JOB 6 - Guarani Bible with DC

Job omboeta ivɨa-ïru reta pe jeko re

1-2Jayave Job jei:

Chembaeporara jare cheräse oñejäa kavi mbaejäaka pe yave,

3oasa yeta ko ipoɨ ɨguasu jembeɨ pe ɨvɨkuitï oï vae güi;

jáeramo ko mbaetɨ aipoɨu mbae jae vaerä.

4Echa Imbaepuere yae ete vae cheɨ̈vo juvɨ reta pe,

imbayachi jasɨ yae cheve,

Tumpa ombou cheve kɨɨye yavaetegüe.

5¿Oñee yera mburika kuimbae ñana rupigua güɨnoi yave ñana jou vaerä?

¿Oñee yera toro güɨnoi yave kapii?

6¿Oyeuta ra tembíu jëe ngatumbae?

¿Ururupía jësakagüe jëe ngatuta ra?

7Ayuembae vae reta etei,

anoi añave cherembiurä.

8Mbae mona Tumpa omboyevɨ cheve cheyerurea,

mbae mona ombopo cheve aipotaecha vae.

9¡Mbae mona Tumpa ipɨakatu reve oiporarauka cheve,

oitɨ mona ipo cheré, jare cheyuka ete voi!

10Yepe mona mbaerasɨ jeiete yae cheve, ërei chepɨakatuta ko,

echa aikuaa mbaetɨ ko ayavɨ Tumpa Iyoambae iporookuai reta.

11¿Mbae re ye pa añemomɨ̈ratata, aikoveño vaerä?

¿Jare mbae pa cheräro, chepɨa guasu vɨteriño vaerä?

12Mbaetɨ ko chetäta ita reta rami,

ani chesoo mbaetɨ ko jiero iyu vae rami.

13Che aeño mbaetɨ chepuere ayererovia katu,

mbaetɨ kia chemborɨ vaerä.

14Kia oiporara yave, ivɨa-ïru ombopɨakatu,

mbaetɨ jókuae oyapo vae, Imbaepuere yae vae güi ko oipoɨuä.

15Ërei pe reta chereeya,

ɨ̈aka raɨ otini opɨta rami.

16Okɨ yave,

ɨ juúmbai jɨapu ogüeyɨ vae rami.

17Araku yave otini jókuae ɨ̈aka,

kuaraɨ jasɨ yave otini opɨta.

18Oguata vae reta opia tëi jokotɨ vae,

opa ñuu rupi jopa reta.

19Temán pegua oguata vae reta oyerovia tëi jese,

Sabá pegua reta oyerovia tëi yogüɨraja jókuae ɨ̈aka reta re;

20ërei oyembotavɨ reta oyerovia tëi jese vae,

echa jae reta yogüeru oväe yave joko pe, mbaetɨ oväe reta ɨ.

21Añave, pe reta jókuae ɨ̈aka rami etei ko,

peecha yave yavaete chembaerasɨ, pekɨɨye chegüi.

22Che mbaetɨ etei mbae aiporu peve,

mbaetɨ etei jae peve pemboepɨ vaerä cheve akuera vaerä,

23ani chereepɨ vaerä tovaicho reta güi,

ani oporogüɨrekoasɨ katu vae reta güi.

24Chemboe, jare tachekïrii,

peikuaauka cheve mbae pe pa ayavɨ aï.

25Mbaepuere güɨnoi ñee reta jupi vae,

ërei, pe reta ¿mbae re pa ko pemboeta cheve?

26¿Peyemongeta pa pejäa vaerä cheñee reta,

che aiporara vae cheñee mbaeä etei ko vae?

27¡Pepoki pemee vaerä tɨ̈reɨ,

jare pemee vaerä pevɨa-ïru!

28Añave, pemae cherova re,

jare peecha, cheapu ra aï peróvai vae.

29Peipoepɨ peregüe, agüɨye peyoa;

peyemongeta pɨau ye ayapogüe re.

30¿Jae pa mbae ikavimbae?

¿Mbaetɨta pa aikuaa mbae ikavimbae reta?