2 PEDRO 1 - Guarani Bible with DC

Tamaraeme

1Che Simón Pedro, Jesucristo jembiokuai jare jemimondo, aikuatía peve pe peupitɨ mborogüɨrovia ikavigüe vae ñaneTumpa jare yandeYa JesucristoTit 2.13. jupi vae rupi, ore rami.

2Tumpa ipɨakavi jare ipɨakatu toï jeta pe reta ndive, peikuaa kavi vaerä Tumpa jare yandeYa Jesús.

Oporogüɨrovia vae reta kërai yogüɨreko vaerä

3Tumpa omee yandeve imbaepuere rupi yaiko vaerä jare yamboete vaerä; jare opaete kuae ñanoi yaikuaa ramo jókuae yandeparavo iyemboetea jare tuichagüe yae rupi vae.

4Jókuae mbaembae rupi Tumpa oyapo yandeve morogüɨrökuavee ikavigüe yae jare tuichagüe, jókuae rupi ñanoi ma jae omee yandeve vae, peeya ramo opaete ikavimbae ɨvɨ pegua soo jemimbota rupi oime vae.

5Jáeramo, peñemoäta ngatu, pemomɨ̈rata peporogüɨrovia pereko kavi pe; pereko kavi pemomɨ̈rata arakuaa katu pe;

6arakuaa katu pemomɨ̈rata yeopia soo jemimbota pe; yeopia soo jemimbota pemomɨ̈rata mbɨaguasu pe; mbɨaguasu pemomɨ̈rata Tumpa imboete pe;

7Tumpa imboete pemomɨ̈rata mbɨakavi oyoupi vae pe; mbɨakavi oyoupe vae pemomɨ̈rata mboroaɨu pe.

8Opaete kuaekuae penoi yave jare okuakuaa peré yave, ngaraa peikoiño peparavɨkɨ oyekuaambae, jare peikuaa tëiiño yandeYa Jesucristo regua.

9Ërei opaete kuaekuae re oata vae omae kaviä ko; jesaä ko, ñakañɨ ko Tumpa omboai chugüi iyoa oasagüe reta vae güi.

10Jáeramo cherɨvɨ reta, jeieteño peñemomɨ̈rata Tumpa pereenɨi jare peparavo vae re, echa jökorai peyapo yave, ngaraa etei pegüɨapi.

11Jare jökorai yave, oyepeata opaete peve yandeYa Yandemboasa vae Jesucristo iporookuaía opambae.

12Jáeramo che jekuaeño pomomaenduata kuaekuae re, yepe tëi peikuaa ma ko jare pepɨ̈rata ma ko añete vae peyemboe jese vae re.

13Jaekavi cheve aiko vae aï ramboeve pomomae vaerä kuae yemboarakuaa reta rupi.

14Echa aikuaa jarembaeño amanota ma, yandeYa Jesucristo oikuaauka cheve rami.

15Jekuaeño aipota ayemoambeko avei, amano güire pemaendúa avei vaerä opaete kuaekuae reta re.

Cristo iyemboetea oecha vae reta

16Roikuaauka peve yandeYa Jesucristo imbaepuere jare kërai jae ou yeta ko vae, mbaetɨ ko roikuaauka peve arakae ndaye oyeapo katugüe. Echa roecha etei ko yandeYa imbaepuere.

17Echa omboresive yave yandeRu Tumpa güi mbaemboete, oyeendu ara güi Tumpa imboetea yae vae iñee jei: “Kuae ko jae cheRaɨ aaɨu yae vae. Chemboyerovia vae.”Mt 17.1-5; Mc 9.2-7; Lc 9.28-35.

18Jare ore roendu jókuae ñee ou ara güi vae, roï jae ndive ɨvɨtɨ oñeñono tee vae pe yave.

19Ñanoi vi ñeemombeúa reta omoërakua vae, jókuae re perovia vae ikavi yae ko. Jókuae ñee ko metei mechero omoembipe pɨtumimbía pe rami köe regua, yasɨtata köembiya omoembipe pepɨa pe regua;

20ërei peikuaa kavi, kërai Tumpa Iñee pe oñemoërakua vae ikuatiaa iyeugüi aeñoä ko oikuatía;

21echa ñeemombeúa reta mbaetɨ imiari ipɨa jemimbota rupi aeño. Espíritu Santo etei omombeu chupe reta jei reta vaerä Tumpa iñee.