EZEQUIEL 8 - Guarani Bible with DC

Oyeecha ikavimbae yae oyeapo Jerusalén pe vae

1Ovaa año pe, ovaa yasɨ re, pandepo araa pe, aguapɨ aï chero pe tenondegua reta Judá pegua ndive yave, yandeYa ombou oñono ipo cheré.

2Jare aecha metei kuimbaeecha vae; ikúa güi ɨ́vɨkotɨ tata rami, jare ikúa güi ɨvate kotɨ jembipe, jiero iyu vae oyemoembipeasɨ rami.Ez 1.27.

3Jare jókuae kuimbaeecha vae ombou ipo jare chepɨɨ chea pe. Jare Tumpa imbaepuere chereraja ɨvate ɨvɨ güi, Tumpa oechauka cheve vae rupi chereraja Jerusalén pe, jare cheñono öke japɨpe pegua pe, ɨvɨtuguasu kotɨ omae vae pe, joko pe oï tumpa-raanga yandeYa omboarasɨuka vae iä.

4Joko pe oï Israel iTumpa iyemboetea, jókuae aecha ñuu pe rami etei.Ez 1.28.

5Jayave jei cheve: “Nde kuimbae, emae ɨvɨtuguasu kotɨ.”

Jare amae ɨvɨtuguasu kotɨ, aecha mɨmba oyeyuka oyeapɨ jese vae jöke yaikea pe metei tumpa-raanga yandeYa omboarasɨuka vae iä.

6Javoi jei cheve: “¿Nde kuimbae, reecha pa mbae pɨ̈chɨi yae Israel iñemuña reta oyapo vae, oeyauka vaerä cheve reta chero mbaemboetea? Ërei reechata ïru mbae ikavimbae yae ete oyapo reta vae.”

7Javoi chereraja tupao joka jöke yaikea pe. Oguambɨ oyekuaa opu oï vae.

8Jayave jei cheve: “Nde kuimbae, embopɨguasu jókuae oguambɨ opu vae.”

Che ambopɨguasu jókuae oguambɨ opu vae öke rami.

9Javoi jei cheve: “Eike jare reechata mbae pɨ̈chɨi yae oyapo reta joko pe vae.”

10Aike, jare aecha oguambɨ re oñemopïra oyeapo oipotagüe mɨmba ipɨtía re oguata vae reta iä, jare mɨmba oyeumbae vae reta iä, güɨroyere reta oyapo oguambɨ re, Israel pegua reta itumpa-raanga iä reta.

11Jare jókuae mbae iä reta jóvai ñogüɨnoi setenta Israel iñemuña itenondegua reta, jare Jaazanías, Safán taɨ oï jae reta ipɨte pe, omboete reta jókuae tumpa-raanga reta; metei ñavo güɨnoi ikäti kavi vae incienso oyeapɨ pɨpe vae ipo pe; chugüi jüu opüa incienso jätati.

12Jare jei cheve: “¿Nde kuimbae, reecha pa Israel iñemuña itenondegua reta oyapo vɨari, metei ñavo itumpa-raanga jɨru pe vae? Echa jae reta jei: ‘Ngaraa yandereecha yandeYa, oeya ma ko kuae ɨvɨ.’ ”

13Jei ye cheve: “Oimeño reecha vaerä mbae pɨ̈chɨi yae ete oyapo reta vae.”

14Jare chereraja yandeYa itupao jöke pe, ɨvɨtuguasu kotɨgua pe. Joko pe oguapɨ ñogüɨnoi kuña reta, oäpiro ñogüɨnoi tumpa-raanga Tamuz jee vae.

15Jayave jei cheve: “¿Nde kuimbae, reecha pa kuae? Oimeño reecha vaerä ikavimbae yae kuae güi vae.”

16Jayave chereraja yandeYa itupao joka japɨpe pe, jare aecha yandeYa itupao jöke jare mɨmba oyeyuka oyeapɨ jese vae ipäu pe, veinticinco rupi kuimbae ikupe omee ñogüɨnoi yandeYa itupao kotɨ, omae reta kuaraɨ oëa kotɨ, itindɨasɨ reve ɨvɨ re omboete reta kuaraɨ.Dt 4.19.

17Jayave yandeYa jei cheve: “Nde kuimbae ¿reecha pa? ¡Mbaetɨ etei yangapɨɨ Judá pegua reta oyapo ikavimbae vae, omotɨnɨe ikavimbae pe kuae ɨvɨ! Jekuaekuae rupi chemboarasɨuka reta; chembopɨayuguaru jeko reta.

18Ërei che ayapota vi mbae chupe reta chearasɨ reve. Mbaetɨta cheɨ̈ro chupe reta, ngaraa aiparareko reta. Yepe tëi täta osapúkai reve chereenɨi retata, ërei che ngaraa aendu chupe reta.”