ECLESIÁSTICO 14 - Guarani Bible with DC

1¡Oyerovia katu kuimbae jeigüe rupi mbaetɨ oiporara vae

jare kia iyemongeta mbaetɨ omboeko vae!

2¡Oyerovia katu kuimbae kɨ̈reɨ oatambae chupe vae

jare iporoäro mbaetɨ omokañɨ!

Mbaeyekou yaiporu vaerä

3Jäkateɨ vae ngaraa güɨnoi mbaeyekou;

agüɨye togüɨnoi oro jäkateɨ vae.

4Kia ñavo iyeupe ae jäkateɨ vae, omboatɨ ïru vae pegua:

Kia ambuae vae oyekouta imbaembae re.

5Kia ñavo iyeupe ae jäkateɨ vae, ¿kia ndive ra ipɨakavita?

Mbaetɨ oekɨ ikavi vae mbae imbae ae güi ave.

6Mbaetɨ kia oasa ete iyeupe aeño jäkateɨ vae rami:

Jaeiño oiporarauka iyeupe jäkateɨ güi.

7Ikavi vae oyapo yave, oñemoakañɨ güi ko;

iyapɨ pe omboyekuaata ko jäkateɨ vae.

8Kia ikavimbae ko jäkateɨ vae;

oyerova omae oyangarekoä ko kia re.

9Imaepɨ̈ro vae pe opaete mbae güɨnoi vae mbovɨecha chupe;

ërei opɨ̈ro ramboeve ïru vae reta güi, imbae omokañɨ.

10Jäkateɨ vae oyúe omae mbɨyape re,

ërei mbaetɨ mbae oñono imesa pe.

11Cheraɨ michi, oime mbae renoi yave, embojembiapo ndeyé

jare ndepɨakavi Tumpa ndive.

12Nemaendúa mano ou seri ma ko.

Mbaetɨ kia jei ndeve yerae ko remanota vae.

13Ndei remano mbove eyapo ikavi vae nechëi reta pe

jare emee chupe reta ndepueregüe rupi.

14Agüɨye eeya yerovia añave pegua,

jare agüɨye easaiño ikavi vae yaipota rape vae iárambo rupi.

15Echa reeyata ïru vae pe ndembaeyekou

jare omboyao yaota oyoupe nderɨai pe reväegüe.

16Emee nderɨvɨ reta pe jare eiko kavi,

echa tɨvɨa pe mbaetɨ ma ko oyeeka yerovia.

17Opaete mbae oikove vae opa vae ko temimonde rami,

echa mborookuai iyapɨmbae ko jaema ñamano tai ko.

18Yaiko ko metei ɨvɨra jovusu vae rami:

Amogüe opa ipiru jare ïru vae jeñɨi.

Jökorai vi oasa kuimbae reta ndive:

Amogüe omano jare ïru vae oa ye.

19Opaete kuimbae oyapogüe, oyemboai iyapɨ pe;

opaete iparavɨkɨ opata okañɨ jae ndive.

Mbaeyekou arakuaa pegua

20Oyerovia katu ko arakuaa re oyemoambeko vae

jare oeka güɨnoi vaerä arakuaa katu,

21omae kavi tape jae omomoe vae re,

jare omae vi tape reta re;

22jökorai ipuere oë oeka

jare omae ketɨ ko oï vae.

23Omae jae jo iventana reta rupi

jare oyeapɨsaka jöke pe.

24Oyembojeyupa jo iyɨpɨ pe,

joguambɨ re oñapɨti itondo iïcha.

25Oñono jo jae iyɨpɨ pe

oiko kavi vaerä jëta-ɨpɨ pe.

26Oñono jaitɨ jäka reta re

jare joo päu rupi omboasa pɨ̈tu.

27Jae iküaraɨa pe oñemi araku güi,

jaema jese oñeomi oiko.