PROVERBIOS 8 - Guarani Bible with DC

Arakuaa katu iñemoñee

1Arakuaa osapúkai; arakuaa katu iñeeäta.

2Oyemboɨ ɨvate tape jembeɨ pe,

oyemboɨ tape oyoasaa pe,

3öke reta iyɨke pe,

tëta guasu jöke pe, oñemoñee, jei:

4“Kuimbae reta, peve ko jae kuae ñee reta,

5pe, yarakuaambae reta,

peyemboe peyeandu katu vaerä jare pepoki vaerä.

6Peyeapɨsaka, chemiarita peve mbae ikavi yae vae re,

ñee isɨmbigüe re.

7Kuae jaeta vae añetete vae ko;

mbaetɨta chemiari apu.

8Opaete cheñee reta jupi ko;

mbaetɨ etei pɨpe jupimbae ani ñape vae.

9Iyarakuaa katu vae pe jare ipoki reve mbae oyapo vae pe,

ikavi yae ko cheñee reta, mbaetɨ etei pɨpe yemboavai.

10Korepoti jare oro ikavigüe jekovia pe, peipɨɨ cheporomboe jare cheporomboarakuaa.”

11Echa arakuaa katu ko ikavi yae ita ipöra yae vae güi;

¡mbae ipotaa yae vae ave ngaraa omboyovake!

12Che, arakuaa, cheïru jae ko arakuaa katu,

jare anoi arakuaa yemboarakuaa pegua.

13YandeYa güi yaipoɨu vae, jae ko ñaröɨro ikavimbae vae.

Che aröɨro ko pɨayemboete, yembotuicha, teko ikavimbae jare apu.

14Cheré oï yemboarakuaa jare arakuaa kavi,

che ko jae arakuaa katu, chembae ko mbaepuere.

15Cherupi oporookuai mburuvicha guasu reta,

jare mburuvicha reta jupi rupi mbae oyapo vae.

16Cherupi mburuvicha reta güɨnoi mbaepuere,

jare mburuvicha reta oporojäa kavi ɨvɨ pe.

17Che aɨu cheraɨu vae reta,

jare chereeka voi vae reta cheväe.

18Cheré ko oï mbaeyekou jare mboromboete,

mbaeyekou opambae jare yembojupi.

19Che amee vae ko ikavi yae ete oro oyembokavigüe güi;

che amee vae ko ikavi yae ete korepoti oyeambae güi.

20Che aja tape isɨmbi vae rupi, tape ikavigüe rupi.

21Cheraɨu vae reta pe amee mbaeyekou:

Jare jo amotɨnɨe mbaembae jepɨ vae pe.

22“YandeYa cherenoi iyɨpɨ güive voi,

ndei jae omboɨpɨ opaete mbaembae oyapo mbove.

23Aikoño mai iyɨpɨ güive voi,

ndei ɨvɨ oyeapo mbove.

24Ndei ɨguasu reta oyeapo mbove oime ma aiko,

ndei ɨesaɨ reta oyeapo mbove.

25Ndei ɨvɨtɨ guasu reta jare ɨvɨtɨ reta oyeapo mbove

oime ma aiko,

26yandeYa ndei ave vɨteri oyapo ɨvɨ jare ñana reta yave,

ɨvɨkúi ave mbaetɨño.

27Jae oyapo ara yave che joko pe aï,

oasavi vae oyapo ɨguasu iárambo yave,

28oñono kavi ara ɨvate yave,

ɨguasu jugua oyapo yave,

29oyókuai ɨguasu agüɨye vaerä oasa jembeɨ güi yave,

oñono ɨvɨ iguapɨ ka re yave,

30joko pe che aï jae ndive, amborɨ añono kavi opaete mbaembae.

Che ko amboyerovia katu avei vae, ayerovia katu avei jae jóvai opaete ara rupi;

31ayerovia katu ɨvɨ oyeapo ramo vae pe,

¡chemboyerovia katu yae ko kuimbae reta!

32Añave, cheraɨ reta, peyeapɨsaka cheré;

oyerovia ko chereko omomoe vae.

33Peyeapɨsaka yemboarakuaa re, pearakuaa peyeupe;

agüɨye peröɨro.

34Oyerovia ko jókuae oyeapɨsaka cheré vae, jare ara ñavo cheräro chero jöke pe vae.

35Echa cheväe vae, tekove ko oväeta,

jare oväeta yandeYa ipɨakavi;

36ërei chekotɨ iyoa vae, jae aeño ko oñererokomegua,

¡opaete chereröɨro vae reta, mano ko oaɨu!”