ECLESIÁSTICO 45 - Guarani Bible with DC

Moisés

1Israel iñemuña metei kuimbae

opaete vae oaɨu omae jese

Tumpa vi oaɨu omae jese jare opaete vae kuimbae reta:

Moisés, yemongeta ikavigüe güi vae.

2Tumpa omee chupe yemboete ikɨambae vae

jare täta imbaepuere oyapo tuicha vae reta ipɨte pe.

3Jae oiporu vae rupi, Tumpa omee rai rai arakuaa reta,

jare omboyemboɨ mburuvicha guasu jóvai.

Tumpa omee chupe jeta ipo reta re oyangareko vaerä

jare oechauka chupe jae ko Tumpa vae.

4Jae jupi vae jeko pegua jare mbaetɨ vi oyembotuicha,

Tumpa ko oiparavo ïru vae kuimbae reta ipɨte güi.

5Oenduuka iñee chupe

jare omoingeuka amapɨtu jüu yae vae pe.

Omee chupe mborookuai reta,

mborookuai tekove pegua jare arakuaa pegua,

oechauka vaerä Israel reta pe, jae ko Jacob jëtaɨgua reta ma,

omee chupe reta opaete iporookuai reta.

Aarón

6Tumpa oiparavo Aarón, Leví jëtaɨgua reta ipɨte güi,

7oñono jese metei yemboe opambae vae.

Omee chupe yemboete tuicha vae

oyeokuai vaerä Tumpa tuicha vae.

Oñono jese búfalo jätigüe

jare omoñeapeva metei ñeapevaka ikavigüe vae pe.

8Omboete vaerä omee chupe mbaepuere jare yemboete,

jemimonde omboarambogua chupe mbae ipöra vae jepɨgüe pe:

Jemimonde igüɨ pegua jare iñeapevaka,

9metei kuakuaa kapana raɨ raɨ pegua vae

oimama granada reta pe vae,

jókuae mboki ipu oguata yave

jare oyeendu tupao pe,

ïru vae yatɨ vae reta oikuaa vaerä.

10Iñemopöra ikɨambae vae reta oro pegua, temimonderä pɨ̈taü vae jare moropɨ̈taasɨ vae,

mbae iä iä oï vae pe oyembovɨvɨ;

kurusu pɨtía regua oporojäa, jemimonde iyɨvambae jare iyeumbɨkuaa,

inimbo pɨ̈ta vae pegua, metei yembiapo regua oyapogüe;

11ita jepɨ vae reta ipɨtía regua re,

sello rami oï jese reta jare oñekëse oï pɨpe;

metei ñavo ita reta re oyekuatía oï metei vae

Israel-ɨgua tëta regua jee.

12Äka-regua oro pegua vae iñäkañemamaa iárambo oï,

jare jiero ipegüe re oyekuatía jei: “Oyeparavogüe”.

¡Jembipe ikavigüe vae jare täta yamboete vaerä vae!

¡Yanderesape ikavi yae vae jare oasa ete ipöra vae!

13Mbaetɨ jókuae nunga oiko jenondeve;

mbaetɨ kia jökorai oyemonde vae,

jaeño ma jae taɨ reta

jare iñemuña jaɨkue rupigua reta ye.

14Mbota omee mbae jaɨgüe vae opaete kavi ókai

mókoi ye metei ara pe, osondo mbae vae.

15Moisés oñono tee

asaite ikɨambae vae opɨyere jese.

Jökorai opɨta jókuae yemboe opambae vae

chupegua jare iñemuña reta peguarä ara oiko oiko ramboeve:

Oiko vaerä sacerdoterä Tumpa pe

jare jae jee re ombobendise vaerä tëta ipo reta.

16Tumpa ko oiparavo opaete kuimbae reta ipɨte güi

oyapo vaerä mɨmba oyeyukagüe opaetei oyeapɨ vae jare mbaekɨra reta,

oapɨ vaerä mbota reta ipiche katu reve

jare oiporuta Israel-ɨgua reta iyoa re iñɨ̈ro vaerä chupe vae.

17Tumpa omee chupe iporookuai reta

jare omee vi chupe mbaepuere omee vaerä mborookuai reta jare jei vaerä yepopeyu reta,

tëta ipo reta omboe vaerä mborookuai reta re

jókuae omboarakuaa vaerä iporookuai re.

18Ïru ñemuña pegua reta iyarasɨ Aarón kotɨ

jare omotareɨ reta ñuu pe.

Datán jare Abiram jupiegua reta

jare Coré ndive yogüɨreko vae reta, opa iyarasɨ.

19Ërei Tumpa oecha jare iyarasɨ,

jare arasɨ tätagüe pe opa omokañɨtei reta.

Oyapo ikotɨ reta metei mɨakañɨ:

Opa oyuka reta tata pe.

20Joko güi omondoyoapɨ Aarón pe yemboete

oñono chupe imbaeyekou aerä:

Omee chupe jou vaerä mbota oñemeegüe ikɨambaegüe vae

21jare mɨmba oyeyukagüe reta Tumpa pegua oyeapi vae.

Tumpa omee chupe omboyao rami, chupeguarä jare iñemuña reta peguarä,

mbɨyape Tumpa jóvai oñeñonogüe vae.

22Ërei Tumpa mbaetɨ omee chupe jókuae tëta guasu pe metei iɨvɨ aerä

jare mbaetɨ vi omee chupe ïru vae reta pe mbae oñemee vae rami vae;

chupe mbae oyemboyaogüe opɨta vaerä Israel-ɨgua reta ipɨte güi vae

jae ko mbota Tumpa pe oñemee vae.

Finees

23Finees vi, Eleazar taɨ,

ikuimbae jeko pegua mboapɨa re ma oï vi jókuae yemboete pe,

echa oñemopüa ipɨa-kɨ̈reɨ ngatu reve opaete vae iTumpa kotɨ

jare oyerure opaete tëta ipo reta re.

Oñemopüa ipɨakavi jeko pegua

jare oupitɨ oiko vaerä ñemoɨ̈ro Israel-ɨgua reta pe.

24Jókuae ramo Tumpa oyapo vi jae ndive metei ñemoïru ikavi rupi

jare omee chupe oyeokuai vaerä vi tupao pe,

oiko vaerä jae, jare iñemuña reta

sacerdote tenondegua eterä opaete jekove rupi.

25Tumpa oyapo vi metei ñemoïru David ndive,

jae ko Isaí taɨ, Judá iñemuña pegua;

ërei ko yemboete tuichagüe vae oasa ou ñemuña ñavo rupi,

jaema ko Aarón mbaeyekou oeyagüe vae

opɨta ko opaete vae iñemuña reta pe.

26Pemboete vi, Tumpa, jae ko täta ipɨakavi vae

jare jae ko omee peve yemboete,

omee peve äka arakuaa pegua vae

pejäa vaerä Tumpa jembiparavo reta jupi rupi.

Jare jökorai ko yave ngaraa iyapɨ yerovia

jare mbaepuere reta pe güi opaete perekove rupi.