1YandeYa jei cheve körai:
2“Ekua nemiari tëta guasu Jerusalén pe, ere:
‘¡Körai jei yandeYa!
Chemaendúa ndetaɨrusu yave,
reiko jupi rupi cheróvai vae re,
cheraɨu, omenda ramo vae ime oaɨu yae rami,
reguatase che ndive ñuu rupi,
jókuae ɨvɨ mbaetɨ etei oñemaetɨa pe.’
3Israel oñeñono tee kavi cheve yepi,
jae ko mbaagüɨyerɨpɨ rami cheve yepi.
Ikavimbae oyapo chupe vae reta pe che aiporarauka,
susere reta ambou chupe reta;
che ndeYa ko, jae kuae ndeve.”
4Jacob iñemuña reta,
opaete tëtara Israel iñemuña vae,
peyeapɨsaka yandeYa iñee re.
5YandeYa jei körai:
“¿Mbae ikavimbae pa oväe cheré peñemuñagüe reta,
chereeya reta vaerä?
Omboete reta tumpa-raanga reta,
jókuae rupi jae reta etei oyembosiriveä.
6Mbaetɨ oparandu reta:
‘¿Ketɨ pa oime oï yandeYa,
jókuae ñanerenoe ɨvɨ Egipto güi vae,
yandereroata ñuu ipombaea rupi vae,
ɨvɨ otini vae rupi,
ñamano rape katu jupi vae rupi,
mbaetɨ ɨ vae rupi,
ɨvɨ mbaetɨ kia ave oiko pɨpe vae rupi
ani oguata yepe jupi vae rupi?’
7Che ko pogüeru kuae ɨvɨ kavi pe,
mbaagüɨye reta peu vaerä chugüi
jare mbaembae ia ikavi vae.
Ërei peike jare perokomegua kuae cheɨvɨ,
pemongɨa jare chemboyuguaruuka
kuae ɨvɨ chembae güi.
8Sacerdote reta mbaetɨ oparandu:
‘¿Ketɨ pa oime oï yandeYa?’
Cheporookuai güɨnoi vae reta mbaetɨ chekuaa,
tenondegua reta oyembopɨapochɨ chekotɨ,
jare ñeemombeúa reta imiari Baal jee re,
omboete reta tumpa-raanga reta
mbaetɨ etei osirive vae.
Morojäa Israel kotɨ9Jáeramo che peYa, jae:
Pojäa vɨterita, jare vi perɨmɨmino reta ave.
10Peasa ɨ päu Quitim kotɨ jare pemae;
pemondo kia Cedar pe, omae kavi vaerä jese,
jae reta oyapo vi ra, kuae pegua reta rami.
11¿Kia nunga tëtaguasu oipoepɨ ra itumpa reta?
¡Yepe tëi jókuae reta ko tumpa añetembae!
Ërei kuae tëta chembae chereeya,
iyemboetearä aiko tëi vae,
chepoepɨ reta tumpa-raanga
mbaetɨ mbae ra osirive vae ndive.
12¡Ara, ekɨɨye, kuae jeko pegua!
¡Erɨrɨi rekɨɨye güi!
Che ndeYa ko, jae körai.
13Echa tëta chembae vae
oyapo mókoi mbae ikavimbae:
Chereeya reta,
ɨesaɨ osɨrɨ vae rami aï chupe reta vae,
jare oyapo reta iyeupe ɨrɨru,
ɨrɨru oyeka vae,
mbaetɨ ikavi ɨ oñeñovatu pɨpe vaerä vae.
Tëtaguasu Israel ikavimbae oyapogüe jekovia14Tëtaguasu Israel mbaetɨ ko tembiokuai;
mbaetɨ ko oa oiko vaerä tembiokuairä.
¿Maera pa jayave oiko tembiokuai rami?
15¿Maera pa oporepeña jese vae reta,
yaguapope reta jäse jäse oporepeña vae rami?
Iɨvɨ opa omboai reta chugüi,
jare jëta guasu reta opa oapɨ;
jare mbaetɨ etei kia oiko pɨpe.
16Tëta Menfis jare Tafnes pegua reta ave opa neapiasɨ.
17Körai ko reasa, chereeya vae jeko pegua,
che, ndeYa Tumpa rogüɨroatase vae.
18Añave, ¿mbae pa reväe reo Egipto kotɨ,
reɨu ɨ̈aka Nilo pegua pe vae rupi?
¿Mbae pa reväe reo Asiria kotɨ,
reɨu ɨ̈aka Éufrates pegua pe vae rupi?
19Ikavimbae reyapo vae oiporaraukata ndeve,
jupimbae reyapo vae nejäata.
Eyemongeta jare reikuaata,
ikavimbae yae ko reyapo chereeya
jare mbaetɨ chemboete vae jeko pegua,
che ndeYa Imbaepuere yae ete vae jae.
Israel oyembopɨapochɨ20Ɨma yae güi ma reyembopɨapochɨ chekotɨ,
mbaetɨ reipota reyapo cheporookuai.
Rere: ‘Mbaetɨ aipota ayeokuai.’
Opaete ɨvɨtɨ ɨvate vae re
jare opaete ɨvɨra iküaraɨa kavi yae vae
igüɨ ñavo rupi reiko
iyaguasa pota vae rami.
21Che ko roñotɨ uva iyɨpɨ ikavi yae vae rami,
temitɨ uva opaete güi ikavi yae vae rami,
¡ërei reikomegua, uva ikavimbae repɨta!
22Yepe tëi reyau javo lejía pe,
ani oipotagüe javo pe,
ërei cheróvai jekuaeñoi ndekɨa ndeyoa pe.
Che ndeYa jae.
23¿Kërai pa ndepuere rere:
‘Mbaetɨ ko chekɨa Tumpa jóvai,
mbaetɨ vi amboete tumpa-raanga Baal reta’?
Emae kërai ndereko ɨvɨpe kavi pe vae re,
emae opaete mbae kërai reyapogüe re.
Nde ko, camello kuña taɨrusu vae rami,
resɨi oipota rupi vae;
24mburika kuña ñana rupigua
oyepokuaa yae ko ñuu pe,
mburika kuimbae oeka yave oëtu ɨvɨtu,
jare mbaetɨ kia ipuere oyopia.
Mburika kuimbae oeka yave jókuae mburika kuña,
ngaraa poriau jese;
echa iara pe kavi oväeta.
25¡Israel, agüɨye ndepɨgüɨrai reve esɨi,
agüɨye ndeaseo totini ndeɨuve güi!
Ërei rere: ‘¡Ngaraa!,
aaɨu ko ketɨgua reta, ajata ko jupíe.’
Israel oiporarata jeko peguai26Imonda vae oyepokou yave imara rami,
Israel iñemuña reta imarata opɨta:
Opaete vae reta, juvicha guasu reta, juvicha reta,
isacerdote reta jare ñeemombeúa reta;
27echa metei ɨvɨra pe ave jei reta: ‘Nde ko cheru’,
jare metei ita pe: ‘Nde ko chesɨ.’
Javoi cheve ikupe omee reta, mbaetɨ jova.
Ërei ngatu, mbaesusere ou chupe reta yave, jei reta cheve:
‘¡Eyu orereepɨ!’
28Judá, ¿ketɨ pa oime tumpa-raanga reta
reyapo ndeyeupe vae?
¡Topüa reta, yaecha ra ipuere reta ndereepɨ
ou yave ndeve mbaesusere!
Echa, ¡jeta yae tumpa-raanga renoi,
tëta guasu reta jeta yae renoi rami!
29¿Mbae pa peipota che ndive,
opaete pe reta, peyembopɨapochɨ ko chekotɨ?
Che peYa jae.
30Ainupaiño ma peraɨ reta,
mbaetɨ etei oipota reta oikuaa maera ko oñenupa vae.
Yaguapope pochɨ yae vae rami,
peyuka ñeemombeúa reta kɨsepuku pe.
31Israel iñemuña reta añave pegua,
peyeapɨsaka che peYa iñee re.
¿Ñuu pa ko che ndeve?
ani, ¿metei ɨvɨ pɨtumimbi vae pa?
Tëta chembae vae: ¿Maera pa rere:
‘Nderembipɨɨä ko ore;
ngaraa ye ma royerova ndekotɨ’?
32¿Ipuere pa metei kuñatai iñakañɨ
oñemopöra pɨpe vae güi,
ani jemimonde imenda pegua güi?
Ërei tëta chembae vae
ɨma yae ma iñakañɨ chegüi.
33¡Ndepoki yae, reaɨu vae reeka vaerä!
¡Ndepoki yae reyapo ikavimbae vae ko nde!
34Nderemimonde yɨpe oï,
paravete vae reta jare jekombae reta jugüɨgüe pe,
yepe tëi mbaetɨ mbae nunga teko reväe jese reta;
ërei opaete kuaekuae reta reve rere:
35‘Jekombae ko che, Tumpa ngaraa pochɨ cheve.’
Kuae rere vae jeko pegua che rojäata.
Echa rere: ‘Mbaetɨ ko cheyoa.’
36¿Maera pa ndeandeko yae reñemoïru vaerä?
Egipto ombaeyavɨta vi ko ndeve,
Asiria ombaeyavɨ ma ndeve rami.
37Reyerova yeta Egipto güi nemara yae reve,
echa che aröɨro ko jókuae reyerovia jese vae,
jae ndive mbaetɨ eteita mbae oë kavi ndeve.”
Who We AreWhat We EelieveWhat We Do
2025 by iamachristian.org,Inc All rights reserved.
