2 REYES 5 - Guarani Bible with DC

Eliseo jare Naamán

1Mburuvicha guasu Siria pegua isundaro reta itenondegua ete ko Naamán,Lc 4.27. jae ko tuicha yae juvicha guasu jóvai vae, jare oaɨu yae, echa Naamán rupi yepe yandeYa güeru yeyora Siria peguarä. Kuae kuimbae yepe jëia yae, ërei ipire ókui imbaerasɨ.

2Siria güi yepe ñogüɨnoeñoi metei äpɨta sundaro reta; jare oipɨɨ reta tembipɨɨrä güɨraja vae güi yepe metei kuñatai Israel pegua oyeokuai oiko Naamán jembireko pe.

3Kuae kuñatai jei iya kuña pe:

—Cheya omoñera ñeemombeúa Samaria pe oï vae yave, ombogüerata ko ipire mbaerasɨ ókui vae güi.

4Naamán oike juvicha guasu oïa pe, imiari chupe körai:

—Jökorai jei metei kuñatai ɨvɨ Israel pegua.

5Jare Siria pegua mburuvicha guasu jei chupe:

—Ekua, che amondota tupapire mburuvicha guasu Israel pegua pe.

Jare ojo. Güɨraja treinta mil reare korepoti pegua, seis mil reare oro pegua, jare payandepo yepoepɨ pegua temimonde,

6güɨraja vi tupapire Israel pegua mburuvicha guasu peguarä körai jei vae: “Kuae tupapire ojo yave oväe ndeve, reikuaata amondo ko aï ndeve cherembiokuai Naamán, rembogüera vaerä ipire mbaerasɨ ókui vae güi.”

7Mburuvicha guasu Israel pegua omongeta güire jókuae tupapire, omondoro jemimonde ipɨatɨtɨ güi, jare jei:

—¿Tumpa yera che, tekove oekɨ vae jare omee ye tekove vae, ombou vaerä kuae cheve, metei kuimbae ambogüera vaerä ipire mbaerasɨ ókui vae güi? ¡Peikuaa kavi añave, oeka kërai chemboeko vaerä jare oporepeña vaerä cheré!

8Eliseo, Tumpa iñeemombeúa oikuaa mburuvicha guasu Israel pegua omondoro jemimonde yave, omondo jeiuka mburuvicha guasu pe: “¡Remondoroiño ma nderemimonde! Tou jókuae kuimbae chekotɨ, oikuaa vaerä oime ko ñeemombeúa Israel pe vae.”

9Jare ou Naamán ikavayu reta ndive jare ikäretou reta ndive oyemboɨ Eliseo jo jöke pe.

10Jayave Eliseo omondo ikotɨ metei ñee jerajaa, jei körai: “Ekua, jare eyeyoe chiu ye ɨ̈aka Jordán pe, jare rekuerata.”

11Javoi Naamán iyarasɨ ojo, jei körai:

—Che yepe jae cheyeupe: “Jupiveiño jae oëta omae cheré, oyemboɨ reveño oenɨita iYa Tumpa jee, jare oupita ipo jare opokota mbaerasɨ jenda re, jare okuerata chepire mbaerasɨ ókui vae.

12Abana jare Farfar ɨ̈aka reta Damasco pegua, ¿mbaetɨ pa ikavi opaete ɨ reta Israel pegua güi? Ayeyoe pɨpe reta yave, ¿mbaetɨta pa akuera vi apɨta?”

Jare iyarasɨ oyerova ye ojo.

13Ërei ngatu jembiokuai reta oya ikotɨ jare omomiari reta körai:

—Cheruvicha, ñeemombeúa ndeokuai yave mbae yavai yae vae re, ¿mbaetɨta pa reyapo? ¿Mbae mbatee pa jei yave ndeve: “Eyeyoe, jare rekuerata”?

14Jayave jae ogüeyɨ ɨ̈aka Jordán kotɨ, jare osakambɨ chiu ye ɨ̈aka Jordán pe, Tumpa iñeemombeúa jei chupe rami etei; jare isoo opɨta michia raɨ isoo rami, okuera opɨta.

15Jare oyerova ye Tumpa iñeemombeúa kotɨ, jae jare opaete iguataïru reta ndive, jare oyemboɨ jae jóvai, jare jei:

—¡Añave aikuaa, mbaetɨ yepe Tumpa opaete ɨvɨ pe, jaeño oime Israel pe! Romoñera reipɨɨ vaerä mbae nunga mbota yepe, kuae che arugüe güi.

16Ërei Eliseo jei chupe:

—YandeYa jee re, jae jóvai aï vae jee re, mbaetɨta aipɨɨ ndegüi.

Yepe tëi Naamán omoñera, ërei Eliseo mbaetɨ oipɨɨ chugüi.

17Jayave Naamán jei:

—Jökorai ko yave, emaeño taraja cheyeupe ɨvɨ mókoi voɨta mókoi mburika guasu re kuae Israel güi. Echa kuae güire che ngaraa ye ma mɨmba oyeyukagüe opaetei oyeapɨ vae ani mɨmba oyeyukagüe amee ïru tumpa reta pe, jaeño yandeYa pe.

18Jaeño amoñera yandeYa iñɨ̈ro vaerä cheve metei mbae re: Cheruvicha guasu oike ombaemboete Rimón pegua tupao pe yave, jare oyepɨɨ yave cheyɨva re, che ayetavatɨka vi ko Rimón pegua tupao pe yave, yandeYa tiñɨ̈ro cheve jókuae ayapogüe re.

19Eliseo jei chupe:

—Ekua ikavi.

Naamán ojo joko güi. Ërei mókoi kilómetro oasa ma ojo yave,

20Giezi, Eliseo jembiokuai, oyemongeta ipɨa pe, jei: “Cheya omaeño ojo Naamán Siriaɨgua, oipɨɨmbae reve chugüi mbota güerugüe. CheYa jee re taaɨkuemoña aramoete pegua jare tamombɨta chugüi mbovɨ imbaembae.”

21Jare Giezi oaɨkuemoña Naamán; jare Naamán oecha jaɨkue osɨi ou yave, ogüeyɨ ikäretou güi omboresive vaerä, jare jei chupe:

—¿Kërai? ¿Oime mbae?

22Giezi jei:

—¡Ikaviño! Cheya chembou jae ndeve: “Ko yogüeru oväe chépɨri ɨvɨtɨ Efraín güi mókoi taɨrusu vae ñeemombeúa reta; romoñera remee vaerä chupegua retarä tres mil reare korepoti pegua, jare mókoi yepoepɨ pegua temimonde ipɨaugüe.”

23Naamán jei:

—Romoñera reipɨɨ vaerä seis mil reare korepoti pegua.

Naamán omoñera oipɨɨ vaerä chugüi, jare oyokua mókoi jɨru tres mil reare korepoti pegua vae, mókoi yepoepɨ pegua temimonde ipɨau vae ndive, jare omee opaete mókoi jembiokuai reta pe güɨraja vaerä Giezi jenonde.

24Jare yogüɨraja ma oväe reta ɨvɨtɨ re yave, Giezi oipɨɨ jókuae mókoi tembiokuai reta güi, jare oñovatu o pe; javoi opa omondo ye jókuae kuimbae reta.

25Javoi ojo oñeñono iya jóvai, jare Eliseo oparandu chupe:

—¿Ketɨ güi pa reyu, Giezi?

Giezi jei:

—Mbaetɨ ketɨ aja.

26Ërei Eliseo jekuae jei ye chupe:

—Kuimbae ogüeyɨ ikäretou güi ndemboresive vaerä yave, che joko pe aï cheyemongeta rupi. Añave mbaetɨ ikavi yamboresive vaerä korepoti, temimonde reta, ani yagua vaerä ko, uvarupa, vecha reta, güeye reta, tembiokuai kuimbae reta jare tembiokuai kuña reta.

27Kuae jeko pegua Naamán ipire mbaerasɨ ókui vae ovata nderé jare neñemuña reta re jekuae avei pegua.

Jare Giezi osɨrɨ Eliseo güi yave ipire ókui imbaerasɨ, morotï oyekuaa iroɨ rami.