ECLESIÁSTICO 1 - Guarani Bible with DC

Mbaemboete arakuaa pegua

1Opaete arakuaa ou Tumpa güi jare jae ndive ñomai ko oiko.

2¿Kia pa ipuereta oipapa ɨvɨkuitï jäi ɨguasu pe,

ama otɨkɨgüe, ani ramo ara reta iyapɨmbae ma vae?

3¿Kia pa ipuereta ojäa ara ɨvategüe,

ɨvɨ ipɨgüe, ani ramo ɨ́vɨkotɨ oasavigüe?

4Arakuaa iyɨpɨ ko tenonde oyeapo opaete mbae güi;

arakuaa mbae yaikuaa vaerä vae ko oiko ñomai.

6¿Kia pa ko oväe arakuaa iyɨpɨ?

¿Kia pa oikuaa iñemi renda?

8Jaeño ma ko oï metei iyarakuaa vae jare kɨɨyea yae vae:

Jae ko Tumpa, oime iporookuai renda pe oguapɨ oï vae.

9Jae ko oyapo arakuaa iyɨpɨ.

Omae jese, ojäa

jare opɨyere opaete jembiapo reta iárambo.

10Jae omee oikuaa rupi opaete oikove vae reta pe,

jare má jeta rupi iyoaɨu ïru reta pe.

Yamboete Tumpa

11Yamboete Tumpa yave güeru yaiko kavi vaerä, mbɨakatu,

yerovia jare metei äka-regua yerovia pegua.

12Yamboete Tumpa yave yandepɨa jorɨ katu reve,

güeru yerovia, jare yaikopukuta.

13Kia ñavo Tumpa omboete vae, iyapɨ pe oiko kavita ko;

omano yave, opaete vae ko imiari kavita jese.

14Arakuaa iyɨpɨ oyemboɨpɨ ko Tumpa yamboete yave;

jae oiko jupi vae reta ndive ichɨ jɨe güive ma.

15Oñono jo kuimbae reta ipɨte pe joko pe oiko vaerä,

jare oikota oiko jupi rupi jae reta ndive.

16Arakuaa ikavigüe vae oiko Tumpa yamboete yave;

jae ombopɨakatu kuimbae reta oyapogüe rupi.

17Omotɨnɨeta jo reta oipotagüe pe,

jare iavatío reta omboagüɨyegüe oarɨvogüe pe.

18Yamboete Tumpa yave ñaë ko yaja arakuaa pe,

jae omee ñaï kavi vaerä oyoupi jare yanderete pe.

19Ombou ama nunga arakuaa jare yandepoki vaerä,

jare omotɨnɨe yemboete pe kia ñavo ogüɨ̈rakua jese iyeupe vae.

20Arakuaa iyɨpɨ jae ko Tumpa yamboete vae,

jaema jäka reta re ko ñaväeta yaikopuku vaerä.

22Arasɨ jupimbae reve vae, ngaraa ñaväeä kërai yambojupi vaerä,

echa kuimbae mbae oipotarai vaeño ko omokañɨteita.

23Jare ipɨaguasu vae ko oñemokïriita oipota yave.

Jaema iyapɨ pe ko jepɨta chupe yerovia pe.

24Oipota yave, opɨtata ko kïrii,

jaema jaɨkue rupi tätata ko iyarakuaa omboete vae.

25Arakuaa ko omee ñanemiari kavi vaerä,

ërei imbaeyoa vae oipotaa etei ko omboete Tumpa.

26Ërei ndereeka arakuaa yave, reyapo ko rei mborookuai reta jeigüe vae.

Jare Tumpa omeeta ko ndeve jeta rupi.

27Tumpa yamboete yave, yandearakuaa ramo ko jare yayemboe ramo;

jae oipota yae ko jupi vae jare oyembotuicha mbae vae.

28Agüɨye eipoɨu emboete Tumpa,

jare agüɨye eya jaangaiño ikotɨ.

29Agüɨye jaangaño eiko kuimbae reta jóvai rupi,

jare emae kavi mbae rere vae re.

30Agüɨye ɨvate mbatee ekua, reipotaä rea yave

ndeiño reñemomaraiuka vaerä.

Echa Tumpa omboyekuaa tai ko nde reikuakugüe

jaema nemomaraita kia reta jovake,

nde remboeteä jeko pegua,

jare ndepɨa pe renoi mbatee tavɨ jeko pegua.