DEUTERONOMIO 21 - Guarani Bible with DC

Oyeyukagüe mbaetɨ oyekuaa iyukaa vae

1YandeYa Tumpa omee ɨvɨ peve peiko vaerä vae pe oñeväe yave tëogüe, jare mbaetɨ oyekuaa kia ko oyuka vae yave,

2tenondegua reta jare mburuvicha oporojäa vae reta tojäa omano vae oïa güi tëta reta köiño ñogüɨnoia kotɨ.

3Jayave tenondegua reta, jókuae tëta köiño oï jókuae tëogüe güi vae pegua reta toipɨɨ metei guaka mbaetɨ vɨteri oyemombaravɨkɨ vae, mbaetɨ oyeokua yuvo jese vae,

4jare jókuae tenondegua reta togüeru ɨvɨpe kavi pe mbaetɨ etei oyeara jare mbaetɨ oñemaetɨ pɨpea pe, joko pe guaka iñatuäti toakɨo reta.

5Jaɨkue rupi toyogüeru sacerdote Leví iñemuña reta, echa yandeYa Tumpa ko oiparavo jae reta jei vaerä ñee kavi yandeYa jee re, jare iñee reta rupi oyemboapɨ vaerä ñeapo ani yoaka reta.

6Javoi opaete tenondegua reta jëta köiño oï tëogüe güi vae toyepoe guaka iñatuäti oyeakɨo vae re,

7jare tei reta iñeeäta reve: ‘Ore mbaetɨ royuka kuae kuimbae, mbaetɨ vi roecha kërai omano.

8Neɨ̈ro Israel iñemuña reta ndembae vae reta pe, nde renoe vae reta, jare agüɨye emboeko jekombae jugüɨ re.’ Jökorai jókuae jekombae jugüɨ oyepɨyere vae re iñɨ̈rota peve,

9jökorai peekɨ pepɨte güi teko, jekombae jugüɨ oyepɨyere vae re, peyapo yave jupi vae yandeYa jesa róvai.

Kuñatai tembipɨɨ reta regua mborookuai

10Peo yave peñoraro perovaicho reta ndive, jare yandeYa Tumpa omee pepo pe yave, jare peipɨɨ tembipɨɨrä,

11jare jókuae tembipɨɨ reta ipɨte pe peecha yave kuña maepöra yae vae, jare peporopota pemae jese jare peipɨɨ perembirekorä,

12jayave peraja pero pe jare topa toñapi ia, jare ipöape reta toyasɨa,

13tomboi jemimonde oyepɨɨ jae ndive vae jare topɨta toiko pero pe, toyaeo toiko tu re jare ichɨ re metei yasɨ, jaɨkue rupi ipuere güɨroke jare oyapo jembirekorä.

14Ërei jaɨkue rupi mbaetɨ yave oipota, tomaeño jese ojo ye vaerä, ërei agüɨye tomee korepoti re, agüɨye vi togüɨreko tembipɨɨrä, echa oasa ko jae ndive.

Membɨrɨpɨ iyekou

15Metei kuimbae jembireko mókoi vae, metei oaɨu jare ïru mbaetɨ, jare mókoi reve imembɨ chupe, ërei taɨrɨpɨ jae ko jembireko oaɨumbae imembɨ,

16jare oväe ara omboyao vaerä imbaembae taɨ reta pe yave, agüɨye tomee jembireko oaɨu vae imembɨrɨpɨ pei, tenondegua pe omee vaerägüe, echa añetete taɨrɨpɨ jae ko jembireko mbaetɨ oaɨu vae imembɨrɨpɨ.

17Omee tai ko chupe membɨrɨpɨ iyekourä vae, echa jae ko taɨrɨpɨ, iñemuña tenondegua ko. Metei ñavo iyekou güɨnoita vae güi tomee chupe mókoi ye.

Kuimbae taɨ ipɨapochɨ vae oñenupa vaerä

18Oime yave kia nunga vae taɨ mbaetɨ oipota oyapo mborookuai jare ipɨapochɨ, yepe tëi oyókuai tu ani ichɨ, jare yepe tëi oinupa jese,

19jayave tu jare ichɨ togüɨraja morojäa renda pe, tëta pegua mburuvicha ñogüɨnoia pe,

20jare tei: ‘Kuae cheraɨ iñeereenduä yae jare ñäteɨ oyapo oreporookuai, mbaetɨ oipota oyapo roe chupegüe, ipɨa jeigüeño oyapo, isavaɨpose.’

21Jayave opaete kuimbae reta tëta pegua toyapi ita pe toyuka. Jökorai peekɨ ikavimbae pepɨte güi, jare opaete Israel iñemuña reta oendu yave oipoɨuta.

Ïru mborookuai reta

22Kia nunga vae omano yave teko pɨ̈chɨi yae oyapo vae jeko pegua, pembosagüɨu yave ɨvɨra re,

23agüɨye pemaeño tipɨ̈tu jetegüe ɨvɨra re; jókuae ara voi peñotɨ; echa Tumpa iyepopeyu rupi ko omano, ɨvɨra reGl 3.13. osagüɨu omano vae; agüɨye pemongɨa peɨvɨ yandeYa Tumpa omee peveguarä vae.