ECLESIÁSTICO 38 - Guarani Bible with DC

Mbaerasɨ jare mano

1Emboete oporopoano vae iparavɨkɨ re,

echa jae vi ko Tumpa omboarakuaagüe.

2Oporopoano vae pe Tumpa güi ko ou iyarakuaarä,

jare mburuvicha guasu güi ou chupe oiko jese vaerä.

3Yasoropai iyemboe reta re, oporopoano vae oiko yemboete rupi

jare ipuere oyemboɨ tuicha vae reta jóvai.

4Tumpa ko oyapo ɨvɨ re oë vaerä mbae moa moa reta,

jaema kuimbae iyarakuaa vae agüɨye togüɨröɨro.

5Tumpa ko omojëe ɨ metei ɨvɨra iyɨpɨgüe pe

oechauka vaerä opaete pe imbaepuere.

6Jae omee arakuaa kuimbae reta pe,

omboete reta vaerä jembiapo tuichagüe vae rupi.

7Jókuae mbaembae reta ndive, oporopoano vae omoröɨsa mbae jasɨgüe

jare moa imeea oyapo moa reta.

8Jökorai Tumpa jembiapo reta mbaetɨ okañɨtei,

ani ramo mbaetɨ oata kuimbae pe ikavi oiko vae.

9Cheraɨ michi, ndembaerasɨ rei yave ndepɨaguasu;

eyerure Tumpa pe, jae omeeta ko ndeve ikavi rei vaerä.

10Esɨrɨ pɨ̈chɨi vae güi jare jupimbae vae güi,

jare eikɨayoe ndepɨa opaete mbaeyoa güi.

11Erökuavee Tumpa re mbaeyuka ikavigüe vae

jare mbota mbɨakavi pegua oime mbae renoi rupi.

12Ërei eenɨi vi oporopoano vae;

agüɨye eröɨro, echa jae vi ko oatata ndeve.

13Echa oime ko mbae oë kavi vaerä chugüi ou vae,

14jare jae oñeñono vi ko Tumpa ipo pe,

oyapo kavi vaerä oipota oyapo vae

jare oiporu vaerä vi moa ikavigüe.

15Jayave metei kuimbae iyoa iYapoa kotɨ,

oñemaeñoä yave oporopoano vae oñeengata vaerä chupe.

16Cheraɨ michi, eyaeo omano vae re,

eechauka ndepɨatɨtɨ vae jare eyapo mbaembae oyeapo mano pe vae.

Eñotɨ ndereko jei rami,

agüɨye eata manoa rupi.

17Cheraɨ, yaeo tätagüe ndive jare toyekuaa mbɨatɨtɨ,

eñotɨ jae oipota rami.

Emaeño tosɨrɨ nderesaɨ metei ara ani ramo mókoi ara rupi,

jare joko güi emboasa ndeyeugüi mbɨatɨtɨ.

18Echa mbɨatɨtɨ güeru mano yandeve,

jare mbɨatɨtɨ opa opɨ̈ro mɨ̈rata.

20Agüɨye mo eyemongeta jese,

neakañɨ mo chugüi jare eyemongeta nderenonde kotɨ.

21Agüɨye mo eyemongeta jese, mbaetɨ yé ma ko mbae re reäro vaerä;

chugüi mbaetɨ ko mbae reekɨ, ërei nde ndemombaerasɨ ndereeya.

22Eyemongeta nde reota vi ko jae ojo rami:

Kárumbo ojo jae jare añave nde.

23Omano vae oputuu rami, jökorai vi toputuu yemomaendúa jesegua;

jare nde eyembopɨakavi, nemaendúa jae omano ma ko vae.

Tembiapo reta jare arakuaa

24Ombaekuatía vae iyarakuaa ko ara reta omboasaiño vae pe;

kia ñavo mbaetɨ nunga jembiapo vae ipuereta iyarakuaa katu.

25Ngaraa ipuere iyarakuaa jókuae opaete ara oara oiko vae,

kia ñavo oyemboete mbae jakua vae oiporu vae pe vae

jókuae güeyeño etei güɨroata oiko vae

jare guaka reño ma oyangareko oiko vae,

26jare oke katumbae mɨmba ikarúa renda oñono kavi oiko vae,

iyemoambeko jaeño ma güɨreko ɨvɨ oai vaerä vae.

27Jare mbovɨ yaeta vi opaete oparavɨkɨ vae reta kotɨ

jare mbae michi iyapoa oke okembae mbae oyapo vae pe

ipoki rupi oyoo sellorä vae

jare järea rea oipoepɨ mbae ombojaanga oï jese vae reta.

Täta oyemoambeko oechauka vaerä mbae ia oyapogüe

jare oke katúä opa vaerä oyapo iparavɨkɨ.

28Jökoraiño vi ko jiero iya vi kia oguapɨ yave oï tata omoendɨ pɨpe vae iyɨpɨ pe,

oyemongeta oï jiero oyavɨkɨ vaerä.

Tätati jare tata ipire omotini chugüi

tatamoendɨa oyavɨkɨ ramboeve.

Iyapɨsa güi okañɨä ma vi mbae re okua vaegüe;

jare jesa ombosɨrɨmbae vae oï jókuae mbae ia oyapo oï vae güi.

Oyemoambeko opa vaerä oyapo iparavɨkɨ,

jare oke katúä oyeapo opa vaerä omboaɨkuere oyapo kavi.

29Jökorai vi ko tuyuapo pe oparavɨkɨ vae,

ipɨ pe omboyere mbae oyapo kavi pɨpe vae,

iparavɨkɨ reño oyemongeta oï

jare täta oñemoäta ngatu oupitɨ vaerä jembipapa.

30Ipo pe opa omoiägüe oñono tuyuapo,

jaema ipɨ pe oikaambi.

Oñemoäta ngatu vi oipichɨ vaerä jembiapo re imoembipea,

jare oke katúä vi otupei vaerä oeya imbaemboyɨa.

31Opaete jókuae reta jae ko ipo pe oyembiapo vae reta,

jare metei ñavo ko jembiapo pe ipoki reta.

32Jae reta mbae ngaraa oiko oiko vae,

ngaraa kia oikove oiko jare ngaraa kia ojo ketɨ.

33Ërei ngatu ngaraa kia oparea chupe oiko vaerä tëta ruvicharä,

jare ngaraa tenonde oï yemboatɨa pe.

Ngaraa oï tuicha vae reta ipɨte pe,

jare mbaetɨ etei vi oikuaa reta jupigüe re.

34Mbaetɨ oechauka reta iyemboe jare ipuereta ko teko oñono kavi vae,

jare oikuaa etei reta vi arakuaa reta re.

Ërei jae vae reta oyemoambeko mbae oime vaerä opaete vae pe

tembiapo ipo pegua oyapo yogüɨreko vae pe.