1YandeYa ikäjou oiko filisteo reta iɨvɨ pe chiu yasɨ.
2Jayave filisteo reta oenɨi sacerdote reta jare maratuta vae imombeúa reta, oparandu chupe reta:
—¿Mbae pa royapota Tumpa ikäjou pe? Pemombeu oreve këraita pa romondo ye jenda pe vae.
3Jae reta jei:
—Pemondo ye Tumpa ikäjou yave, agüɨye pemondo jökoraiño, pemondo vi mbota peyemboepɨ vaerä, jayave pekuerata jare peikuaata maera Tumpa oiporarauka peve.
4Jare jae reta oparandu:
—¿Mbae nunga mbota pa romondota?
Jare sacerdote reta jei:
—Pemondo pandepo mbaerasɨ pɨ̈chɨi ñakɨ̈ta vae iä oro pegua jare pandepo anguya iä oro pegua, filisteo juvicha reta ñogüɨnoi rami, echa kuae mbaerasɨ opaete peiporara, pe jare peruvicha reta.
5Peyapo pire mbaerasɨ ñakɨ̈ta vae iä jare anguya reta iä, peɨvɨ güɨrokomegua vae jare pemee mbaemboete Israel iñemuña reta iTumpa pe, güɨramoi mbaetɨta ma oiporarauka peve, petumpa reta pe jare peɨvɨ pe.
6¿Maera pa pepɨa täta Faraón jare Egiptoɨgua reta rami? Tumpa oiporarauka chupe reta yave jaɨkue rupi mbaetɨ omaeño yogüɨraja reta.
7Añave peyapo metei käretou ipɨau vae, jare peipɨɨ mókoi guaka imembɨmii vae, mbaetɨ etei oñeñono yuvo jese vae, peyokua jare peñono käretou jese jare imembɨ reta peyokenda jókai pe.
8Peipɨɨ Tumpa ikäjou jare peñono käretou pe, jare jókuae mbae iä reta oro pegua pemondo mbota teko re vae, peñono metei jɨru pe käjou iyɨpɨ pe, jare pemaeño käretou tojo jaeiño.
9Jare pemae peï jese; jare tape ojo Bet-semes kotɨ vae rupi ojo yave iɨvɨ ae pe, jayave Tumpa ko oiporarauka tuicha yandeve, ërei mbaetɨ ojo yave jókuae tape rupi, jayave jaeä ko oiporarauka yandeve, mbaerasɨiño ko.
10Jare jókuae kuimbae reta jökorai oyapo, oipɨɨ reta mókoi guaka imembɨmii vae, oyokua jare oñoñono reta jese käretou jare imembɨ reta oyokenda jókai pe.
11Jare oñono reta pɨpe yandeYa ikäjou jare anguya reta iä, jare mbaerasɨ pɨ̈chɨi ñakɨ̈ta vae iä metei jɨru pe.
12Jare jókuae guaka reta yogüɨraja tape rupi Bet-semes kotɨ ojo vae rupi, oñee yogüɨraja tape rupi, jare mbaetɨ opia reta ketɨ ave, jare filisteo juvicha reta yogüɨraja jaɨkue oväe Bet-semes jembeɨ pe.
13Jare Bet-semes pegua reta oipoo ñogüɨnoi trigo ɨvɨtɨ päu ipe kavi vae pe, jare iñäka omopüa reta omae yave, oecha reta Tumpa ikäjou, jare oyerovia reta.
14Jókuae käretou ou oväe Josué iko pe, opɨta metei ita tuicha vae iyɨpɨ pe, jare jae reta opa omboai jókuae käretou yepearä, jare jókuae guaka reta oyuka omee mɨmba opaetei oyeapɨ vae yandeYa pe.
15Jare Leví iñemuña reta ombogüeyɨ yandeYa ikäjou jare mbae jɨru iyɨke pe oï vae, mbae oro pegua oï pɨpe vae, jare oñono reta jókuae ita tuicha vae re; jókuae ara kuimbae reta Bet-semes pegua omee mɨmba oyeyukagüe opaetei oyeapɨ vae jare ïru mɨmba oyeyukagüe, yandeYa pe.
16Jókuae pandepo filisteo juvicha reta oecha yave jókuae oyeapogüe, oyerova reta ye jókuae ara voi Ecrón pe.
17Jókuae pandepo mbaerasɨ pɨ̈chɨi ñakɨ̈ta vae iä oro pegua filisteo reta omondo yandeYa pe iyoa oyemboai vaerä vae; jae ko tëta Asdod re, Gaza re, Ascalón re, Gat jare Ecrón iyoa re.
18Omondo reta vi pandepo anguya iä reta oro pegua jókuae pandepo filisteo juvicha reta jëta guasu reta re; tëta guasu oñekëse kavi vae jare tëta raɨ reta oñekësembae vae re. Jókuae ita guasu Josué iko pe oï Bet-semes pe vae, yandeYa ikäjou oñono reta jese vae oimeño añave rupi.
19Jayave yandeYa oyuka jókuae kuimbae reta Bet-semes pegua reta, echa omae reta yandeYa ikäjou japɨpe re, omano reta chugüi setenta kuimbae. Jare täta oyaeo reta, echa yandeYa jeta oyukaɨvɨ.
20Jayave Bet-semes pegua reta jei: “¿Kia pa ipuere oï yandeYa Tumpa iyoambae jóvai? ¿Ketɨ pa yamondota Tumpa ikäjou yandegüi?”
21Jare omondo reta ñee jerajaa reta Quiriat-jearim pegua reta pe jei reve: “Filisteo reta ombou ye yandeYa ikäjou; jayave peyu peraja.”
Who We AreWhat We EelieveWhat We Do
2025 by iamachristian.org,Inc All rights reserved.
