombɨrɨ güive omopüa iñäka omae, ërei mbaetɨ oikuaa reta, jare jäse oyaeo reta; jare metei ñavo vae omondoro jemimonde ipɨatɨtɨ güi, jare mboapɨ reve omoai reta ɨvɨkúi ara kotɨ iñäka iárambo, omboyekuaa ipɨatɨtɨ.

13Jökorai oguapɨ reta jae ndive ɨvɨ pe, chiu ara jare chiu pɨ̈tu rupi, mbaetɨ metei ave omoë iñee, echa oecha reta tuicha yae oiporara mbae jasɨ.