PROVERBIOS 11 - Guarani Bible with DC

1YandeYa güɨröɨro yae ko omaemee yave oata ojäa omee vae;

ërei omboyerovia yae jupi rupi kavi mbae ojäa omee vae.

2Pɨayemboete oimea pe mbaetɨ mboromboete;

ërei oñemomichi vae pe oime arakuaa katu.

3Kuimbae jeko sɨmbi vae, jókuae rupi oiko kavi;

ërei iyoa vae reta, oyemboaiuka iyoa pe aeño.

4Tumpa iporojäa iara pe, mbaeyekou reta ngaraa etei oporoepɨ;

ërei mbae jupi vae oporoepɨta ko mano güi.

5Mbaejupi ombosɨmbi jupi vae jeko,

ërei iyoa vae, jeko pegua aeño okañɨtei.

6Mbaejupi güɨroasayepe jupi vae reta,

ërei iyoa vae reta oyepókoi iyoa pe aeño.

7Iyoa vae omano yave, opa vi jae ndive oäro tëi vae;

jeko kavimbae reta, opa vi okañɨtei mbaeyekou reta oäro tëi vae.

8Tumpa oepɨ jupi vae mbɨatɨtɨ güi,

ërei iyoa vae oiporara jekovia pe.

9Kuimbae jova mókoi vae iñee pe ombopɨatɨtɨ japicha,

ërei jupi vae reta iyarakuaa katu rupi oyeepɨ.

10Jupi vae reta jeko kavi ramo tëta guasu pe, oime yerovia katu,

ërei iyoa vae reta omano yave oime yerovia.

11Jupi vae reta iporerekua rupi tëta guasu oyembotuicha,

ërei iyoa vae reta iñee rupi oyemboai.

12Arakuaa re oata vae, jei mbae japicha;

ërei kuimbae oyeandu katu reve oiko vae mbaetɨ mbae jei.

13Indaye pota vae imiari opaño mbaembae re; ërei jupi vae, mbaetɨ mbae omoërakua.

14Yemboarakuaa kavi mbaetɨa pe, tëta guasu ngaraa oyembotuicha;

ërei yemboarakuaa jetaa pe, tëta oiko pɨagüive.

15Kia oikuaambae vae omborɨ yave ipía vaerä vae, oiporara yaeta;

ërei jókuae nunga güɨröɨro iyeugüi vae, oiko pɨagüiveta.

16Kuña jeko kavi vae, oyemboeteukata,

jare kuimbae ipɨakɨɨyembae, oyemboikokatuta.

17Iporoparareko vae, ikavi vae ko oyapo iyeupeguarä,

ërei ipɨa-pïrimbae, iyeupeguaräño ko oyapo ikavimbae.

18Iyoa vae iparavɨkɨ jepɨ jaangaño ko,

ërei jupi kavi rupi oyapo mbaravɨkɨ vae, oyekouta.

19Jupi rupi oiko vae, oepeña tekove,

jökorai ko ikavimbae rupi oiko vae, oepeña mano.

20YandeYa güɨröɨro ko iyemongeta kavimbae vae reta,

ërei ipɨakatu omae, jeko kavi vae reta re.

21Jeko kavimbae oiporara ñotai ko,

ërei jupi vae iñemuña reta oasayepeta.

22Moäka-vera oro pegua kuchi itï re oñeñono rami ko,

kuña maepöra yae vae mbaetɨ arakuaa güɨnoi vae.

23Jupi vae reta jemimbota ikavi vaeño ko;

ërei iyoa vae reta oipota vae, oporomboarasɨuka vaeräño.

24Mbae omee ngatu vae pe, oñemoïru ye chupe,

ërei jupimbae reve oasa ete mbae omombɨta iyeupe vae reta yogüɨrekota mbaravete rupi.

25Ipɨakavi vae, oiko kavita;

oporoparareko vae, iporopararekota vi jese vae.

26Tembíu re oñemoäkateɨ vae re tëta pegua reta oyepopeyuta,

ërei iñee kavi retata jókuae jäkateɨmbae reve kavi omee vae kotɨ.

27Ikavi vaeño oeka vae, oväe ikavi vae;

ërei ikavimbaeño oeka vae, oväeta ikavimbae iyeupe.

28Imbaeyekou reño oyeko vae, ñana ipiru vae rami ko,

ërei jupi vae reta jokɨta ñana jokɨ katu vae rami.

29Jo re ipokosembae, mbaetɨ eteita mbae güɨnoi;

iyarakuaambae oiko aveita iyarakuaa katu vae jembiokuairä.

30Jupi vae jembiapo, tekove peguarä ko,

tekove oaɨu vae, yarakuaa katu ko.

31Jupi vae omboresiveta mbota kuae ɨvɨ pe,

¡vɨtei pa iyoa vae reta, oiporarata jeko oï rupi!