Daniel (dc) 3 - Guarani Bible with DC

Azarías iyerure

24Sadrac, Mesac jare Abed-negó oguata reta tataendɨ rupi oyemongoi reve jare omee reta mbaemboete Tumpa pe, jae ko yandeYa vae.

25Jayave ma Azarías, tata pɨte pe, omboɨpɨ oyerure jare jei:

26“Ndetuicha vae ko nde, cheYa, ore ñemuñagüe reta iTumpa. Ndeve toiko mbaemboete, nderee yerovia tuicha vae opambae vae.

27Nde ko jae jupi vae opaete mbae reyapo oreve vae rupi. Opaete reyapogüe rupi añetegüe ko nde; reregüe vae isɨmbi vae ko; nde jaeñoi ko reporojäa jupigüe rupi.

28Nde reporojäa ko jupigüe rupi, rembou ramboeve oreve opaete kuae tembiporara reta jare Jerusalén iárambo, oreñemuñagüe reta jëta ikɨambae vae. Tembiporara añetete jupi rupi vae orembaeyoa jeko pegua rembou oreve opaete kuae.

29Royapo mbaeyoa jare royapoä mborookuai reta oreyeugüi ae oë vae jaema jökorai ropia nde güi. Opaete mbae rupi orembaeyoa. Royapoä ndeporookuai;

30mbaetɨ royapo jare roiporúä etei, nde rere oreve royapo vaerä rami jare jayave roiko kavi vaerä.

31Jökorai, opaete pɨ̈chɨi vae reta rembou oreve vae, opaete mbae reyapo oreve vae, metei tembiporara añetete jupimbae vae ko.

32Opa oremee tovaicho ikavimbae vae pe, kuimbae reta iTumpa mbae pe jare juvicha mbae pe, metei mburuvicha guasu jeko kavimbae pe, oasa ete opaete ɨvɨ pe vae.

33Añave orepuereä oreyuru roipea vaerä ave. Oyeokuaise ndeve vae jare ndemboetese vae reta joko oyeasoi ñogüɨnoi yemongɨa pe jare ñemomarai pe.

34Ndepɨakavi jeko pegua, agüɨye opaete orereeya, agüɨye neñemoïru ore ndive vae opa emboai.

35Agüɨye ndeporoparareko eekɨ oregüi. Eyapo nechëi Abraham jee re, nderembiokuai Isaac jee re jare Israel oñeñono tee ndeve vae jee re.

36Nde ko rerökuavee chupe reta iñemuña reta yogüɨrekota jeta rupi yasɨtata reta ara re oï vae rami jare ɨvɨkuitï jäɨ ɨguasu embeɨ rupi oï vae rami.

37Ërei, cheYa, royu má oremichi roiko vaerä oipotagüe ïru vae tëtaguasu reta güi; ore mbaeyoa jeko pegua roñemomarai roiko opaete ɨvɨ rupi.

38Añave rupi mbaetɨ ma rogüɨreko mburuvicha guasu ave jare ñeemombeúa ave tuvicha ave, mɨmba oyeyukagüe opaetei oyeapɨ vae ave mɨmba oyeyukagüe ave mbota romeeta ndeve vae ave, incienso ave ani kia pe romee vaerä ndeve mbae iägüe tenondegua vae ave jare jökorai ndeporoparareko roväe ye vaerä.

39-40Ërei kuae mɨmba oyeyukagüe añave romee roï ndeve vae, orepɨatɨtɨ reve jare espíritu imara reve, eipɨɨ nde vecha jare guaka oyeyuka oyeapɨ vae rami jare jeta yeyé vecha reta ikɨra vae rami. Orepuere ye vaerä roiko opaete reve rerea re, echa güɨrovia nderé vae reta ngaraa ma jaangaiño yogüɨreko.

41Añave roipota roiko ye rerea re orepɨa reve, romboete ko, roipota romboyerovia; agüɨye emaeño toroiko jaangaiño.

42Emae kavi oreré ndepɨakavi rupi jare tuicha ndeporoparareko reve.

43¡Oremboasayepe, cheYa, nde mbaepuere mɨakañɨ vae pe; eechauka nderee yerovia tuicha vae ko!

44Eyapo timara topɨta jare timichi toiko reta nderembiokuai reta re oyuvanga vae reta. ¡Eekɨ chugüi reta mbaepuere, jare emboai ipɨ̈rata!

45Jare tandekuaa reta nde jae ko Tumpa vae, jaeño ko Tumpa vae, yerovia tuicha vae opaete ɨvɨ rupi vae.”

46Kuimbae reta mburuvicha guasu pe oyeokuai vae reta jae ko opa kunumi reta omoinge horno pe vae, mbaetɨ etei oeya oapɨñambae tata kërosee pe, iraitɨ pe, temimonde indechigüe pe jare ñairaka pe.

47Jare tataendɨ reta, opüa veintidó metro oasa yé horno iárambo rupi,

48oë jare opa oapɨ Caldeaɨgua reta horno iyɨpɨ rupi ñogüɨnoi vae reta.

49Ërei Tumpa iaraɨgua ogüeyɨ horno pe oï vaerä Azarías jare iñeïru reta ndive, jare opa omoe horno güi ikatu kotɨ tataendɨ,

50jare oyapo horno japɨpe ɨvɨtu iröɨsa vae oipeyu vae rami. Jare tata oyaä etei jese reta mbaetɨ etei maratu oyapo reta kërai äve.

Mboapɨ kunumi vae reta iyemongoi

51Jayave mboapɨ vae reta, horno japɨpe pe, omboɨpɨ oyemongoi reta metei rami metei yemongoi Tumpa omboete pegua. Körai jei reta:

52“Ndepɨakavi vae ko nde, cheYa,

ore ñemuñagüe reta iTumpa,

jupi rupi oyemboete vaerä jare opaete yemboete oiko avei chupe vae.

Nderé ikɨambae vae ko jare yerovia pegua vae,

jupi rupi oyemboete vaerä vae jare opaete yemboete oiko avei chupe vae.

53Ndepɨakavi vae ko nde nde tupao ikɨambae pe jare yerovia renda pe,

jupi oyemboete vaerä vae jare opaete yerovia opambae vae pegua.

54Ndepɨakavi vae ko nde, mburuvicha guasu iporookuaía pe oguapɨ vae,

jupi oyemboete vaerä vae jare opaete yerovia opambae vae pegua.

55Ndepɨakavi vae ko nde, querubín reta iárambo reguapɨ reï vae ko nde

jare nemae pe opa reecha oasavigüe vae,

jupi oyemboete vaerä vae jare opaete yerovia opambae vae.

56Ndepɨakavi vae ko nde ara oasavi vae pe,

jupi oyemboete vaerä vae jare yerovia opambae pegua.

57Pemboete Tumpa, opaete jembiapo reta vi,